//90後中文科教師、香港電影迷、影評人和爸媽的兒子，塵世中一個迷途的小書僮，2015年末踏上影評之路。//
-
話說喺作者簡介嗰度，我係咁樣寫的。其中一個最唔能夠缺失嘅稱謂，就係[爸媽的兒子]。
-
尋晚喺電影中心嘅座談會，其中一個傾過嘅問題，就係有關自己最早對於電影/香港電影嘅回憶，而呢個回憶，其實一直以嚟我都好清晰嘅，就係98年嘅《古惑仔之龍爭虎鬥》。
-
記得嗰時睇完真係覺得型到癲咗，銅鑼灣只可以有一個浩南，究竟係陳浩南，定係司徒浩南?邊個先係駱克道真正嘅揸FIT人?電影最尾兩場拳擊大戰，一明一暗，明於大頭仔對東星仔，暗在陳、司徒浩南嘅激戰，一次過解開幫會同個人嘅恩怨情仇，好漫畫化，最後鄭伊健仲要聶風上身，出咗一招乜鬼旋風腿，記到今日。
-
講到尾，原來細個嘅時候睇咗某啲戲，某啲片段，係會影響咁深。到今時今日，《古惑仔》系列仍然係我極鍾意嘅香港電影。所以尋晚我話，如果有在場人士係家長或者準備做家長嘅話，帶你哋嘅小朋友入場睇香港電影啦。你永遠唔知你播嘅種，幾時會萌芽，永遠唔知呢啲行為會帶嚟咩影響。
-
而當年係入戲院睇嘅，自己得幾歲，梗係父母帶我去朝聖啦，亦即係幅相喺我隔離嗰位媽媽。之後去隔離茶餐廳食飯，佢話完全唔記得帶我睇過《古惑仔》喎，反而話一齊去紅館睇過《叮噹大電影》，世事就係咁奇妙。
