太耐無post,有點不知從何說起，不如就直接講啦。
我地終於BOOK到場喇。
九月壽臣，七場。
話說我地由疫情前甚至再之前，已經一直好努力嘗試book紅館。
入紙N次，彈足N次。
今時今日嘅香港，其實唔明文寫俾你知，你都知道咩事。雖然明知希望渺茫，機率少於零，但我地都一路死唔放棄，一路入一路入，由2019疫情前到疫情後都繼續入。每入一次，一個月後就會收到通知你申請被Rejected嘅信。
面對一幅如此模糊不清嘅高牆，如果話過程中完全無磨滅意志就呃大家嘅。
後來我決定唔好再俾自己困喺呢件事入面，開始轉移專注我嘅Membership site。慢慢一步一步啟動，慢慢聚集支持者。
直到四月我地開咗第一個online concert。完場後，上網睇返大家嘅留言，睇到歌迷們嘅感動同感觸，當中有支持咗自己二十年嘅人，亦有喺大陸默默支持唔可以露出真面目嘅菇徒。
當下我突然明白咗一件事。
原來我忘記咗，作為一個歌手，企上台唱歌，唔單止為咗自己，同樣重要嘅係為咗喺呢個困難時候需要我嘅聲音陪伴嘅人。
我一路俾自己目標中嘅地點情境畫面困住咗，忘記咗音樂真正嘅本質，忽略咗自己身位嘅最大能力。
其實要唱歌，唔一定要紅館㗎。
就係咁，我同Doo Manager講，不如我地盡全力搵場啦，唔好理大定細，總之有場就唱。
結果如預計中，反反覆覆好幾個場地因為各式各樣原因拒絕咗我地。有近年曾經做過嘅場館，都因為臨門一腳高層嘅各種恐懼而告吹。
正當我地臨近放棄，突然出現咗壽臣呢個一個禮拜嘅期。
如果係以前嘅我，會因為場地大小或者日子太短日期太近而直接跳過。
但諗一諗而家嘅環境同狀況，我同doo講，不如我地都係盡最後努力試一試啦。
結果，又真係俾我地攞到個期。
九月頭，一個禮拜，400幾人嘅場地，八成半。
做到最最最盡、做到我氣咳都只能有七場，2000張飛左右，一場紅館嘅兩成都無。
無贊助，連內部朋友飛都盡量留少啲，希望每一張飛都俾大家買到。講真條數真係難計到癲，但易嘅又幾時輪到你做呢。
總之我知道，今次會係我最珍惜嘅一次。
✨✨✨✨
後記：
「我繼續唱 繼續唱 脫下皮草繼續唱
沒華麗舞台 谷底照開張」
話說我時常會俾黃偉文晨咁早喺歌入面預言咗成個reality show出嚟，《千千萬萬個我》係咁，《鋼鐵》又係咁。
今日重睇呢兩句歌詞，終於入肉地明咗。
#hocclive2021
Photo by Jacky Lau - from 2019 NYC Live
千千萬萬個我歌詞 在 深海魚子醬 - 千千萬萬【動態歌詞】「這是千千萬萬 ... - Pinterest 的八卦
深海魚子醬 - 千千萬萬【動態歌詞】「這是千千萬萬萬萬千千個日夜 是我對你說不盡的思念」♪. ❖ 請訂閱 Angelic Music World ❖❖ Follow our Instagram: ... ... <看更多>