《原諒他77次》影評
「逝去的感情如何留得住？」
—談原諒的力量
（含劇透，適合拍拖情侶閱讀）
—
—
—
—
「愛情的宿命」
—
如果一對戀人由相交相知到相愛，起點是一百分，那麼每次的「原諒」就會將彼此的感情消彌：由一開始無所不談，每天都想看到及依偎著對方，發展到電影開場片段中周柏豪及蔡卓妍二人共食、共HEA、共睡，卻相對無言的境況。愛情是否注定會變成感情，由一百分漸漸扣至零分，然後攜手步向分離的宿命？我想，這是電影最關鍵的命題。
—
當理性的律師遇上感性的愛情，當中會有甚麼火花？二人面對分手，男方覺得作為成年人要講得清清楚楚，女方則覺得係成年人先唔需要講得清楚。一段關係，兩種態度，其實雙方已早早埋下了分手的伏線。
—
「愛是甚麼」
—
愛究竟係乜呢？周柏豪與蔡卓妍就是百般不搭的一對，由性格到行為到對未來的的願景，基本上無樣夾。而分開之後，兩個人都各自有自己嘅追求者，就好似周柏豪有衛詩雅呢個小鳥依人，咩都就曬自己，照顧周到，仲唔計較你嘅背景，鼓勵ADAM去追夢；而呀SA就有坤哥，即係靚仔就唔係架喇，但勝在事業有成，好有米，仲對自己痴心一片。兩個追求者明明岩岩就可以填補前男、女友嘅「缺失」，都咁「好」，但點解主角二人唔選擇去開展新嘅戀情？
—
原因就係愛呢樣野，條件固然有重要性，但最最重要都係兩個字—「感覺」。一直以來，愛情都唔係講緊一種純粹嘅「原諒」，因為係理論層面，你係可以原諒任何人的。而貼地嘅愛情，就係講緊你選擇揀邊個人去「原諒」，明明有兩個人做緊同一樣野，硬係有個會相對討厭D，有個會值得原諒D，呢樣野全靠感覺，亦係愛情嘅第一個層次。
—
「原諒的困境」
—
咁樣比你揀到一個人去「原諒」，去「愛」了，你對佢有FEEL，係咪就代表要開始一個一生嘅「無條件包容」之旅？無錯，一段關係入面，兩個人本來就生而不同，如果無左遷就同妥協，根本就唔可以叫做「愛」，因為咁樣頂多只可以叫做「愛」自己。但「原諒」呢樣野往往就成為左人非常折磨伴侶嘅一件核武，每當自己做錯事，我地往往唔會去檢討自己做錯左乜，反而就會去責怪對方唔包容自己，大家唔夾，發脾氣，然後話不如分開，如此循環往復，苦了天下間的痴男怨女。
—
但個困境係，原諒你我條氣又唔順，因為同樣嘅問題出現已經唔係第一次，情況仲愈黎愈差；唔原諒你就即係分手，糟蹋大好姻緣，入番個POOL度尋尋覓覓，多年感情要分開並唔容易。而咁姐係要原諒定唔原諒？
—
「人生中，必須為真愛努力過，才算不枉此生」
—
在整套電影中，惠英紅與黃秋生戲份雖少，但對故事卻有著強大的點題之用。記得一幕紅姐與EVA在家中打邊爐，媽媽謂「大家互相忍下」，呀SA卻回應一句：「我唔想好似你咁成日係廚房度喊」。天啊，這句說到心坎，愛情一路走來是不是一定要以「忍」作為終結呢？又或是秋生淚奔一幕，謂自己被老婆要求離婚，道出對方承認十幾年前已不愛自己的事實。愛情是不是一定要走到這個「你瞞我瞞」的終點呢？如何擺脫這個宿命，就是電影最核心的主題。
—
就像EVA，她選擇以文字記低原諒ADAM的點滴，聊以抒發，聊以自解。然而這本筆記卻像他們感情的「扣分簿」，一步一腳印地記載著感情由豐盛到衰落的歷史。
—
但這本書對修補彼此關係有用嗎？我的想法是，既然你已經將在關係中的不滿寫低了，為何仍然要選擇去「忍」？為何不將自己的心意告知周柏豪？經過七十七次的原諒，二人分開，MANDY乘虛而入與ADAM一夜春宵後，一切都回不去了。而若果由第一次睇戲遲到事件開始，EVA就選擇將感受與ADAM分享呢？我很記得ADAM在電影中的一句，「呢本書入面錯嘅野我以後都唔會再做」。很多時我們覺得對方不會變，其實純粹係我們「覺得」，若果人真的看重彼此的關係，真誠認真的溝通就是愛戀不老的秘方，你可以覺得咁樣好傻，洗乜下下咁樣去溝通，心領神會就好。但其實兩個人會係埋一齊，本身就係一件傻事，戲中嘅講法就係「人生中，必須為真愛努力過，才算不枉此生。」
—
而你認真嘅時候，其實對方都有機會係玩玩下架，不過唔緊要，只少你清楚左呢段關係嘅本質。諗番起以前自己拍拖嘅經歷，就曾經試過係瀕臨分手嘅時候於大半年間寫過超過五萬字（大部分都係手寫）比對方，去搞清楚彼此嘅問題，去講我自己嘅感受，去諗可以點改進，去諗未來嘅願景。竭盡所能，最後都是失敗了，對方甚至會覺得好煩，感情從來無，亦唔應該係有保證的。但最少我無後悔過，唔做「懦夫」，勇敢去為關係努力，曾經為「真愛」真真正正咁付出過。
—
「原諒的力量」
—
而如果你可以搵到一個願意同你坦誠溝通嘅人，恭喜你，因為你地可以發揮到「原諒的力量」，「原諒」可以超越「原諒」本身，每次嘅「原諒」其實都係一個大家可以我口講我心，促進關係嘅一個好時機。因為咁，一百分先唔會一直扣落去，會減，亦都會加，甚至超過一百分，留得住逝去的感情，關係能夠長久而健康，唔一定要靠對方唔知道嘅「忍」或者「瞞」。
—
但亦都記住，唔係乜野都可以「原諒」到，就好似電影的結局咁，用上面嘅做法都唔一定可以包生仔。昨日種下的因，今天結成的果，愛上講感覺，分開都係講感覺，無野係必然，唯且行，且珍惜。
—
（一篇影評其實要寫嘅時間真係頗長同相當費心力的，正如呢篇野都過左二千字了。如果你覺得文章係寫得好嘅，我一個人嘅力量真係非常有限的，唔好吝嗇你嘅like同share吖，甚至幫手推薦比朋友知道原來睇戲之後係可以有反思的，一齊傾，一齊分享同感受。網絡的力量可以很少，一篇千文字可以只像一粒沙，但同時亦可以很鉅大的，依靠的就是你，你，和你，感激不盡！）
原諒他77次
周柏豪 Pakho Chau
Twins 蔡卓妍&鍾欣潼
蔡卓妍
英皇電影Emperor Motion Pictures
