【長進】
真係咁受歡迎？如果係，咪叫長進囉。
聽講《延禧攻略》好受歡迎，有人話啲衫好靚，化妝好得，又講到個故事同主角啲計謀好勁。作為乜都要癡住香港嘅華僑，正所謂家有TV Box如有一寶，緊係會睇下乜黎。套劇好唔好睇，主觀到咁唔到我去講，正如好多人會話：「睇下電視娛樂下之嗎，咁緊張仲乜喎！」。但係唔多明白點解個社會仍然係咁長進，沉迷响啲後宮，太監，宮女鬥黎鬥去？
乾隆六年，即係公元1741年，當時大清國嘅GDP係世界第一，國家財富勁到係等如世界嘅三成，真係威到一點唔洗打XX。但係同一時間，英國開始咗工業革命，仲開咗個倫敦股票交易所炒嘢，牛頓亦有錢唔搵搞科學添。乾隆出世無幾耐，英國成為世界上最早有民主選舉嘅君主立憲國家。嗰啲殖民乜乜物物，美國立國無謂講，費時又話親英崇美。
無錯，係好悶嘅世界歷史，講得多口都臭，娛樂性係接近零。不過只要對照一下，當時大清國做緊乜，人地啲番邦化外之國又搞緊咩？衫靚，化妝好，權鬥叻，禮數足？去到今時今日，仍然沉醉响啲咁嘅嘢嗰度，睇黎只可以用「長進」黎形容。繼續後宮，宮女，太監，皇帝，真係令人懷念同嚮往！
#值得擁有
#直到永遠
#如果係
#除非唔係
