冇諗到尋晚篇專欄告別文章得到咁多新知舊雨按讚甚至留言支持，
好多仲係響blog時代睇到依家，啋⋯⋯
有時諗，可能因為自己山羊座自閉底，
加上咁多年嚟嘅人生經歷，
太多無端嘅打擊同傷害，
令我一直覺得要降低重心，
低調潛行，先至唔會再無辜成為箭靶，
或者惡意攻擊中傷嘅對象，
所以呢幾年嚟，
除咗用專欄用文字表達自己，
就好少抬頭做人，
匿匿埋埋，費事得罪更多人，
鬼叫個樣本身已經生得夠衰夠摟打，
但偏偏因為咁，
令到好多人都覺得越嚟越睇唔到真正嘅我，
其實唔係我唔想，
只係人越大，無端嘅自卑感越嚟越嚴重，
加上世途險惡，要學識保護自己，
畀人摸果陣要大聲嗌唔好啫⋯⋯
但經過尋晚，
得到大家嘅熱情鼓勵，
我又真心覺得，可以由文字重新出發，
回歸初心，做返自己，
唔需要再卑躬屈膝，頭仔耷耷，
寫返可以真正呈現到自己嘅嘢⋯⋯
或者因為平時我好習慣收埋自己，
所以物以類聚，
鍾意親我嘅朋友都係同一類人，
呢幾年嚟一直都唔係好見到大家，
但原來自己仍然畀大家一直默默支持疼錫緊⋯⋯
嗚嗚，我以後會努力迫自己唔好再咁收收埋埋，
希望可以潛移默化返大家，
令呢度熱鬧啲溫暖啲，
等我地呢班零餘者可以響度從文字中搵到共鳴同安慰⋯⋯
而響感動感恩嘅同時，我今日成日不停咁諗緊，
其實⋯⋯可唔可以做返啲嘢，
自渡渡人（拿唔係擺渡呀吓，唔會擺明渡人，擺大家一道架吓）？
咁啱有唔少讀者話希望真金白眼，
以行動支持今時今日仍然努力寫作嘅文字人，
又有熱心朋友話願意寫app幫忙，
我忽然諗，呢個⋯⋯會唔會係一個契機？
依家想請大家表態留言，
如果真係有個類似副刊專欄咁嘅app畀大家睇專欄，
每篇頭一段免費試閱，睇晒成篇就要酌情收費，
大家想睇小說定係專欄散文？
您地會希望係逐篇計錢定一個月付費任睇？
每篇文章大家又認為幾蚊係您地願意付嘅價錢？
A.$1-$3
B.$4-$6
C.$7-$10或以上都肯畀！
＊如果有朋友想參與呢個project，成為其中一個專欄作者，請將個人電郵連同近作pm我吖～
＊＊又或者大家有何高見，都可以留言或者pm！感謝！親～
#呢云仲唔係少能功夫加唱歌跳舞 #人生滿希望前路由我創呀喂 #其實大家鍾意睇時下啲抽水文定係書面語果種傳統專欄散文呢 #如果大家認識其他創作人朋友要開飯生活麻煩轉發畀佢地吖
