選票是大家，齊來守護它。
監票代理人須知
監票表格總集︰
https://drive.google.com/…/fol…/0B8bdxRMPUI9FcDVvY1hxbkVfbzg
PDF清單版︰https://drive.google.com/…/0B8bdxRMPUI9FTE9ROFdmVldwSjg/view
投票當日，黑警話有四千隻狗會執勤，大家都知呢個唔係正常部署，監票代理人要做好準備，應付突發事情。無論你係監投定監點，請熟悉投票至點票嘅流程，知道每一個舉動嘅作用，防範任何出術嘅機會。監投同監點息息相關，最好同一陣營嘅監投同監點互相聯絡，知道個票站當日發生咩事。
通用事項︰
1. 文件︰身份證、保密聲明、代理人識別牌
2. 裝備︰紙筆、手錶、計數機、電筒、相機（一般情況唔畀用，但以防萬一）
3. 衣着︰唔好着有號碼、宣傳符號或字樣嘅衣物。但係呢，我係球迷，好鍾意着波衫，而啲波衫又咁啱五顏六色，仲要無印數字，我諗着住去，睇怕都吹我唔脹……你懂的。
4. 準時︰投票開始或結束前三十分鐘到場，監投朝早七點前到場，監點夜晚十點前到場，廢青唔好遲到，遲到嘅話所有事情都無意思。
5. 交際︰同票站職員打好關係，公務員都係想平平安安，無咩事唔好咁臭串，有咩要求都好，講多兩句唔該，否則有咩事佢地會耍走你，佢地最識玩程序。而且有好多公務員都係真正香港人，佢地都會想投票公平嘅。
6. 熟書︰悶嘅時候，睇下《立法會選舉程序規例》(香港法例541D章)，全部選舉規例都喺裏面︰http://www.legislation.gov.hk/…/B5B…/$FILE/CAP_541D_c_b5.pdf
7. 投訢︰投票點票過程中發現任何問題，即時向票站主任投訢。但票站主任有最終決定權，不滿只可以通過「選舉呈請」反對。現場申訴無效嘅話唔好勉強，記低事情始末，盡快同外界聯絡，公諸於世。
8. 條例︰下文特別列埋條例編號嘅，係有可能要同票站主任爭執嘅位。
投票前︰
1. 有劃定區域，監投唔好亂咁行。投票前，同票站主任講聲，喺票站行返一圈先，睇下有無咩可疑。
2. 投票前十五分鐘，票站主任會話畀代理人聽，票站總共有幾多張「未發出選票」，而且會向代理人展示選票，一本本咁計。監投代理人要點清楚「未發出選票」數目，確保每張選票都係空白，無摺角或塗污，再睇下同佢公布嘅數字有無出入。記低個數，話畀監點代理人聽，點票結束前，計一計對唔對數，即係「有效票」、「白票」、「廢票」、「重複」、「損壞」、「未用」同「未發出選票」總和，係咪同投票前嘅選票總數相同。
3. 票站主任會展示空票箱，在場代理人檢查完無問題就會加封條上鎖，代理人簽名封箱，數清楚有幾多票箱，記清楚票箱編號。新東補選試過有票站唔畀代理人投票前入去檢查投票箱，但呢個係代理人權利。(《立法會選舉程序規例》，541D章48 (1) 條 )「在緊接投票開始之前，投票站主任必須讓當時在投票站內的人(如有的話)察看各個投票箱均是空的。」
投票期間︰
1. 出入票站︰代理人可以自由出入票站，但唔好經過投票間或票箱，以避嫌疑。出去有三樣嘢做︰
a. 去拉票禁區睇下，睇下有無非授權人士做票站調查，今年有三個授權機構︰「香港研究協會」、「香港大學民意研究計劃」同「成報報刊有限公司」。香港研究協會同成報都係紅底，見佢地無着背心無掛牌就投訴啦；
b. 禁區拉票︰睇下有無人喺禁區拉票；
b. 睇下有無人喺禁區拉票；
c. 喺票站內外，睇下有無老人家係一車車黎，或者傻傻更更，但有人帶住佢地入黎，呢啲好可能係保皇黨掌心雷。如果見到投票人有張寫住候選人編號嘅紙仔跟身，同票站主任或職員講，叫投票人丟左張紙先可以投票。
2. 休息︰票箱會爆，爆左就要換，換嘅時候要在場，確保過程乾淨，其他時間無咁多人，可以出去隊支煙食盒飯。投票結束前一個鐘唔好離場。
3. 重覆、損壞、未用
a. 有人重覆投票嘅話，即係用相同身份證登記攞票，無論前後係咪同一個人，後來者都只可以攞一張批註咗「重複」字樣嘅選票，張票可以照放入投票箱，但會計無效選票；而選民如果話佢張票被塗污或損毀，可以向票站主任攞過張新選票，但舊嗰張要批註「損壞」字樣；另外，喺投票站內，票箱以外，發現任何選票嘅話，無論上面係有印、塗污、撕碎或空白選票，票站主任都要批註「未用」字樣。
b. 以上三類選票會由主任收起，唔可以放入票箱，最好記埋有幾多張呢類廢票，話畀監點聽，方便對數。需要嘅話，可以叫主任攞埋呢啲票出黎對。理論上呢類票唔會有好多，應該唔難記。(《立法會選舉程序規例》，541D章62 (3) 條 )
