【英國外交咩玩法之Simon = 香港人】
美帝參議院之後，廢國忽然出手（個人觀感）
經歷咗差唔多半年，睇黎大家應該開始了解到，咩係所謂國際政治博奕。成效並唔係好多人所想象咁「即食」三分鐘就送到埋口，係要等時機、各國內部政治權鬥同切入點，中間嘅堅持同等待係可以好悲壯（慘）同漫長。尋日美帝參議院啱啱通過條「惡法」，點解咁啱得咁橋Simon就接受BBC獨家訪問呢？睇黎廢國終於揾到時機同切入點，彷彿話比所有國民知Simon就等如香港人咁：情況好危險（恐怖）。
為咗唔比自己變成標題黨或者斷章取義L，從來睇新聞都會思前想後，諗下前因後果。睇完Simon個訪問，再讀晒佢FB嗰份「口供」，然後望到英國外交大臣即日嘅聲明，腦裡面即時想起幾個時間同事件。首先，英國國會响10月尾通過解散然後12月12號大選，即時現時英國係處於看守政府狀態，理上唔應該有任何外交大動作（無錯喇，亦即係「怨婦」所講嘅「乜都唔做」）。就响國會正式解散前（11月6號），下議員外交委員會就出咗個報告，題目係「對抗獨裁」，要求未來政府監控院校言論自由、保障國家安全、立法制裁違反人權嘅「兩個國家」、審視派駐香港終審庭法官同BNO問題。然後國會散band，所有議員都唔再在位，首相同內閣官員只係掛住個名，大家熱熱烈烈地玩競選工程（係喇，即係「英國佬不負責任」）。
到11月11號，中國敬業集團宣布用大拿拿12億鎊注資British Steel，一間每個禮拜蝕一百萬鎊，無乜人明點解會買嘅失敗廢國破產工業（啱喇，即係「英國佬食兩家茶禮，信唔L過」）。其實呢10日多啲，香港嘅大學發生咩事，已經係國際頭條。根據遠東邏輯，收咗人錢嘅應該係乖乖聽話嘅。咁11月15號，中國公使接受《BBC》Newsnight訪問，狠狠地話香港已經亦永遠唔關廢國事，同外交委員會前主席Tom Tugendhat對質。11月18號中國駐英國大使响倫敦，再公開嚴正教訓廢國，話香港人爭取嘅同民主自由無關，唔好咁鼓吹暴力黑手之類。而廢國政府方面，就好似好死狗咁無回應嘅（除咗傳媒之外）。
美帝尋日英國凌晨時間通過咗Hong Kong Human Rights and Democracy Act，今日英國時間早上Simon嘅訪問就出現，咁啱呢？而外交大臣唔洗幾個鐘就出聲明，香港啲裁判官話啲警察口供咁指Simon所講誠實可信（credible），立即傳召中國大使（outrage外交上用詞算幾硬），會唔會快咗啲呢？仲話外交部會安排Simon作為BNO持有人，去英國居留。好喇，到下晝保守黨嘅一班元老（Tory grandees）就出信比Boris Johnson話BNO現時嘅身份係歷史錯誤（Historic Error），應該重新審視權益。跟著，執政機會比較低嘅自由民主黨亦順應抽水，話如果執政嘅話會審視BNO權益。喂！班友約好㗎？
Simon嘅遭遇其實正正就係香港人最怕遇到嘅嘢，亦係整個運動嘅源頭（送中喎，行政拘留喎，老虎凳喎）。而佢嘅「口供」提到其他被拘留嘅疑似示威者、恐嚇送去「再教育營」（前兩日紐約時報頭版係咩話？）、被迫認成千張示威者嘅相（點得黎呢？係咪香港政府比㗎？），加埋呢個幾星期中大理大嘅新聞，就等如話比全國嘅國民知，香港人依家就好似Simon咁...
P.S. 外交嘅嘢識條鐵，只係知道係好巧妙、古惑同陰險，而呢啲就係廢國戰後嘅強項。8月尾嘅事，11月尾先講呢？仲要揀美帝過咗條Bill？聽講有一條話鼓勵盟友，尤其是廢國跟隨立法，係咪呀？
BBC獨家專訪Simon：
https://www.bbc.co.uk/news/world-asia-china-50457262
#可能或者另一個
#黎明來到
