奧運還未落幕，竟然有奧運以外的新聞可以成功搶到香港人的眼球，腦細果然是腦細。
是的，林日曦辭職了。
唔識人，冇內情，我知道的，嗰個單眼佬都知，沒有秘聞分享。
但林日曦辭職其實是香港人的事，因為 100 毛不知不覺陪伴了我們渡過很多個艱難的時刻，本來要哭的日子都是因為有 100 毛這個奇怪的媒體才讓我們勉強笑得出來。
作為 100 毛站得最前的老闆，林日曦辭職的確有需要向公眾交代原因。
雖然沒有內情，但根據不同渠道的道聽途說，形容林生最多的相關字有兩個。
第一個係「癲」。留意番，唔係癲癲哋，係癲，癲癲哋同癲好大分別，佢係癲。
第二個係「跳」。典型藝術家的 inconsistency，因為諗頭多，下一個 idea 好快概過上一個，所以「跳」。
一個又癲又跳嘅人要辭職，作出多餘分析的「分析員」其實真係好多餘。
唯一值得研究下的，是八百萬賣晒自己股份畀陳強同阿 Bu。
講真，像我這種鍾意威但又不是太大財力的人，其實完全不會介意用兩千萬左右去買入 100 毛三成股份，更別說那些又要威又出得起錢的人了。
咁點解林生傻到用 33.33% 股份換八百萬咁少呢？最容易想像的原因，大概是他並不希望 100 毛落入外人手中吧，再加上陳強同阿 Bu 可能平時大洗，所以有需要嘅時候都淨係攞得幾球出嚟。
又癲又跳的人，在情義面前，還是挺有邏輯的。
至於那個重中之重的問題，100 毛冇咗林日曦得唔得㗎？
除非你真係好清楚 100 毛的內部運作，否則邊個可以有答案？
我自己覺得，100 毛唔係玩林日曦一個人，而係玩一個定位。
呢個定位叫做有 heart。
用有 heart 嘅人，做有 heart 嘅嘢。
好似今日我食大渣哥咁。
跑完山，叫早餐，打電話去大渣哥。
去到大渣哥，佢哋話收唔到我張單，我先發覺原來我之前㩒咗九龍灣個電話。
銅鑼灣分店嘅姐姐明知我打錯電話，仲非常誠懇同我講咗三次「唔好意思」，然後話「麻煩你等等我哋會盡快整」。喂屌，啲服務態度仲好過 Shangri-La。
算啦，泊低架車，坐低食。
份早餐嚟到，真係唔講得笑：平時啲茶餐廳早餐，最瀨嘢就係塊麵包，一係就太硬，一係就求其撻啲牛油上去；佢哋呢塊，金黃鬆軟，又暖又綿，係麵包之友最大嘅恩物—丹麥多士呀！
然後碗通粉嚟到，喂，唔係一般湯底咁簡單喎，濃郁可口，忍不住問姐姐，借問聲，呢個湯底係咩名堂呢？
她甜甜一笑，說：「心靈雞湯。」
懷念腦細是應該的，但就算沒有了他，100 毛依然是香港人的心靈雞湯。
唔識人 在 【生活】無朋友唔俾啊? 唔一定要識人好過識字 少 ... - YouTube 的八卦
社會上人人都說 識人 好過識字，但有些人真的比較內向難認識很多朋友，常被認為孤獨無聊，到底真相是否真的如此？我們齊來睇睇。 ... <看更多>