「聯名戶口這回事」
極度懷疑，聯名戶口呢家嘢，當初肯定係女人發明嘅。
肯定係。除非唔係。
每個男人，一世至少會遇到一條要求同你開聯名戶口嘅女朋友。正如撞鬼一樣，世上只係分兩種人，一種係已經遇到，剩返果種，唔係冇，只係你未遇到。
我讀男校出身，一世遇過嘅男性朋友超過一千，從來冇任何一個，曾經主動同另一半講，BB我哋不如開個聯名戶口咯……
冇。聯名戶口呢家嘢，係女人發明嚟綁住男人，令佢哋有安全感嘅工具，或者道具。
當佢哋愛你愛到想同你有將來，就會開始旁敲側擊，軟硬兼施，游說你同佢一齊開聯名戶口。開聯名戶口，係大家個名出現響同一個戶口，一齊儲錢，一齊為將來幸福努力嘅節奏。
女人分兩種，一種係一齊咗一段時間，覺得呢個人啱啦，想同你有將來，先同你開聯名戶口；另一種呢，係有理無理一拍拖冇耐就崑你同佢開聯名戶口，只係為咗測試你肯唔肯從此被困，容唔容易被操控，因為女人好明白，男人一有錢就身痕，mon住佢戶口，佢唔敢亂嚟，有咩依郁，想講分手，有個聯名戶口響度，想撇都冇咁易……
不過有時又唔怪得啲女仔嘅，大部分男仔，月薪已經唔高，仲個個月洗晒份糧，唔開聯名戶口迫佢儲錢，真係唔洗旨意有將來，就連一齊儲錢結婚租樓住，少少尾燈都望唔到啊……
講真，如果呢個女仔係啱嘅，開聯名戶口，成為經濟共生體(Venom！)都係遲早嘅事，早少少開聯名戶口，可以睇清楚呢個人嘅理財態度，我有麻甩朋友哭訴開咗聯名戶口之後，條女仲惡過老媽子，個個月出糧第二日就問佢入咗錢入去聯名戶口未，但大半年過去，有日朋友心血來潮打簿去Check，先發現條女原來從來冇擺過錢入去，都不特止！仲偷偷轉咗啲錢去還自己張卡數！佢問條女搞咩，佢話反正啲錢都係大家，過住數先遲啲入返去囉斤斤計較！咁小器係咪男人嚟㗎！
如果大家都有擺錢入去，當然唔可以咁計，但如果只係得其中一方擺，另一半冇付出仲負責洗，咁仲稱得上係大家一齊灌溉培育嘅幸福將來嗎？咁只係以愛之名搵人笨咋吓話？
我個麻甩朋友聽完，決心自己開返個個人戶口，自己血汗錢自己儲返，但因為近排太忙，冇時間再搵間銀行排隊開個人戶口，我同佢講，今時今日開戶口洗咩仲要親自排隊咁老土㗎……
渣打銀行最近推出咗手機開戶，唔洗去銀行分行排隊都開到戶口，方便快捷，可以隨時用手機Check住結餘，新客戶係推廣期內仲可以有2%嘅儲蓄年利率優惠，用埋戶口出糧仲有額外6個月利率優惠添，到時唔使俾條女用自己啲血汗錢之餘，仲可以賺多幾厘息，啱哂我哋呢啲怕麻煩嘅男人。
