//張宇人又以其飲食界為例：「我們飲食業有數十個工種，大廚和總廚有侍產假的話，我怎樣請人頂替那個位置？」//
首先，我係好支持「以前我們沒有XXX又如何」呢種句式，例如「以前我們沒有高鐵又如何」、「以前我們沒有國歌法又如何」、甚至再推落去「以前我們沒有偉大的中國又如何」？如果咁樣就算係辯論，議員呢個位真係好易做。
咁啦 ，以前冇google就可以任你廢up，但好彩時代進步左， 我地隨便上網睇下侍產假有十四日、產假有九個月嘅英國係點玩先！咦？！由星期六的兼職侍應、到廚師再到大廚，全部都有人放產假，咁英國飲食業係咪癱瘓左啦？英國又係咪請唔到人啦？你快啲拿拿臨問下你啲高官朋友，在英國的仔女有冇餓親？咁啦不如你同立法會申請搞個考察團黎英國，人妻先生下海，開個架部捉住你隻手仔教你上網搵外國點樣解決問題好冇？我公司好鼓勵我地拎假去做義工，手天使我ok架！
唔好成日淨係講飲食業，我地放眼世界，我再帶你望下紐西蘭總理，竟然「不負責任」在任內生仔，仲要一口氣拎左六星期產假，八月二號星期四先黎返工，hea兩日又可以放埋星期六日，仲過份過U字頭啲請假攻略。唔單止係咁，第一日仲要帶埋個女返工，HR見到一定問「依家唔駛做呀？當office係托兒所呀？」咁究竟喺總理呢六個星期產假內，紐西蘭有沒有進入無政府狀態、軍閥割據、黑死病蔓延、最低工資設在34.5港紙、天火屠城大地陸沉？
冇。
咁你嘈咩姐？（翻白眼）
#自己無力生又唔俾人地生係咩玩法
#講真香港地咁大壓力
#唔好話生仔
#就算陀得穩都唔容易
#唔好話陀得穩
#有幾多人連做嘅興致同空間都冇
#你估生仔咁易架
