同女朋友去旅行，總係期待但又擔心。
因為每次佢都會好緊張，要一早就搞掂晒啲機票、行程。
「遲一日，分分鐘就貴好多㗎喇！」不過慢條斯理嘅我，最後又拖多成個星期先訂。「你睇下！真係貴咗成千蚊喇！」女朋友又畀我激親。
佢咁上心，除咗因為份人細心之外，仲因為我哋係冇乜錢嘅情侶。
打開Facebook，總係羨慕人哋成日周圍去，而我哋就要儲好耐錢，忍手買少啲嘢，先緊緊夠執啲平機票。
「終於都訂到喇！好嘢！由今日開始計劃下行程先！」見到佢個開心樣，得來不易，但一切都值得。
記得一次去台灣，會去兩個星期，玩晒墾丁、高雄，同台中。
臨出發前我哋鬧咗次大交，因為我有時間打機，都冇計劃下行程，仲好不負責任咁講：「去旅行係relax下，去到想去邊咪去邊囉，使乜Plan定㗎！？」
講完之後，我眼尾都望到佢嬲到想一巴打埋嚟，但當然冇，佢只係喺手袋入面拎咗幾張A4紙出嚟，上面密密麻麻寫滿字。佢隻眼紅晒，手都震埋咁喺我面前撕爛晒嗰幾張紙。
「呢啲係我預備咗好耐嘅資料同行程，諗住同你一齊睇下，我好畀心機，好期待同你去玩，但依家唔去喇！唔想同你去呀！」
佢一邊鬧，我一邊望住零碎嘅紙張，上面寫住Day 1⋯Day 3⋯夜市⋯日月潭⋯清境⋯
我好內疚，逐張逐張執返起：「對唔住。」
「其實你想唔想去㗎？」佢問：「係咪覺得我迫你去？」
佢見我一臉內疚咁貼返好啲紙，都開始平靜落嚟，我再道多次歉，同應承佢唔會再咁唔上心，然後⋯⋯
「衰人，你話你負責晒㗎！我依家開始咩都唔理㗎喇，等你帶我去旅行！」呼⋯終於冇事！
但原來Plan嘢真係好頭痛，比我想像中複雜好多，包唔包車，住唔住民宿定酒店，一個地點都足以影響先後次序，甚至成個行程，我一邊寫低啲資料，佢一邊望住我甜笑。
好彩最後都去得成，兩個大鄉里出發去台灣，飛機起飛一刻，佢話要拖住我隻手。
「知唔知點解我上次發咁大脾氣？」喺墾丁嘅其中一日，佢提返起撕紙事件：「因為我好期待同你去旅行，係真正屬於我哋嘅時間，唔使理平時啲煩惱，可以24小時都同你一齊，所以先要好好咁Plan，一秒都唔好嘥。」
佢話上次有啲野蠻，問我有冇嬲，我當然話冇。
每一段旅程，都係難忘獨特嘅經歷，唔知下次會唔會再嚟，即使身邊係同一個人，心態都會唔同晒，難怪女朋友會話：「每次旅行都要好好珍惜。」
我係一個細膽嘅人，成日都好驚好快就見唔到佢，所以唔想同佢有遺憾咁過每一日。墾丁嘅沙灘上，眼前分唔清係藍天定係大海，一望無際間，我攬住佢，覺得以後去邊都唔重要，最重要係有妳。
佢唔知我咩事眼濕濕，我話只係吹沙入眼。
【後記】出發前，拗咗好耐包唔包車，我話熱血啲自己探險啦，但女友知道我哋最後會搭錯晒車，又會躁到互鬧，都係精明咁決定包車， 仲畀我哋搵咗間又平服務又好，叫「風通雲圖」，喺香港book定都得㗎，聯絡佢哋好快就覆。有需要自己Mark低睇睇啦：http://www.carry-on.com.tw/
FB: 風通雲圖
------------------------
喜歡的話like我的page，會有更多故事及散文
FB: 莎比亞
*** 八卦先好ADD嘅私人FB AC: sapeiar ***
Follow IG睇獨家sweet相: sapeiar
著作：《原來比單戀更寂寞》、《鬼叫我唔識拍拖》
網上試閱：http://on.fb.me/1PKxJnS
台灣好行日月潭訂票 在 台灣好行日月潭訂票 - 加油地圖 的八卦
搭乘台灣好行-日月潭線不儘可以免去交通安排的煩惱，還可以欣賞沿途風景、輕鬆抵達...商品QRCode凡經核銷兌換票券後，請妥善保管票券，遺失需重新購票，票券一經 ... ... <看更多>