［半島鐵盒］大鄉里出城！數已找！生日大特價先住得起咋！兩千銀咋！
1. 之前講過( http://bit.ly/35X7b2o )，半島第三季出租率跌到35%，直迫沙士。留意呢個只係第三季，你想像到十月十一月仲大鑊，路邊社消息話十一月跌到20%
2. 亦都在嗰個post comment 提過，「不如我拎盒Donki吞拿魚去食」。咁埃汾呢啲，講得出做得到，就坐言起行（comment 會有埋吞拿魚圖）
3. 半島當然都不能坐以待斃，但講過幾次呢個劈價嘅問題，你估真係話除就除咩。你麻甩佬在側邊食花生梗係易。人地話晒近百年歷史，無數咁多人心中嘅best of the best
4. 實不相瞞，我在半島食過飯，甚至參加過巴士團（！）。但就真係冇住過。而家真係別人恐慌（？）時我貪婪。
5. 當然主要都真係，因為有大特價。因為好多時，別人恐慌時我冇錢。
6. 天地良心，半島賣晒廣告的。有生日優惠，1900蚊再加一。真係沙士價。其實沙士都冇去過呢個價。當然就只限生日，前後一日都得。原價係4600。人地做生意好老實，呢個原價就真係原價，唔係超級市場嗰啲根本冇出現過嘅原價。
7. 唔止，仲有蛋糕送。唔止，仲有埋late check out，去到第日四點。理論上你想舔到最盡嘅，第一日兩點入住，第二日四點走，26個鐘先2000蚊。一個鐘七十蚊，真係時鐘酒店都唔得。
8. 不過，壞消息係，去到12月11號咋下。因為呢個其實supposedly 唔係救忘大計，係周年慶。半島係12月11日生日。「咁當然啦，公司盤數都係12月結」
9. 12月1日，有人在whatsapp group講，話咁快今年又剩返一個月。我就足球小將上身，話，「錯，係仲有一個月！」。真的，你睇完可能鬧，剩返一個星期。但我就話你知，仲有一個星期。我相信係唔爆的（陣間話你知點解）。而如果冇記錯，星期六日都用得，係咪抵先？
10. 講明，以上全部自發，唔係幫半島賣廣告。半島未淪落到要搵我賣廣告。
11. 睇到呢度，可能有人問，埃汾唔係7月生咗日？做乜又生日？回教曆？答案係，我7月生日啫，埃汾太12月生日嘛。
咁我呢啲又唔係靚仔又唔風趣，唔玩直播啦。亦都費事大鄉里咁周圍影相（雖然我係，而我其實有影）。
12. 但真係要講，半島即係半島。我甚至唔講啲咩硬件之類。講真間房唔係我住過最豪嘅，更加唔係最大（唏，this is Hong Kong）．我在老撾住一千蚊晚嘅酒店，浴室都三百尺（好似），個廳大到我當勞蘇好似籃球咁掟去邊面畀囡囡都仲得。或者即使在上海，我都住過Ritz Carlton，當然係客訂，整間Suite畀我，我都唔知一條友訓三間房做乜。再退一萬步，馬交威尼斯人啲房都大好多啦。
13. 但啲軟件呀，設計呀，先係一流。會令你覺得，整嗰個，自己都住過，或者至少搵人住過。其他酒店？可能你住總統套房就有嘅，但普通房嘅，你根本懷疑，Design嗰條友自己都唔會住，老細亦唔會住
14. 同時間，入住時，更獲升級做海景套房。拿，呢啲就唔係假升級，因為海景房真係唔同錢。但亦都有理由相信，啲房其實都唔係太爆。加上我仲要十點幾近十一點先check in（忙呀大佬，去完兩星期東京函館仙台返嚟梗係做到仆街，冇睇黃子華？）
15. 再白啲，個marginal cost係零咁滯，豪畀你。同航空公司升你級差不多。所以我相信入住率仲係低。
16. 下個post會講埋個入住體驗，但劇透定，就梗係好啦。絶對物有所值。
17. 「更何況我只係畀兩千銀」
18. 美中不足就係我十點幾十一點先check in。食完蛋糕已過十二點。咁又點？咁變咗，到我再落樓下想去對面影返過嚟，已經熄咗啲燈飾。所以只得呢張唔太靚嘅相。
19. 所以呢，都係要及時行樂。兩千蚊半島呢啲，有今生無來世。
20. 最新消息，話會做到3月31號。咁大把時間了，唔使趕一個星期 （http://bit.ly/2qhtLUa）
