夏天，為大地帶來intern，疏導煙腸，需要得閒嘅人妻先生。就係咁，由於我平時真係得閒到出晒面（這個人真的太糟糕了），我就代表我條team同呢班金融煙腸打交道。
同煙腸打交道，對好多人黎講，係一件好痛苦的事情。一方面入得金融界的intern都係千裡挑一的天之驕子（唔係講緊倫敦金嗰班MK仔），個個都係名牌大學，自然心高氣傲。但另一方面，他們缺乏社會經驗，任期也短得難以委託工作，能夠做的事非常有限，委派太簡單的工作，他們會嫌白癡；但太難的，他們也馭駕不來。當然，由於他們可能是將來的同事，我們也肩負推廣公司形象的職責，所以就算他們再離譜和「天馬行空」，我們都會很有耐性的教導。
好聽講句，就係「過門都係客」，難聽講句就係「話你on_怕你嬲」。
有啲煙腸有鋪開會癮，明明可以電郵講，都係死要攝你半個鐘。你知啦，我地呢啲走虛偽路線的manager，見親面一定會噓寒問暖「做得慣唔慣呀？」、「覺得我地公司點呀？」、「有咩可以幫到你呀？」、「我請飲野呀下，你地飲咩呀？」吹多兩句，例牌咁就唔見左一個鐘，做唔切野事少，我無左個coffee break事大啊！
話說我遇過幾個煙腸，都算幾夠薑，唔識對方未打過招呼就約人開會，仲要即興約半個鐘後。喂大佬，你估人人即刻check電郵架咩？就算即刻睇，你都俾少少時間人地準備下，安排手頭上的工作。你又冇agenda咁點搞啊？家陣開會，你以為開波「Fun now?」咁咩～ 撞鬼～ 結果又跑來問我為什麼別人不受約，我都推你啦！
講起開會，真係把鬼火，好啦，約開會啦，無端端開會前一分鐘先黎取消。取消都唔緊要，大家都好忙，有急事大家都理解。但係你應該都講聲點解取消，講句唔好意思，再約咪得囉，禮貌同交帶就係咁簡單。但係無架，取消就取消你，仲惡過我大波士。呀仔，你大枝野，但其他同事又何嘗唔係洋腸？你係the chosen one，難道個個manager 同director 又唔粗咩？拳怕少壯，但棍怕老郎，我係你就唔會咁樣同人格劍啦。
好啦，無故取消都算啦，兩個鐘之後，呀頭轉寄左個會議邀請過黎，comment 係一句：What?!
原來佢地再即興約人開會，時間係傍晚五點... 你知道鬼佬係四點九執野、五點鐘走人架嘛？邊個同你OT開會？真係鬼同你OT... 好學唔學，學埋啲香港老闆嘅衰野，咁梗係又俾人鬧爆啦。
到最尾我終於頂唔順，坐低同佢地講：其實約開會，你需要預先問人，俾幾個slot人地揀，人地揀左你先再發邀請。取消會要同人講聲唔好意思，你約朋友放飛機都會道歉吧？開會時間唔好揀12:30同4:30，人地趕住走就唔會認真答你問題，出黎做野都係求解決方法，方便人即係方便自己呀...
以前做細，邊有人捉住隻手教？我試過book個senior 五點半開會，結果？佢改左時間做晚上八點半，我焗住坐到八點，佢先黎cancel個會，我咬佢食咩？不過撞完板下次咪識囉。無架，煙腸仔始終係黎學野，就算有時係好激氣，但都要教好佢啲business manner，做一個有品嘅人。長江後浪推前浪，我D7死佢地容乜易？但終有一天，我們還是要交棒給他們。我只是希望他們無論將來去邊度做，都不會為其他人帶來麻煩，咁已經好好架啦。
#好彩係隔離team
#一早話左唔要煙腸
#煙洋腸都唔要
#你當我仲唔夠多仔要照顧呀
#人妻先生好忙架
#我淨係識教待人接物
#其實代人接吻我都好擅長
#可惜呢個技能唔可以寫落CV
#配圖係洋腸派對
