啲人同我講話Thermos最近開咗間café，仲係全球第2間，我忍唔住問：Thermos賣真空嘢賣到全世界街知巷聞，佢開得既，啲侍應係咪全部都真空既先？
一定係，除非唔係。
點知真係唔係。真空侍應就冇啦，真空煲同真‧home café就有，仲估唔到有意外驚喜添。
講真，每次去開灣仔合和果邊，尤其食晏時間，都頭痕到喊。附近幾幢寫字樓一到食晏時間就直情打仗咁，四圍都係《Walking Dead》拍攝現場，仲慘過中學果陣響學校附近茶餐廳快餐店鬥快衝去排隊，同一大堆好臭既人迫嚟迫去，打晒蛇餅搶位搶嘢食既饑荒狀態……
所以Thermos揀響合和中心度開係聰明既。
至少多個選擇，而且仲係揀聽落冷門食落原來好大路既老撾菜，就知佢地有心搞，唔係求其賣吓咖啡三文治就算啦。
講起老撾菜，不外乎兩個字：辣。
佢就有少少似泰國嘢既，但就係泰北果邊，唔係我地真‧香港人食開果啲曼谷芭提雅風味，起初我呢啲怕辣既小綿羊都有少少驚既，但原來阿chef話，佢地為咗遷就真‧香港人口味，已經調較到適合我地既辣度，不過如果有人想試真正老撾辣度既，可以同佢單聲，佢好樂意畀佢感受吓喎。
我就勸你咪亂嚟啦。
聽講呢度為咗配合附近趕住食晏既辦公室人士呢，主要係以輕食為主，好多時候一聽呢兩個字我都真心驚，驚「輕食」就等於「求其」，但呢度又唔係喎……
個人最鍾意呢款豬肝醬扎肉法包，一般扎肉有9成都係膠嚟既，但呢度用既扎肉全部自己整，超過9成都係肉，食落扎實好多，豬肝醬又係自己調配，出面冇得賣，佐以泰國嘢最醒胃提神既爽口青木瓜絲，酸甜爽脆，層次豐富，一個人隊晒成條大滿足，賣65蚊咋喎，咁既水準，抵啦！
響得辦公室區開鋪又點可以冇沙律呢？開店推出既兩款沙律我都試過，個人鍾意呢款有藜麥既，飽肚得嚟又健康，隻汁低卡之餘仲夠晒醒胃，夏天啱晒。
呢度既咖啡豆嚟自埃塞俄比亞，係請當地農民種完之後同佢地買返嚟用，符合公平貿易原則；
我最鍾意既detail位係杯邊用蔗糖抹咗一圈佢地既咖啡粉，飲果陣可以食埋(食好啦，唔好用鼻索呀，報警架)，好有中學時代飲胚芽奶茶既feel，連埋咖啡粉一齊飲，每一啖口感層次都唔同啲，幾有綽頭，good喎！
叫得Thermos，梗係要有番啲招牌嘢啦。
呢度既熱食全部都用返Thermos自己既燜燒食物罐，包括有菠菜魚片蕃茄湯飯同埋老撾式生熟牛肉湯河，仲好好玩架，佢遞上嚟既時候係生既，你只要拎住佢畀你既熱水好似拉茶咁沖入去，冚蓋，焗幾分鐘，就自動變成新鮮滾熱辣，食得架啦！
唔怪之得叫膳魔師啦，食餐晏都可以當魔術咁自己落手落腳玩，如果第時可以用埋佢地擺響架上面果啲限量crossover罐，用hello kitty或者「是哇實ki」既燜燒罐嚟食，肯定開心好多囉。
我就真係大鄉里，唔知道原來依家呢種無火煮食原來先係健康飲食潮流，而且試過又真係夠熟，完全唔需要擔心話唔熟或者唔夠味，個人認為如果鍾意清淡啲既呢，就可以揀魚湯飯，但我呢啲重口味囉喎，就梗係牛肉湯河啦！
咪睇佢個罐好似細細咁，其實一個人分量啱啱好架啦。
呢款夏季限定西瓜薑汁沙冰真心正，唔飲真係唔知原來西瓜同薑汁可以做朋友，仲咁friend咕喎，一個消暑一個驅寒，所以話呢度既每一樣嘢，係真係有啲心思既。
有個都巿傳說話啲人如果拎住Thermos保溫瓶嚟買咖啡有優惠，我多口問咗，真咕喎原來！
咁我拎屋企果個Thermos燜燒罐嚟買飯係咪又有得減先？
……你話如果Thermos遲吓順應民意出埋錢罌就好囉。
旺中帶靜，舒服好坐，食完嚟手仲可以買埋個暖壺或者真空煲返去，又食又拎，仲想點？
都莫講話周圍同人講話自己食過老撾菜，擺上網呃吓like認吓叻，哈哈。
地址: 香港灣仔皇后大道東183號合和中心7樓705號店鋪.
#一路食一路睇住啲人上嚟睇嘢買嘢都幾得意 #你估嚟買嘢既人多定食嘢既人多 #對得多真係忍唔住會想買一兩個返去 #呢度好危險呀我都係返火星先啦
