一個凍凍哋嘅早上～診所內都近乎坐滿等睇醫生嘅人。
一位駝背嘅婆婆兼拖住一堆嘢咁推門入到嚟診所，佢行得好慢好慢好慢：「姑娘呀？」
我企起身問：「係～係咪睇醫生呀婆婆？」
佢：「係呀～」
我：「你有冇喺度睇過呀？」
佢：「冇呀」
我：「咁你有冇帶身分證呀？」
佢：「有有有」
我：「咁你俾身分證我登記呀」
佢揭起面衫摷身分證，突然佢停咗手，抬頭問：「係咪收醫療劵呀？」
我：「唔好意思呀婆婆，我哋唔收㗎，你要去啲貼住醫療劵貼紙嘅診所呀，咁先可以用醫療劵㗎」
佢：「哎呀，我仲行咗咁耐…」
佢擰轉身執執佢啲細軟包袱，再問我：「姑娘呀？邊度有得收醫療劵呀？」
我：「你等等呀，我而家上網睇吓呀」
突然有位女士行埋嚟同我講：「阿姑娘呀？你好得閒呀？你咁得閒嘅嗌名啦，我等咗好耐啦」
入面有人睇緊，入面嗰個都未出得嚟嘅，我嗌名做咩呀？
我：「小姐，入面有人睇緊醫生喎？」
女士冷笑咗一下，對眼掃視咗婆婆一輪，自己邊行返位邊講：「正經嘢就唔做，係都要理埋啲無謂嘢，我等咗好耐啦嘛！係要理埋啲唔三唔四嘅！」
坐喺度嘅一位叔叔同女士講：「有幾無謂呀？我排你前面都未出聲啦！」
婆婆望住我講：「姑娘姑娘，唔駛煩你啦，我自己行去搵啦」
我：「唔煩呀婆婆，好小事咋嘛，你等我一陣呀」
婆婆拖住堆嘢準備離開。
叔叔即刻企起身同婆婆講：「拖住一抽二褦，外面咁大風，你等姑娘睇吓邊間有先行啦」
婆婆耍手：「我得㗎啦，自己得㗎啦」
叔叔：「唔好啦，你等陣啦」
叔叔問我：「搵到未呀姑娘？」
我：「有呀，要過三條街呀～XX街嘅XXX醫生」
叔叔同我講：「我轉頭返嚟呀！」
佢一手抽起綁住婆婆啲細軟包袱嘅繩，婆婆：「我自己得啦」
叔叔：「行啦，一齊行過去啦，我都唔想留喺度對住條八婆，呢挺八婆真係冇得頂呀！成個牛頭馬面咁！出面啲空氣不知幾精神爽利呀！我出去行吓好過呀！一陣望多陣都嘔呀！」
眾人目光一致落咗喺頭先位女士度，女士翻翻白眼冇出聲。
係咪衰呀～好哋哋唔出聲咪冇事囉，搞到自己唔三唔四咁有乜謂呀～
#大家都會有老嘅或唔方便嘅一日
