（圖左）十年前，未變癲佬嘅東方昇 and 未變虧佬嘅林日曦
（圖右）十年後，已變癲佬嘅東方昇 and 已變虧佬嘅林日曦
《當時，我又點會估到，呢條仆乖係痴㗎呢》
人生。
十年前，我仲喺商台做，負責天水圍天比高*企劃。
（*最簡單咁解釋，就係一間做創作嘅社區中心）
十年前天比高開張第一日，第一批嚟參加嘅後生仔當中，
有一條叫王嘉偉嘅仆乖。
呢條王嘉偉，當時都未畢業，讀緊心理學，
個樣有少少心理變態，CC縮縮咁，
講嘢呢就口窒窒，但夢想係做DJ（……啤）。
每日放咗學，佢就會由馬鞍山搭車去天水圍，
同我呢條虧佬一齊搞呢搞路。
搞啲乜？就係搞一樣好虛幻嘅嘢，叫創作。
呢家嘢真係好虛幻，日又度夜又度，攰過擔泥。
攰都冇所謂，最慘係真正出到街嘅嘢又好少（因為啲嘢未夠好）。
就係因為咁虛幻，大部份人搞下搞下呢，
就會意興闌珊，選擇離開。
偏偏就係呢條仆乖，屬於少數，非常勤力，亦非常有毅力。
賴死唔走，搞足咁多年。
－－－
後來我離開咗商台，全職發展「黑紙」，
後尾又搞《100毛》又剩。
直至2015年，當搞緊「毛記電視」時，
我突然間諗起呢條王嘉偉（當時三四年冇見）。
我都唔知佢當時做緊乜，膽粗粗就打畀佢…
我：「喂，唔該王嘉偉。」
王：「（依然口窒）我…我…係。」
我：「我係林日曦，我搞緊單嘢，你有冇興趣一齊搞？」
王：「好…好…好…呀。」
完。
當時，我又點會估到，呢條仆乖係痴㗎呢。
結果，佢就由一個口窒窒嘅仆乖王嘉偉，變成一個口窒窒嘅癲佬東方昇。
係呀，你咪睇佢喺鏡頭前懶係講嘢流利咁，就以為佢好返，
佢死練㗎咋。
佢到今時今日，平時講嘢依然係口窒窒㗎佢。
但你又真係吹佢唔漲，佢非常勤力，亦非常有毅力，
平時口窒窒唔緊要，練到出鏡時唔口窒窒就得。
之後嘅嘢，大家都有目共睹，條友發咗癲…
癲到入機場試下特事特辦；
癲到走入廁所食鮑魚；
癲到喺書展同齊昕示愛；
癲到一條友過北韓探險；
而最癲係探完仲有命返嚟…
（仲有一單癲過去北韓，就係癲到用個死人屎忽坐爛佢腦細啲書）
－－－
半年前。
我見條友咁勤力，又咁有毅力，最重要係……咁癲。
於是求其試下佢，突然同佢講：
「喂，幫你搞個talk show，下年，四月，伊館。」
吖條友竟然又口窒窒咁答我：「哦…好…好…呀…」
當時……我已經知佢痴㗎喇，但估唔到痴得咁混循啫。
（喂你講嘢口窒窒，學咩人開talk show...？）
就係咁，見佢咁積極，
洗濕咗個頭喇，呢半年嚟我哋就不斷開會，
不斷日又度夜又度，（感覺又好似去返十年前咁）攰過擔泥。
喺呢幾個月入面，有一萬個人向我質疑過呢條友口窒窒咁非常唔掂，
但我睬佢哋都傻，因為我知道所有人都係9up，
得我先最清楚東方昇呢條癲佬癲在乜。
佢就係癲在非常勤力，而且有異於常人嘅毅力，
好多人都話鍾意做創作，但最後都嫌辛苦，但佢從來都冇(表面上)。
所以我信佢，有咩難題，最後佢都一定克服到。
呀癲佬…
你當日嘅夢想係做DJ，so solly我實在幫你唔到；
但你今日嘅夢想係繼續發癲嘅話，好彩我都仲可以幫到少少手…嘅。
PS. 不如你又幫返我少少手，上到台，唔好口窒窒……o…o…ok？
唔知佢 在 【掃】【空耳】我都唔知佢唱乜 - YouTube 的八卦
【掃】【空耳】我都 唔知佢 唱乜. 195K views · 9 months ago ...more. 4TL Rico Ng. 303. Subscribe. 303 subscribers. 2.8K. Share. Save. Report ... ... <看更多>