c. 睇清楚啲理論上「重複」同「損壞」嘅票係咪有批註，以防有人偷龍轉鳳，一個唔覺意放入票箱。
4. 記錄︰唔好嫌煩，出現任何突發事件，例如上述異常嘅選票，記清楚發生時間同問題選票數目。
5. 禁止攝影︰喺票站用得電話影相，一定係同鄉團或中資機構嘅人要影相交差（或者係亞寶），見到即刻舉報，唔使手軟。佢嘅投票依然會有效，但喺票站用電話係要坐監嘅，在場票站主任或者會網開一面，追唔追究到投票人甩褲，睇情況自己決定。(《立法會選舉程序規例》，541D章45 (7) 條 )
投票結束︰
1. 封箱︰投票結束前，監點十五分鐘前要到，睇實封票箱同上鎖。
2. 封票︰所有票箱以外嘅選票，包括未發出同問題選票，都要放入包裹密封。
3. 核對︰封箱後，主任要講返票站仲有幾多張「未發出」、「未用」、「重覆」同「損壞」嘅點票數目，對清楚同你記個數有無出入。
投票後／轉場／點票前︰
1. 賴死唔走︰區選同補選都試過，封完票箱之後，主任同狗隻會話投票結束，點票未開始，要趕人走，因為要轉點票站。但《 立法會選舉程序規例》第63 (1A) 條寫明︰
「就地方選區而言，如果候選人、其選舉代理 人、監察投票代理人和監察點票代理人在場，他們可留在投票站內觀察場地轉為點票站的過程。轉變完成後隨即展開點票過程 。」
轉場前係監投嘅世界，轉完場係監點嘅天下，而轉場嘅時候，兩個人都可以共存。而轉場後點票「隨即」展開，即係話監點「隨即」要履行職責，無縫連接，票站唔會有真空期，代理人唔使離場，係唔使離場。好重要，要講好多次！
以防黑犬格硬黎，記住要記呢條法例落電話，甚至印出嚟。換票箱灌票最大可能就係呢個時候做手腳，死都唔好出去！
2. 聯絡︰點票途中，點票區唔可以用通訊同攝錄器材，所以除左監票代理人之外，都應該要有多一個人喺公眾席，方便隨時同外間聯絡。有突發事件，如停電或狗隻進場，都可以影相。
3. 留意監點都有劃定區域，就算有咩突發事情，都唔好衝出去。
4. 印章︰確保所有投票印章移離點票區。
點票期間︰
1. 流程︰
a. 將選票倒上大枱，再將選票分類，放入候選人膠盒，或放去問題票箱；
b. 票站主任決定決定問題選票有無效，監投代理人可以提出反對，但票站主任可以維持原判。無效選票要印上「不獲接納」字樣，代理人反對而又維持原判嘅選票，要印上「反對此選票不獲接納」字樣。所有問題選票，都要放入包裹密封，票站主任要記錄每張選票嘅裁決。如果票站主任接納反對，選票要印上「反對此選票獲接納」，計為有效選票。
c. 數點有效選票；
d. 核對結果；
e. 編製最後點算結果。
2. 重新點票︰如果數票結果相近，相差三四百票內，可以要求重新點票，而重點之後，都係叮噹馬頭的話，可以再要求重點。但無論第一之定第二次重點，都係由票站主任決定。
3. 記認選票︰睇下有無大量選票有特別記認，例如摺角、塗污式樣一致或有文字符號記認。
4. 自行核對︰自己用計數機，加一加所有問題選票、有效選票同未發出選票嘅數目係咪啱數，為免有詐，最好係同監投代理人事先交流，知道投票前公布嘅票數同點票後有無出入。
點票結束︰
1. 問題選票報表︰票站主任要準備一份「不得視為有效選票」嘅報表，將唔同問題選票分類同計數，種類包括「有文字或記認而藉此可能識別選民身分」、「重複」、「損壞」、「未用」、「相當殘破」、「未經填劃」、「無明確選擇而無效」、「不按規例填劃」、「填劃多於一位候選人」，共九種，當發現選票數目有問題，可以請票站主任攞張報表出黎核對下。(《立法會選舉程序規例》，541D章81 (6)條 )
2. 傳達結果︰票站主任會宣佈點票結果，亦會將結果交去統一點票中心。記得個結果，聯絡返所屬陣營嘅中央點票組，畀佢地存底，確保返票站結果同統一點票中心嘅結果一致。
唔知仲有無漏，我無做過監票代理人，只係依據網上資料、選舉指引同法例去寫，來源煩雜，恕不一一列明。有其他補充嘅，歡迎留言講低，集思廣益，防微杜漸。
Facebook:
https://www.facebook.com/Seediq-%E8%B3%BD%E5%BE%B7%E5%85%8B-203653226649010/
WordPress: https://seediqking.wordpress.com/…/%E7%9B%A3%E7%A5%A8%E4%B…/
