阿明心諗估唔到原來交友app識啲女都幾主動，Theresa星期五生日，見都未見過，佢竟然約自己當晚到諾仕佛諾單打獨鬥，本身剩係期待一吓都扯扯地，但阿明望真啲佢相約見面嘅地點，好似有啲唔對路，唔係餐廳嚟喎，竟然係剛復業嘅酒吧，即係代表咩？即係想去就要打疫苗。
阿明想問清楚Theresa，Theresa表示自己已打了BioNTech，乜你仲未打咩？佢反問返阿明，阿明只好硬住頭皮話自己當然打咗，到時見。
阿明心情忐忑不安，本身諗住去媾女播種，無諗到自己最後係要去接種，不過往好嘅方面諗，Theresa當晚極有可能係想搵一個百分百安全嘅男人轟轟烈烈渡過一個夜晚，社交可以有距離，但性交是沒有距離，對象當然是打了疫苗的好。
阿明上網預約接種疫苗時卻晴天霹靂，佢發覺星期五前BioNTech嘅預約已全部額滿，相反科興的疫苗係放題式嘅任你約任你打，但嗰刻嘅阿明覺得無選擇餘地，佢選擇咗科興。由申請預約科興個一秒開始，佢就對呢個世界多咗一份依依不捨，半夜不時回憶童年嘅點滴，甚至考慮過是否應該寫遺書，但經過咗一晚，性慾還是戰勝了恐懼，第二日，他喺街口遠望住嗰個已變成社區疫苗接種中心嘅體育館，然後喺褲袋扲咗包威豪出嚟，點起咗支煙隊咗幾啖壯膽，然後就頭也不回走入接種中心。
晚上九時正，阿明準時到達酒吧，酒吧除咗職員外空無一人，阿明隨意揀了張大梳化，但等咗半個鐘都仲未見人，阿明開始有啲焦急，但好彩嘅係，呢個故事並唔係好老土咁主角又比人放飛機，Theresa終於到咗，佢吊帶短裙，一身惹火打扮，絕對有備而來。
Theresa喺酒吧門口已見到阿明，佢甜笑起上嚟，阿明禮貌地揮手示意Theresa過嚟，點知佢喺門口被職員攔住：「小姐，你要嘟安心出行。」「可唔可以填紙仔?」「而家無紙仔填。」「我無裝喎，咁點算」「咁請你裝返。」阿明見唔對路，立即上前睇吓有咩幫到手，Theresa問：「點解你會入到嚟？」「因為我有嘟安心出行。」阿明答。Theresa臉有難色的再問：「安心出行你都裝?」「我科興我都敢打，裝安心出行有咩問題? 知我咩料啦！」阿明只係有話直說，奈何Thersea 嘅反應係用手掩面，然後搖住頭，轉身離開。
阿明無離開到酒吧，佢返埋位，仲block埋Theresa 嘅whatsapp，呢個臭西，我為咗佢打科興，佢竟然連安心出行都唔肯裝，阿明心諗。時間係九點半，阿明仲好樂觀，望住空無一人嘅酒吧，佢覺得只係啲客人未嚟，如果呢個晚上，只要有一位單身女客人入嚟，一定會係自己嘅獵物，又肯打疫苗又肯裝安心出行，一定跟自己一樣有一些苦衷，有一些故事，大家同是天涯淪落人。
時間係兩點鐘，酒吧直至閂門嗰一刻，除咗阿明之外，係一個客人都無，醉醺醺嘅佢，就係唯一嘅淪落人，離開酒吧後，佢獨自喺後樓梯嘔吐大作，或許是嘔出了打針前吃的早餐而堵塞了氣管，或許是因為仆落樓梯，總知阿明很快就休克後死亡，佢嘅死一定唔關科興事，如果硬要冠以一個死因，佢死因就係衰咸濕。
交友app block 人 在 交友app睇完相今次係我想block佢- 港澳感情事板 的八卦
... 交友app好少問人幾高幾重 之後一問佢原來佢170 個一刻，我想block佢，因為佢仲未出樣個陣，係咁講話「之前有女仔想約佢佢一睇完相就block左人地 ... ... <看更多>