有日，診所冇咩人，我喺度執吓文書嘢...
一位女士嚟到診所。
佢用沙啞到近乎冇聲嘅聲嗌我：「姑娘？」
我：「係？」
佢用盡力開聲，好努力咁講：「我。想」
我：「你係咪好辛苦呀？不如你用電話打字俾我睇或者寫俾我呀？唔駛急，慢慢都得」
佢突然企喺度喊咗出嚟，啲眼淚湧晒出嚟...
我遞上紙巾：「做咩事呀？你行去坐低先啊，我轉頭出嚟，你行唔行到過去？」
佢拎住紙巾點頭。
我執埋啲手尾行出去，見到佢仍然低頭喊緊。
我行埋去坐低：「你點啊？要唔要飲水？斟杯俾你？」
佢擰擰頭。
我：「嗯～你有需要話我知，你想講都可以講我知」
佢用電話輸入文字『你唔駛做嘢？』
我：「都冇其他病人，你俾我坐喺度睇吓電視啦」
佢同我一齊抬頭睇電視，就咁過咗十分鐘左右，佢又突然喊起上嚟...
佢似乎覺得入嚟淨坐淨喊唔睇醫生非常唔好意思。
佢用電話輸入文字『對唔住，搞到你，我係想睇醫生』
我：「醫生喺入面嘅，佢都好得閒，你覺得OK嗰陣先睇都得，唔急呀」
佢用電話輸入文字『我唔開心』
我：「我知，你講唔講得俾我知你唔開心啲乜？」
佢用電話輸入文字『失戀』
再輸入『我已經喊咗兩日』
我：「你有冇食嘢？想唔想食零食呀？熱浪？呀！唔得喎，你失聲喎，食完仲火辣辣。糖呢？朱古力呢？我有好好好多喎，唔食嘢會冇力...」
佢冇出聲。
我：「唔出聲當你食！」講完就行返入去拎零食。
我拎住零食：「食啲呀～好嘢嚟」
佢勉強笑笑點頭。
我：「傻妹，唔想笑可以唔笑，你想繼續喊都可以...唔好勉強自己」
佢用電話輸入文字『醫生會唔會覺得我咋病呃假紙？」
我：「醫生唔係神醫，唔會一眼睇穿你有咩事，你講俾佢知你感覺點，邊度唔舒服，直接講就得。」
佢用電話輸入文字『我咁樣會唔會唔算病』
我：「有冇病就等醫生診斷啦，你直接講出你嘅感覺就可以啦，唔好收埋收埋。香港地其實都幾好，有好多專業嘅都可以幫到你，最緊要你肯求醫」
佢拎出身分證，用手勢示意OK。
我：「咁你食住等嗌名，我入去嗌醒醫生」
診症後，醫生都開咗開聲藥同病假紙俾佢，同時都寫咗轉介信。
離開前，佢用電話輸入文字『多謝』並緊緊抱住我...俾佢嘅零食...
其實係我要多謝你願意講我聽願意嚟睇醫生，多謝你俾自己另一條出路。
#世上有好多款零食 #有朱古力有糖有薯片 #仲有好多味道 #醫生雖然唔係萬能 #但都有啲用嘅 #希望你哋身心健康
