記得立志出書，係15歲時嘅事。
當時睇完金庸嘅《連城訣》，心血來潮，就拎起本習作簿寫武俠小說。係，係有啲老土，不過未係最老土，因為最老土係我真心想做一個作家。
接下來嘅日子，我不斷睇書，寫嘢，睇書，寫嘢，就係為咗有朝一日，可以有本屬於自己嘅作品。
曾經，我試過喺facebook開Page，無論寫成點，換幾多橋，甚至畫畫，Like數最多得幾十。試過周圍send訊息叫朋友幫手些牙，亦聽過「我已經幫你Like咗，仲想我點？」
曾經，我試過喺網上幾大論壇寫小說，無論寫成點，就算內容夠激，粗口夠勁，就算試過200正皮，仍然冇人搵我出書。
喺咁hihi嘅情況下，連我自己都覺得︰「喂，阿泰，你啲文可能真係唔掂當喎。」
但係我冇放棄寫作，就同我從來都冇放棄媾女呢個偉大夢想一樣。(呢度，再一次多謝 偽文豪，係佢同我講︰「你啲文係掂的，畀啲自信。」)
最後我決定入紙 100毛，應徵做編輯，希望近水樓台，可以搵到機會出書。
邊估到我竟然幸運受到三位腦細同content manager Johnathan賞識，無端端做咗 專家Dickson，參與幕前演出，又多得你哋畀臉，接受我嘅冷(懶)演技。
不過，我心底裡仍然記得：我係嚟寫嘢嘅。腦細S亦清楚明白我鍾意寫嘢呢個事實。
終於，佢哋幫我出人生嘅第一本書《愛情的二十二道陰影》，喺今年書展出。
冇錯，我用咗15年時間去實踐呢個夢想，係耐咗啲，但總算成功咗。
多謝腦細們 林日曦、陳強同 Bu Iu幫我完成呢個夢想。
至於本書講咩，我可以講嘅係︰另一個 專家Dickson非常努力，但仍然未完成嘅夢。
