【由好愛到唔愛，原來個過程可以好簡單】
曾經好迷五月天。
迷嘅程度係，首首歌都識背識唱，每隻碟啲歌連排序都記得晒，所有歌嘅chord都識背晒。
由佢哋2006第一年紅館開始睇，好記得周華健陳綺貞做嘉賓，仲要encore完再encore，簡直係前所未有嘅震撼； 之後每年一次入紅館一期一會五月之約，有幾年完咗場仲要如撞邪般全場大合唱《牙關》叫返佢哋出嚟encore； 當年更加係當《倔強》、《憨人》、《一顆蘋果》係打氣歌咁捱過會考A-Level。
就係咁，被五月天佔據了青春。
然後突然某一天，忽然覺得：「乜啲新歌咁難聽！」唔係一首，而係接連好多首，套路一樣，罐頭式編曲，歌詞重復，由感動到毛管戙，變成老土到打冷震；演唱會無啦啦會放隻變型金剛出嚟、又或者失驚無神放幾條繩出嚟同你扯大纜，真係嚇一跳得啖笑；最慘係啲Talking， 冇誠意到年年一樣都算， 唔好笑到尷尬級別打斷晒個氣氛先至死...其實年紀大咗要換位回氣，真係情有可原，但其實真係寧願你cut短個rundown，好過唱到一半出嚟講一大堆廢話，搞到冇咗個氣氛。
於是由當年佢哋未紅時係咁叫人一齊去睇，到紅咗之後年年撲飛，再到呢幾年紅到發紫，但係完全唔想睇。五月天就係咁伴隨著我的青春，一齊消失在我的人生。
到今年，睇到個Run Down，舊歌放題；又喺迪士尼，完場時間啱啱駁到起飛時間；仲要有平價黃牛，事隔幾年再一次入場，但結果，都係失望嘅。
失望在當年嘅歌再聽唔出當年嘅感動；失望在舊歌換上新編曲，秒速變老土；失望在talking依舊趕客；唯一比幾年前好嘅係，終於識tune低返啲歌，等阿信冇咁易走音。
又或者，其實唔係佢哋變咗，只不過係我變咗，喺漫漫長路裡再跟唔上佢哋嘅步伐。
「有沒有那麼一種永遠 永遠不改變」
答案可能就係冇。
一晚飛機，我都喺度諗呢個問題，諗返起成世人，暫時真係可以永遠不變咁去愛嘅，只係得返2樣嘢。
而我好希望，亦都會好努力咁令呢2樣嘢，可以永遠不改變。
