［行有行規，無論點你都要找埋尋晚嘅過夜數］明白嘅，有一早畀咗你啦。但近排肺炎，不如咁啦，拎啲息返去頂住先，嚟丫，粗粗地。唔該。（其實原本想用國產零零漆嘅圖，但本版作風，可以用其他圖就唔好用太常見嘅圖）
「又慢過馬交啦」「不過遲到好過冇到」。中銀香港供樓，可以6個月「還息不還本」，有機會可以extend 到12個月 (http://bit.ly/31tFlcU) 。不過應該按揭保險借八九成嘅冇，發展商二按嘅冇，仲要在中銀供咗一年以上，準時還款嗰啲。
「即係都唔會好多人受惠」。但埃汾就係其中一個！本人層自住樓（講到好似好多層收租咁，冇呀，得呢層）就係在中銀供。踢咗保（按保啫），超過一年，冇咗發展商二按。有得受惠
但有冇so？睇你點睇。
有冇睇以前（而家好似唔興）啲港產黑社會片？《旺角卡門》之類。大耳窿就去追數，搞一大輪大龍鳳，姦淫擄掠咁，然後呀主角幫靚女解圍，或者主角恩師幫主角解圍。呀大耳窿（肥狗或萬梓良之類）仲要咬住口煙拎住叠錢，好撚得戚咁：「好，乜哥有雷，我畀面呀乜哥」「哎唷唷，巧一對痴難怨女，真係令喎雀得巧緊動」（由金剛講可能最好）。「呢度夠畀丁咋！月底喎再嚟，到時卯錢你等收屍啦」「鬆啲們，喎地走，照支直落，喎嘅」「好嘢大佬」
希望冇理解錯，但，「還息不還本」，就大約係咁嘅事
自稱數盲嘅朋友問，咁係咪還多咗。可以話係。講白啲，你個個月只還息，咪即係6個月後，你仲係爭肥狗，呀，係中銀，咁多錢咯！咁你呢6個月啲錢去咗邊？咪鬆啲們直落咯
不過又另一角度睇，做生意嘅嘢，唏，跟我念一次（講過幾次了），buy low sell high pay late collect early avoid tax 嘛。「數期」呢樣嘢幾咁緊要，float喎，畢菲特都係咁發達咋，好似係。
再講白啲，錢，梗係在自己手上好啦。特別係最初做30年按嘅，鬼唔知係還多咗咩，鬼唔知供樓係幫銀行鬆啲們直落咩，但，攤長嚟玩，長命債長命還嘛。
而且，成日講嘅故事，心存樂觀：
個死囚同國王求情，話自己有特異功能。國王心情好，問，你有乜特異功能？死囚話我識教隻馬考CFA，畀一年我。國王話，好呀，就睇你點。人人都笑死囚低Ｑ能，一年後咪又係死。但死囚話：你點知呢？可能一年後國王死咗呢？可能一年後隻馬死咗呢？可能一年後我死咗呢？可能一年後佢亡國呢？或者，可能一年後隻馬真係考到CFA呢？睇日本故事都知，德川家康冇嘢叻，但等得，鬥長命。馬哈蒂爾都可以出返嚟玩。一日未死一日唔知邊個笑到最後
大吉利是，一個唔該，你兩腳一伸，就冇嘢要諗啦，係咪？
況且而家低息，真係唔怕攤長玩。分分鐘你慳到啲錢去買股票都有得執。不過當然唔會建議人唔供樓炒股票（其實你係等於加按炒股票，但息好平）
咁所以，你問埃汾，就真係覺得未必有用，可能都唔會用。準時供樓算。個個月慳咗幾千銀咪又係打多幾次邊爐。
不過，又唔好世界圍住你轉。咁有啲人，真係可能手停口停，呢幾個星期冇工開就冇工開，或者放無薪假 — 雖然我有啲懷疑，呢啲人最初係咪應該買樓。但你咪理，即係可能佢冇人工，齋畀息都仲畀得起，還本就有壓力
況且，由頭到尾，呢個係一個additional option，你覺得攤長還係搵笨實嘅，咪唔好理咯。唔係銀行迫你轉嘛。
但又不過，吾友 高天佑 （好嘢嚟的）早兩日先寫過，《澳門人最幸福》（http://bit.ly/2GY2pqK）。我見好多香港人忽然又羨慕澳門，很有喜感，明明天鴿嗰時先串人做帛金。
但少講政治（雖然都係政治），講返金融。明顯地，澳門做到，一來因為有錢（人均GDP高過香港），二來物業市場始終細過香港好多，三來基本上都係中資行玩晒—你見到了，其實係維穩
所以，香港呢？香港全不意外，係由中銀香港牽頭（呢個用字夠晒中資）。工銀交通嗰啲份額不大，暫且不理。你話冇政治因素？100%係政治因素啦，中央維穩。
咁我相信多數中銀嘅戶，就唔會介意嘅。咪好似萬梓良咁，「佢送錢我洗唔通我唔要咩」。況且，如果政治要好正確嘅，一早唔會用中銀啦。
問題係，中銀就維穩show．兩班人就唔知點諗了。第一，係中銀啲股東—阿大佬，擺明係he牲股東利益去維穩喎。雖則食得鹼魚抵得渴，但吾友話頭，「你條鹹魚越食越鹹喎！」。另外，咁大家都知中資銀行向來都有「政治功能」，但，中銀香港始終畀中國銀行好啲，好啲啲嘛（你睇股價表現都係）
仲有，其他銀行又點算呢？真係多得你唔少。跟？你有阿爺做後台，我冇喎。做乜要無啦啦自閹？你話流失客，照計就唔會嘅。中銀都要做滿一年嘅客先得，即係我供開恒生總唔可以話 喂中銀可以畀我只還息喎 我轉過去啦—你唔係即時有優惠嘛。
但，就難免有人會出嚟加把嘴，嘩，恒生匯豐花旗呢啲，仆街銀行呀，唔顧客戶生死呀，又唔係叫你減息又唔係唔還畀你，叫你遲少少收都唔得，呢啲時勢都仲掛住賺錢，不近人情呀喂，「其實攤長嚟還銀行仲so啦」。Just saying
所以呢，我同意高兄講法，呢啲先例真係唔多好。不過雖則我係右翼，但明白嘅，中華人民共和國香港特別行政區嘛，係咁架啦。
（最新見東亞恒生已跟，人地真係多得中銀唔少）
