《跌完未？彈完就真！》
尋日朝至今，我不斷重重複複咁提醒大家，科技股未跌完架，目前只係跌浪既反彈，千祈唔好俾佢呃到。我地唔會買、追或者溝，正路既操作係响上星期五，當恆生科指跌穿9360點收市前沽一半（因為穿就係穿，點都要防範free fall、頭也不回）另外淨返既一半等反彈完先清。
於是就有好多人問喇：到底彈到幾多先清埋果半？尋日，好多股份以及指數都係彈而收到陽燭既，正路陽燭會等多日，等彈到出陰先至清埋。所以，當今日恆生科指高開低走成6、700點陰燭，並再度失守返9360點收市前，你就應該走埋淨返果半，再唔係就開淡或者做反向對沖。
剛剛財經台有觀眾問：到底個市跌完未？我唔想盲目派定心丸。其實個市唔單止未跌完，仲要係彈完添！拿拿拿，我好公道既，陳茂波只係佔一小部分既利淡，最利淡既，真係個孳息。近日我都不斷強調俾大家聽：孳息會咬死人！仲有，你好應該配置一兩隻股黎應付呢個課題。
圖中，我想再嚇嚇大家：入面係proshares發行既債券相關基金，有辦你睇，隻基金既淨資產响過去個幾月由5億升到9億幾（講緊既係美金）即係有好多既資金押注緊孳息高企同加息等等概念。無論聯儲局既說法係點，市場先生永遠無錯，你絕對唔可以大安旨意話後市唔加息。
總結喇：科技股已經跌勢確立，恆生科指失守9360點之後，下望要睇到8394點。而恆指當然都唔可以獨善其身，失守291之後下方目標就係雙頂頸線282。內堂從農曆新年打後開始全倉舊經濟，月底前再買入左剛剛破位既中銀香港（2388）食孳息大勢。科技股粉絲自己睇路！
👋🏽
#科技股未跌完 #反而係彈完
#孳息仲有得升 #入定銀行股
#咪死牛一邊頸 #要識睇風向
