睇完阿澤同阿叻嘅「世紀大戰」，諗起我2015年底為RTHK主持 #我係乜乜乜 訪問叻哥，當時有人問我點解咁calm，點解唔反駁佢、鬧爆佢。第一，既然佢自己衝出嚟裸跑，我點解要幫佢減少做小丑嘅air time？世人自有判斷。好多嘢，我哋唔使自己出手，因為蠢人一定會做蠢事，呢句說話係曾鈺成講嘅，我相信佢喺建制派先後經歷過蔡素玉、Tree根、元秋、葛博士一系列極品，冇人比曾鈺成更有資格講呢句話。
第二，大佬，你估忍笑好容易？面前嗰位不斷講嘢推翻自己三秒前講過嘅嘢，不斷指住隻鹿話係馬，花0.1秒同佢拗我都覺得浪費自己人生。我嗰次仲大鑊，叻哥仲講埋英文，不斷話「香港人成日compan compan compan」，對我哋呢啲受過基礎英語教育嘅港女，感覺就好似被迫同手指尾留長指甲嘅大陸阿叔同檯食飯，你個腦會忍唔住浮現佢手指尾特長指甲嘅用處，想嘔，但又唔可以糾正佢，因為佢死都唔會相信自己讀錯字，因為佢見到個「fact」係讀「compan」，佢會話睇片啦美國佬都係讀「compan」，當你叫埋個美國人喺佢面前讀一次係「complain」呀唔該，佢就會話呢個唔係美國人，一定係收咗錢嘅中國人假扮的，咁你就會勁嬲，點同佢拗呢？因為佢錯唔曬喎，中國人收錢造假真係國技嚟喎，但佢cut曬前因後果，或者調轉曬因果邏輯，呢啲咁深佢又唔會明。
雖然好難，但我哋必須要接受，呢個世界就係有一班人(而且數量龐大) 個腦有先天性limitation，所以點解藍絲咁容易相信fake news？因為豬有個特徵，就係同一時間，個腦只可以放一個message，放唔入第二個，因為個腦唔夠ram。鬥快插旗，插入第一個message佢就會信到十足，就算之後再澄清，已經係第二個message，個腦冇位放。Dominic Cummings就係利用豬呢個特徵喺英國製造fake news，令多達300萬「英豬」信以為真而投票贊成脫歐，對手fact check再澄清已經冇用。
阿澤好努力講出是非黑白，真係盡曬力，藝人講良心說話係好難得。對住藍絲，就當一場娛樂，對住黑警亦都唔好言語上挑釁佢，因為就算嗰個係你親人，你呢世都改變唔到佢。
#王迪詩
IG: daisywong_author
咁就好啦英文 在 [新聞] 宏都拉斯掰掰！在台留學生359人…104人- 看板Gossiping 的八卦