［請假攻略］人妻先生教你請一日放十日！
首先，你要喺英國返工先。
其次，係你呀頭尋日已經收左爐，臨走前叫大家聽日起直到一月，全體自由home office，即係進入待命模式，公司唔搵你，你就唔好搵公司啦。
而我禮貌上，都象徵式地請左一日假，所以就變成「請一日放十日」了。
可能你會問：下？自願嘔一日假出黎咁蝕？
係呀，因為啲假多到可以拎去堆填區。
英國雖然全年只有八日bank holiday，比香港少得多，但係法律規定所有人每年都可以放廿八日假，換句話說，最最最刻薄的公司（例如我上一份），都要俾足二十日有薪假，再加八日銀行假，所以計落並唔輸香港架。
黎到新公司，我公司一年係有三十日假，外加八日銀行假，就係一年三十八日，呢件事真係誇張到可以用「喪盡天良」黎形容。可想而知，根本放唔曬三十日，所以今個聖誕，我豪返一日俾公司又有乜所謂？
我好記得，以前在香港剛畢業時做某教育公司，得十日年假，其中三日仲要新年迫你放埋佢，不過老闆很佛心，你做夠（生存到）三年就可以多一日，最多可以累積到十五日，我簽約時心諗：你過多兩年唔執先算啦！
依家諗返轉頭，真係覺得自己好叻，竟然可以咁都頂到。但係我會唔會同班後生講：我舊時呀...(下刪一萬字），因為我知道舊時那是病態的，既然舊時唔好，現在就更應努力去改革，如果公司的盈利目標比上年更高，點解員工的待遇不能水漲船高？
對了，聖誕節我去德國探岳父岳母、下個月我請兩日假飛去南法松露節、四月底返香港探親、五月中去克羅地亞搵食材。慘了，原來未plan2、3月去邊度旅行，點算好？
#我又飛啦
#英國人工高唔過香港幾多
#但我真係覺得自己係一個人類
#依家睇香港公司招聘話十四日年假係好福利
#真係有種淡淡的哀愁
#而有人竟然仲可以放唔晒
#難怪精神唔健康
