剛剛出去買嘢返嚟，推開大廈門就見到個阿叔狂鬧保安姨姨，言詞極盡粗鄙，因為呢個保安姨姨平時好有禮貌，有時等電梯都會同佢閒聊幾句，諗唔明咁好態度嘅保安可以得罪人哋啲乜，所以我嘗試了解下。
「咩事？」
阿叔：「咩咩事呀！我落嚟攞個外賣要畀佢話，我交管理費㗎！佢份糧都係我出，我先係佢老細呀！」
保安姨姨：「我叫佢戴返個口罩啫。」
原來件事係阿叔叫咗外賣，而我哋棟大廈呢期唔畀外賣員上樓，所有住客必須親自落大堂拎，但係呢位阿叔覺得搭電梯落一落樓只係幾分鐘嘅事，唔戴口罩冇咩大不了，而保安姨姨要佢戴返口罩就等於落佢面，條氣唔順，阿叔覺得交咗管理費就係全個屋苑所有保安嘅老細，所以大X晒。
「哦......明白晒，即係你覺得部電梯得你一個人搭，唔戴口罩都冇問題，你知唔知要罰錢㗎？需唔需要搞大佢？」
最後阿叔冇正面答我，但臨尾都瘋狂對住空氣爆粗，勢要執返個尾彩先上樓，保安姨姨畀咗個口罩阿叔，佢唔該都冇聲，粗魯地接過就戴住去搭電梯。
大堂得返我同保安姨姨，我同佢講：「下次叫阿頭嚟吖嘛，呢啲阿叔蝦女人就叻，你搵返阿頭同幾個男同事過嚟，佢就唔敢惡㗎喇。」
保安姨姨：「冇用㗎，佢哋會叫你唔好同住客嘈，總之有起事上嚟都係我哋錯，冇所謂啦！好小事。」
「咁都小事？」
保安姨姨：「我睇得好開㗎，最緊要有工開，我兩個仔仲讀緊書吖嘛，所以我成日同兩個仔講，畀心機讀，唔係要佢哋叻過其他人，我係想佢哋將來可以揀份自己鍾意嘅工，可以舒服少少。」
「保安都唔錯吖，蠻不講理嘅人邊度都有，返寫字樓都大把。」
保安姨姨：「係呀，奇怪人邊度都有，我反而覺得自己好彩，幾年前讀個保安課程，嚟呢度做都算穩定，最近多咗人失業呀，好多人登記想喺呢個屋苑做，但係冇晒位要排（我估佢意思係waiting list），好在當年我讀保安諗住有一技之長咋。」
進修，學習，唔係一定指讀大學，可能保安牌、電工牌、學剪片、學日文、學德文，將來都會幫到你，最緊要唔好畀自己停止進步。
記唔記得之前《臥底》個故事講過～～～～～每一個想去學習或者進修嘅諗法，可能係未來嘅你，向而家嘅你發出求救訊號。
