Search
新鮮海鮮蒸氣火鍋
冬天凍冰冰，一大班fd出黎食野都係火鍋、雞煲呢啲選擇架啦🤔。想食得唔同啲，不如試下海鮮蒸氣火鍋？今次司令同朋友就食得好滿意啦！全因為海鮮真係好新鮮！即使係蒸出黎都好好味，超晒班！
重點要講下以下令司令好深刻嘅菜，包括有聖子、蠔、鮑魚同埋排骨粥。聖子每件都包埋少許粉絲，蒸熟後冇加調味料已經好鮮！點左少少豉油已經好夠，好味！蠔係每隻都大過手掌架😍，蒸完都係一個字，鮮！不過司令個人黎講中意食生蠔多啲😝。鮑魚本身已經有薑同蔥去辟味，所以即使蒸熟都唔腥。
粥都推薦？係呀，但其實呢個粥就係放係蒸爐下面一直用海鮮流出黎嘅精華一齊煲，食到尾聲就會有一煲軟綿綿嘅南瓜排骨粥。所有海鮮嘅精華都煲晒入呢煲粥，可想而之係幾好味！司令食完都再添左一碗，真係好正呀！
其實每道海鮮都會有時間計著蒸幾耐，所以真係唔怕會老，仲有侍應姐姐由頭服侍到尾，幫你睇著個火。司令好推薦中意食海鮮嘅朋友帶屋企人一齊試試呢。
海里鮮蒸氣石窩 (佐敦)
地址 : 佐敦佐敦道31-37號百誠大廈2樓
分數： 8.5 / 10
#司令打邊爐
#司令中國菜
#司令遊佐敦
日式燒肉
除左韓燒之外，司令都好中意食日式燒肉，網燒嘅肉都特別滋味😍。今次要介紹佐敦嘅呢間燒肉店，無論係海鮮定肉類都好出色。
厚切Prime牛小排 ($188)
一碟八塊，厚度足夠，以份量黎講及格。侍應姐姐教路放上爐燒完一面再另一面，可以燒到靚靚網紋，一切仲有肉汁流出，點頂呀！
特大緬甸虎蝦 ($120)
一隻已經有iPhone📱咁大😮，放上爐燒先燒兩面再燒埋個背脊。記得唔好燒到殼變黑，唔係會好難剝殼架！燒到靚靚仔仔成隻脫殼，蝦肉好鮮，肉質唔會勁老勁實，唔加鹽已經有淡淡嘅咸味。
Prime牛角切 ($168)
燒牛肉粒其實每面燒一陣已經食得，見到佢係爐火上面滾來滾去已經流曬口水，咬落去，裡面仲鎖住啲肉汁，沾少少特製既醬料，好快就一粒粒清曬。
黑松露燒特大帆立貝 ($60)
見著牛油同黑松露慢慢燒溶到同帆立貝融為一體已經想尖叫，好淫賤呀😍。帆立貝夠鮮，同黑松露一齊食兩者好夾，好邪惡！
和匠日式燒肉店
地址：佐敦長樂街23-27號德威大廈地下3號舖
分數：8.5/10
#司令日本菜
#司令遊佐敦
