我噚日唔快樂，居然有105個like，仲多過我平時啲書評，有無攪錯咗。不過，我估你哋唔係like我唔開心，而係like我真情流露，成個細路咁，like我盆含苞待放嘅羅漢蝴蝶蘭，又或者like李天命首哲理詩，想我開心番啲啲。
商界中人，越高級越鍾意扮嘢，特別係男人，上咗位，企喺神壇上面，驚死破壞英明神武嘅形象，明明唔開心，都要烚熟狗頭，笑口噬噬，將喜怒哀樂嘅感情收埋喺靈魂深處，日日帶住假面具做人，帶耐咗，帶慣咗，工作角色不知不覺間凌駕做人身份，照鏡都差啲唔認得自己，所以鍾意放假，遠離工作，可以放低啲「假」。
稍為有啲性格嘅，愛得真，也愛得儍，有嗰句講嗰句，誠懇誠實，開心時笑，傷心時哭，就好易畀人話怪雞異類，畀人笑得多，都係帶番個假面具穩陣啲，可惜。
喺我本書入面，好鍾意其中一篇《我哭了》，最尾嗰句咁寫：「不管人前人後，傷心就哭吧，沒有甚麼可怕，不哭的人才真正可怕。」送畀大家。
不可含怒到日落，聖經教嘅。
復活節復活，耶穌做嘅。
永遠保持赤子之心，我堅持嘅。
有血有肉、愛恨分明，我不嬲都係，「真」是無敵嘅。
今日又開心番喇，post多盆靚到飛起嘅大岩桐，我種嘅，睇吓你哋今次點？
