【等我！我逐個Message覆緊架喇】
有個朋友早前去見工，臨近尾聲嘅時候，對方就問佢：「你有咩問題想問返我哋呀？」
朋友諗起之前睇咗某求職網站嘅文章，類似啲咩面試貼士之類，咁就學以致用啦：「唔...我想問下你公司未來5年有咩發展大計？」
對方咁樣回佢：「小朋友，你係咪上網搵埋啲公式問題呀？其實我公司得10個人，坦白講吖，下年係點都未知，我點答到你5年後咁耐嘅嘢呀？」
其實呢個一直都係《辦公室日報》存在嘅原因同價值，我都係打工仔，亦試過見工失敗、冇晒方向、去咗黑心公司、撞正變態老闆，有時真係好無助。
我曾經做過一間公司，佢哋有個條款係兩年內辭職，就算一個月前通知都要賠一個月人工，我打去勞工署問，對方咁答：
「勞工法例就冇講明既，但係佢加咗喺合約裡面，呢樣就叫合約法，我哋答唔到你，你要搵返啲法律界人士問下。」
我嗰一刻淨係覺得，咁勞工署係做咩架？唔通我搵律師呀？我打工仔嚟咋喎。
有人話《辦公室日報》好粗俗，但我就係唔想寫埋啲咩十大見工必問嘅問題、五大乜乜物物，因為呢啲通通都係讀死書，與其粉飾太平，不如講下啲貼地資訊啦，所以我實在要多謝你哋，若非你哋逐個逐個Like咁支持，我都冇動力去做好《辦公室日報》。
如果你send過Message畀我而又未見回覆，只係因為Message太多，但我一定會全部覆晒，記得等我！！！假設真係過咗好耐都未有反應，唔使怕醜，打個Re-send，以免啲Message石沉大海，我每日都會抽時間坐低睇下你哋邊個Like咗我，邊個Message我，有圖為證架，雖然幅相就影得刻意咗啲😅😅
