你有冇捱過窮？又係點樣撐過去？
初初出嚟做嘢，人工真係好低，自己一個住又好大生活負擔，扣完所有基本開支，唔計住嚟用係冇可能捱到月尾。
當時住嘅地方樓下有一檔專做小菜嘅舖頭，我晚晚都聞到佢哋嘅食物味道，有時係蛋嘅香味，有時係啲乜煲物煲嘅肉味，就連普通炒菜嘅氣味我都清楚聞到。佢哋門口仲會擺幾張枱，我喺樓上望落嚟，可以見到出面嗰幾枱人食緊乜。
因為窮，我大部分時間係食麵包，仲要係排包，即係買返嚟已經有六片黐住嗰種，全日就係食佢，每晩聞到樓下啲餸菜味都會覺得好肚餓，排包食完，我會食花生醬，你哋細個有冇試過用匙羹齋食花生醬？小朋友嗰陣係貪得意，大個仍然覺得好食，但嗰段時間我係用嚟充飢，因為花生醬其實好飽肚。
已經數唔到幾多次，我喺上樓之前會望一望佢哋個餐牌，心入面計咗一陣數，諗諗下都係食唔到。
喺呢個地方住咗一年，我從來冇食過呢檔小菜，真係食唔起，後來搬走咗，亦轉咗好多次工，份糧終於返到合理水平，唔係大富大貴，但起碼食餐飯唔使勒緊褲頭。
相隔好多年，早排我去返當年住嘅地方附近，呢間小菜仲喺度，咁啱好肚餓，諗都唔諗就入去食，食下食下唔知點解好想喊，原來唔好食，所以一啲感動都冇，反而有種好可憐嘅感覺，我諗起當年嘅自己，嗰種辛苦好似只係噚日嘅事，因為捱窮嘅時間實在太長太耐，一個後生仔只係想食一餐咁普通嘅飯，竟然要咁多年後先至可以做到。
我哋唔需要餐餐大魚大肉，只係想有能力去選擇，努力一生，都係想做個普通人。將我咁寒酸同失禮嘅故事分享出嚟，希望每一位艱辛拼搏緊嘅你，可以選擇自己想過嘅生活。
