梁烈唯：「你十年前無 hi 我！」
近排好興 “10-year challenge”，即係將自己十年前嘅相同今年嘅相做對比，張繼聰琴日都潮玩，點知原名”梁烈唯”、曾改藝名”梁烈維”、暱稱”唯唯”、讀音”唯萎”、英文名”Oscar”、被稱”負評王”、新名”梁競徽”、新暱稱”徽徽”、被網民讀成”勁廢”嘅唯萎，深夜喺張繼聰呢個十年 post 怨婦式連出三個留言，講嘅原來係十年前無人知嘅事……
據唯萎指，話說十年前，佢喺 tvb 走廊撞到張繼聰，唯萎仲特別強調當時係夜晚，但張繼聰室內戴住黑超。就係呢個迎面相遇嘅 moment，唯萎同佢點頭 say hi，張繼聰掂行掂過，so 都無 so 佢就走過咗。
唯萎話：「當時我好難受！」原來呢件事，佢一直擺喺心度。但到琴日，唯萎終於明白張繼聰當年好大壓力，仲話覺得佢而家好有自信好有魅力，好替佢開心喎。
唯萎連續留咗幾個留言，睇嚟有人唔同佢 say hi，對佢打擊真係好大，記足十年。對此，張繼聰都好無奈，話：「應該純粹係發雞盲😅🙏🏻」
#你2004年8月6號下晝3點16分無同我講唔該 #JM9 #你十年前無hi我 #我嬲嬲 #張繼聰應該成頭黑人問號 #唯唯唔好嬲
