【長文慎入：有關我點睇612基金同埋人權律師】
過去一年，累積左二千幾位被告手足，大家都唔多唔少有申請法援既經歷，但法援署就話後生律師無經驗，唔比無打過暴動案既大狀，透過法律援助計劃代表被告。
結果，依家既情況就係，即使理論上法援獲批都好，都可能政府亂派唔知乜野立場取態兼經驗既律師代表手足，分分鐘手足本來可能有贏面都變輸。
法援署當然係仆街，但又的確，2019年前既暴動案被告，基本上只得魚蛋革命，一定唔多過60人啦，打過暴動案既大狀真係得十幾個左右，但目前已經有至少600位手足被控暴動；
又好老實講，若果你係600份之1，將心比已的話，你都一定會想代表你果個律師，本身有處理暴動案既經驗，而唔係新手上場，第一單就代表你自己。
【咁，點樣處理「有600個暴動案新被告，但得10幾個律師曾經打過暴動案」既情況呢？】
612基金既處理方法，就係用低於市價既「法援署」價錢，幫手足請「第二位律師」，等一班肯接手足案件既後生大狀，累積打暴動案既經驗，希望等佢地日後可以透過法援署，拎公帑代表手足打官司，呢個就係我對事件既理解。
當然，如果法援署當初肯批「一個被告有兩個大狀代表」既安排，就一天都光曬，612基金連呢個計劃都唔洗推出；正如我以前被告重奪公民廣場案同埋雨傘佔領旺角案呢，法援全部批曬架，仲批埋兩個大狀，一個資深大律師加一個後生大律師同時代表我。
但大家都知，今時已經唔同往日，法援批核越來越緊，收窄到痴線既程度，近排瘋狂做政治審查都預左，資產審查既程度，仲無聊到都連我銀行戶口有$6000 cash out去買iPhone，法援署都特登問我提供埋單據。
【但明明有612基金，律師點解仲係咁叫手足去申請法援？】
呢個問題，查實真係簡單到不能再簡單。你話啦，用民主派既錢（612基金）去出糧比民主派律師幫手足打官司，定用政府錢（法援）去出糧比民主派律師幫手足打官司，會更加好？
答案當然係後者，而前者都係等法援唔批，同埋法援cover唔曬所有律師費之後，先由基金盡量補貼。用政府錢，一定好過用民主派既錢，但呢個都解釋左點解法援署班藍絲，呢一年幾以來好想不斷收緊個批核準則。
即係我觀察幾年以來，有政府公帑錢，民主派律師一定拎（喂，我地唔拎就留返比政府藍營律師拎，咁梗係拎啦）；如果無法援但有基金錢，佢地都會想claim，咁點解明明叫做「義務律師」又要claim基金同公帑？
我理解係律師樓交租真係好L貴，例如打一單暴動案審二十日，個律師成個月真係要星期一至五既朝九晚四都坐喺法庭，果個月完之接唔到其他商業民事案件，零收入但又要白交租兼出糧比秘書，確實係難搞唔掂。
不過，如果係有樓揸手兼上曬岸既資深大狀，唔再洗幫自己讀國際或私立學校既仔女供書教學，的確就真係會完全義務，一蚊都唔收又無乜所謂，呢種就真係完全義務律師啦，不過現實係數量真係唔多。
另外，有一點可以補充。據我既了解，刑事案件既法援價係低於市價，而基金提供比律師個價都係緊跟法援，所以律師如果要賺大錢，一般來講都係做商業同民事訴訟案件，例如爭產案先有得發大財。
呢個時勢，香港倒退到大陸咁款，分分鐘遲下有一日拉完手足到律師，好似大陸咁拉完維權人士就拉維權律師；所以肯幫手足既律師，整體來講我都覺得真係好唔話得架啦。
【咁人權律師係咪一定唔會要手足自己比私已錢十幾廿萬咁打官司？】
睇到呢度，可能大家覺得我處處維護基金，又幫班律師解話，講到除左claim法援同基金之外，人權律師都盡量唔會真金白銀咁收手足錢，呢個雖然係我一般慣常既理解，但係咪真係咁好，完全無仆街律師？
答案係，當然唔係！我試過俾律師行追收三十萬律師費。
2017年8月16日，於上庭及坐監前一晚，我就俾韋智達律師call去律師樓，同我講話要我比六位數字律師費，我話果時羅冠聰被DQ無耐，眾志幾個坐監兼十幾人一齊失業，真係搞唔掂。
啊，呢個人權事務律師行老細當時就話我好出名，所以竟然坐監前一晚叫我搵人籌錢，我心諗聽日都坐監又唔知坐幾耐你仲好意思提；當時佢仲在會議室點埋名，提議我叫余若薇捐錢比我，真係不得了。
據我了解，雨傘運動同期被佢代表既知名手足，都有被佢追收六位數字既律師費；而我去到2018年坐完監出來，案件告一段落，個律師樓仲去信要我還錢，金額係三十萬律師費，直至反送中運動前都仲收到信……
總括來講，人權律師當中樹大難免有枯枝，但整體而言都好唔話得，尤其呢個時勢，香港倒退到大陸咁款，可能過多幾年之後，就會拉完手足就到律師，好似大陸咁拉完維權人士就拉維權律師。
至於基金狀況，唔同人有唔同睇法，有人話唔應該浪費錢比錢基金課金比律師，有人覺得直接比錢手足就最幫到佢地，查實呢方面都無絕對既答案；而且，我有時都會覺得，作為二千幾個被告之一既當時人，可能睇個角度同無案既大家，都未必一樣。
總之，自己從幾年前就同各方人權大狀律師打交道至今，於各種質疑同指控當中，純粹希望提供一下自己既想法，感謝大家用幾分鐘睇完呢篇野。
公民廣場案 在 公民廣場案覆核刑期、如何面對三權合作- 17/08/17「城寨特備 ... 的八卦
「城寨特備」主持：劉細良題目：《公民廣場案覆核刑期、如何面對三權合作》 ... <看更多>