【做乜特別《蝙蝠俠：黑夜之神》要睇IMAX？】
有讀者問我呢個問題，都唔明點解特別係呢套IMAX版，喺影迷心目中特別有意義。即係咁，我唔會力sell你一定要睇《喋血戰士》或《重案夢幻再重組》IMAX，因為佢哋唔係為IMAX而生囉。
事緣IMAX呢味嘢，原本只係用嚟拍紀錄片，去呈現外太空、海底、國家公園浩瀚景色－－即係你太空館睇果啲，直至《阿波羅13號》成為第一套用IMAX後製嘅商業電影，先至正式將IMAX推入商業戲院。早期IMAX電影唔多，都唔多套套九唔搭八變IMAX，比較經典例子係《星球大戰前傳：複製人侵略》因為技術問題，IMAX得120分鐘，比公映版本短。唔少星戰迷覺得IMAX仲好過公映版，冇咗咁多冗長地方。當年香港仲未引入IMAX，無緣欣賞，唔知有幾大分別。不過，千禧年頭呢堆戲，只不過係IMAX後製電影，冇用到IMAX機去拍。
《蝙蝠俠：黑夜之神》最勁之處係，「老蘭」創下先河，成為第一套用IMAX機拍嘅商業電影，雖然IMAX鏡頭唔多，但就創下咗歷史，而佢仲將部IMAX機炒爛咗，據講當時全球得兩部。《蝙蝠俠：黑夜之神》嘅IMAX鏡頭唔多，半個鐘都冇，但就被公認為運用得最好嘅IMAX電影之一。事關「老蘭」真係將應有大場面先用IMAX鏡頭，唔似後來第二套有用IMAX鏡頭嘅《變形金剛：狂派再起》閃來閃去，即使去到《蝙蝠俠：夜神起義》，堆IMAX鏡頭都冇《黑夜之神》用得咁流暢－－當然，《鄧寇克大行動》都係正嘅。
近年，愈來愈多戲有用到IMAX鏡頭，雖然好似未試過一年多過五套－－如果冇疫情搞到延期，今年會係最多，但都唔係套套用得特別好，比較深刻有《飢餓遊戲：星火燎原》、《登月第一人》、《星球大戰：原力覺醒》等等，至於去到《復仇者聯盟3：無限之戰》，就成為咗史上第一套全IMAX鏡頭嘅戲。個人覺得兩睇啦，IMAX鏡頭係要突顯場面嘅偉大，冇比較下連文戲都用IMAX鏡頭，就冇咗《黑夜之神》或《原力覺醒》果種震撼力。
至於迪記最興玩嘅「IMAX俾多26%你睇版」，其實冇用到IMAX機拍，而今時今日部份IMAX電影都用IMAX數碼機拍，亦冇當年睇《黑夜之神》70mm IMAX版嘅震撼臨場感，用超大菲林去呈現真實氣勢。
有幾位讀者都講風涼話，你搵得返70mm IMAX機，我咪嚟睇囉！呢啲意見多謝曬。係，今時今日已經冇得睇70mm IMAX（原本Megabox IMAX係出到70mm IMAX），好似直頭亞洲區都冇曬，曼谷果部都拆埋，但退而求其次，我book呢場係Laser IMAX，雖然都唔係最正宗果隻Laser IMAX（最近係東莞或台北，好似深圳嚟緊有，如果你仲會返大陸的話），呢個版本係目前香港最好架喇。
如果未睇過《蝙蝠俠：黑夜之神》IMAX版本，一生人真係要睇一次，包場星期四前我要搵到120人呀。喂我寫咁大篇嘢，又吸引到你睇到呢個位，未睇過唔係唔去體驗吓呀？請即撲飛啦😂：https://bit.ly/3e9nXPZ
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei
或使用QR code：https://bit.ly/3a9wOzy
或透過Paypal捐款：paypal.me/jackyhei
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
【IG請follow】www.instagram.com/travelerwithmovie
