農曆年我間中會割吓水仙球，但係就年年都插劍蘭，所以每一年都會為尋找盛放的劍蘭而努力。
今年凍左好耐，所以啲劍蘭都唔係特別靚，仲好貴添，賣到＄25一枝。喺元朗花場買都要 $25一枝，唔知花市賣幾多錢呢！（我年年買嘅劍蘭都係好多花蕊，朵花好大同埋好壯㗎。）
入得元朗，就梗係要食番碗永年車仔麵啦！嘩，都有好幾年冇嚟囉，知就知佢改咗門面，但係就唔知佢變得咁摩登同埋咁有型，如果唔係門口仲有條長龍真係驚佢賣咗盤。
環境係乾淨咗並且骨子咗，但係買車仔麵嘅時候用咗電子落單，就冇咗以前果種對住一格格食物逐樣叫，並且睇住佢𢳂嘅風情。
之後一人一個小托盆裝住一碗麵同埋飲品非常齊整，睇真啲個托盤仲刻埋鋪頭名添。
三餸一麵＄33唔算特別貴。我叫嘅係蘿蔔、貢丸、魷魚、油麵、小辣。貢丸幾好味，蘿蔔冇咗以前果種爽脆，記憶中小辣已經辣到成個頭皮都係汗，所以我飲第一口湯嘅時候係好驚嘅，點知... ... 都唔辣嘅！唔知係咪為咗遷就大眾嘅口味呢！
#何嘉麗CallMeGaGa #何嘉麗 #劍蘭劍蘭幾錢枝 #永年士多 #車仔麵 #元朗 #為食路上 #各位元朗嘅朋友你好
