媽媽日常 — 十個反白眼時刻
做咗媽咪五個月，真係好忙又充實。當中都有好多樂趣，亦有一啲時候令人又好嬲又好笑，下面嘅情況，你地有似曾相識嗎？
第🔟位：食得飯之際阿B擘大眼
唔知點解，每次BB瞓著覺瞓到好淋，阿媽滿心歡喜諗住開餐，佢就擘大眼。
當同阿B一對一，食熱辣辣嘅飯係奢侈啊Roarrrrr!!
第9️⃣位：見到BB自己玩隊友喺佢隔離玩電話
媽媽總有行開行埋嘅時候，都需要交代隊友睇一睇阿B。當你做完一輪家務行返入房，就會見到BB自己喺床玩，而你嘅老公亦都係床，用佢把懶係氹緊BB嘅聲講嘢，但實際係拎住部電話玩緊。
第8️⃣位：將熟睡B放落床一刻，佢醒了
氹阿B瞓覺真係一種學問，我哋每一個媽咪都好希望阿B識自己瞓。好可惜，初生嘅BB都唔知道，瞓覺其實係解決眼瞓嘅最好辦法。往往我哋就需要用好耐嘅時間先氹到佢瞓着，但BB嘅pat pat就好似裝咗sensor咁，一掂到張床，佢對眼就好似撳掣咁打開喇。
第7️⃣位：BB喊到氣都喘，隊友敷衍氹
雖然話有時BB扭眼瞓狂喊係有啲煩，但可唔可以有質素地氹佢而唔好見佢仲喊緊就隊俾我話BB唔鍾意你抱？抱佢望下鏡呀唱吓歌呀用你嘅方法啦。我都唔係一做媽咪就識氹BB開心㗎。
第6️⃣位：隊友表示好耐冇打機
其實真係唔係唔俾你打機。但可唔可以唔好話自己好耐冇打機？做咗阿媽之後，我好耐冇行街，好耐冇同朋友食tea，好耐冇睇書，好耐冇整頭髮指甲。
第5️⃣位：深夜阿B扎醒了，而你聽朝有早會開
好不容易做晒所有嘢，可以瞓落床瞓覺。一瞌埋眼瞓着咗，阿B就扎醒狂喊喇。而係呢個時候，隔離嘅豬隊友好似帶咗耳塞咁，依然瞓到gur gur聲。真係會想同阿B講，媽咪聽朝要返工你放過我啦。而可惜佢未識聽。
第4️⃣位：「佢係咪肚餓呀？」
呢句說話有機會出現喺奶奶、老公、自己媽媽，一切有機會接觸BB嘅親人口中。每次BB一喊，佢哋會自動撇除眼瞓、濕片、扭抱等等會令BB喊原因，無論佢係咪啱啱先食完嘢，佢哋都總會問， BB係唔係肚餓呀？
第3️⃣位：「你沖涼沖咁耐嘅？」
其實沖涼，假如BB唔係扭緊計，真係媽咪們最享受嘅時間。因為我地得呢10幾20分鐘真係抖一抖，洗走全日嘅疲勞。希望隊友們念在媽咪成日冇抖過，俾啲時間我地同自己獨處啊！
第2️⃣位：三姑六婆嘅育兒教室
無論喺街、抑或親戚聚會，你會遇上一啲一年都未必見到一次嘅三姑姐六舅婆同你分享佢地一啲育兒心得。BB喊，佢地會同你講，著咁多衫佢一定係熱到喊喇！BB食人奶，佢地會話，食奶粉仲好啦又方便！然後，你嘅內心會好想當場反白眼，但無奈你只能禮貌地回應係係係。
第1️⃣位：「我以前咪又係咁湊！」
講呢句野嘅人，通常都係你個奶奶或者係你嘅媽媽。當你想解釋或者更新一啲育兒知識俾佢地聽嘅時候，呢一句金句就會即時出現。喺呢一個時候，個白眼真係想反到去後腦呀！
你地又有冇啲想反一千個白眼嘅時刻？分享俾Wilma媽聽啦！
#同Wilma媽聊天
#歡迎分享
#Wilma今日五個月喇
#對眼反到後腦系列
