【俾女朋友搶手機 要我玩密室逃脫】上
有追開Post嘅各位都知，前幾日我同女朋友玩咗個「誠實遊戲」，激到佢要懲罰我。
（唔知嘅睇呢度：https://goo.gl/9zfMXG）
懲罰就係，佢搶咗我部手機，用九秒九嘅速度跑咗出間屋，當我追出去嘅時候，發現佢用個鎖鎖住咗我。
「鎖匙喺間屋入面，自己搵啦！我留咗啲提示畀你。」佢一路講一路同我揮手拜拜：「我會慢慢睇你電話，希望你冇嘢呃住我啦～」
我嚇到成個人呆咗，除咗擔心唔知點出番去，仲擔心電話入面嘅秘密會畀佢睇到⋯⋯尤其一定要喺09:00p.m. 之前拎得番，因為有個女仔會搵我⋯⋯一定唔可以畀女朋友睇到！
我望一望手錶，而家係07:30p.m.，即係我有個半鐘時間。
我深吸一口氣，準備開始呢場【密室逃脫】。
但係，點開始呢⋯⋯？
我開始掃視女友屋企每一角，當我凝視地上面一張卡片嘅時候，女友屋企部電話突然響起，我又再嚇咗一嚇。
我拎起咗聽筒。
我：「喂？」
女朋友：「你係咪好擔心呢？我而家已經開始睇緊你電話，真係幾多女仔相喎！」
我：「唔關我事㗎！係其他人Send畀我！」
女朋友：「每過10分鐘，我就會Del你一個女性FD。」
其實，呢層我都唔係好擔心，反正我平時都冇乜睇人FB，但佢之後講嘅就令我標晒冷汗。
女朋友：「同埋我登入咗《傳說》喇，每15分鐘就幫你賣一粒『奧義』！」
可能要稍稍同大家解釋，《傳說對決》係我玩緊嘅一隻手機遊戲，而『奧義』就係其中一樣要儲嘅裝備，會增加角色嘅能力，平均要打幾日先會儲到一粒，我大約有60粒⋯⋯係我幾個月以嚟嘅成果⋯⋯如果冇晒『奧義』，等如叫我以後唔使再玩，所以⋯⋯
我一定要快啲出番去！
我：「妳唔好亂嚟！妳又話有提示畀我，都冇嘅！」
女朋友：「講句我愛妳嚟聽下先！」
我：「⋯⋯我愛妳。」
女朋友：「聽話！嗱，總之所有提示，都關於【第一次】，慢慢搵喇！Game Start！開始倒數！」
我：「喂！？喂！？喂！？」
已經收咗線⋯⋯
我啲奧義呀！！！
第一次？到底即係點！？
先形容下女朋友間屋係點，一房一廳，廚房係開放式，有一個廁所。廳有一張凌亂嘅枱、一個有16格嘅IKEA格仔櫃，仲有一個放滿雜物、耳環、冇書嘅書架。
而房入面，有兩個衣櫃，兩個真係放書嘅書架，同埋佢張床。
頭先聽電話前，我記得地下有張卡片，係一間花店嘅卡片。
我知喇！係花！第一次送花畀佢！
於是，我喺間屋度周圍搵下有冇花，但第一次送花畀佢，已經係兩年前嘅時⋯⋯冇理由仲喺度，而且枱同櫃都一眼望晒，冇花或花樽喺度。
但我直覺話畀我聽，第一個提示一定同花有關！因為女朋友最鍾意花，以佢嘅思維一定用花做提示。
【第一次】、【花】呢兩個Term喺我腦入面不停出現，但我就聯想唔到有咩關係⋯⋯
我喺屋內不停望，睇下有冇花嘅相關物品。
花耳環、花形圖案嘅盒⋯⋯冇任何提示。
我望一望手錶，已經過咗15分鐘⋯⋯
【07:45pm】
我已經冇咗一粒奧義⋯⋯
電話又再響起。
女朋友：「拜拜喇！Mary Tsang！永別喇！紅色嗰粒咩咩咩！」
我清脆咁聽到一下「咔撐」嘅錢聲，代表賣咗道具。
我個心好痛⋯⋯
我：「我知同花有關，但我都唔見間屋有花！？」
女朋友：「你真係好蠢，賣一粒奧義換一個提示，Deal？」
我：「⋯⋯」
但我知道唔換嘅話，只會失去更多。
我：「DEAL！」
又有一下「咔撐」嘅錢聲。
女朋友：「花，未必係拎住，好大貼士喇！」
我：「⋯⋯」
佢又收咗線。
講咗等於冇講⋯⋯
【第一次】、【花】、【未必係拎住】。
我諗到了！
我即刻走咗入去房，行咗去佢房嘅衣櫃，我記得第一次同佢約會，佢係著住一條花嘅連身裙。
我打開衣櫃。
⋯⋯
有幾十條⋯⋯但我已經唔太記得係邊條。
然後，我又用咗15分鐘，逐條逐條搵⋯⋯終於畀我喺其中一條，發現貼咗一張紙喺上面。
喺張紙上面，女朋友畫咗一個『太陽』。
報一報時，而家係【08:00pm】
距離嗰個女仔搵我，仲有一個鐘，但我第一個提示已經用咗半個鐘⋯⋯
【第一次】、【太陽】⋯⋯
究竟代表乜？
（待續⋯⋯）
***2000likes 200個share就繼續
***想睇落去，留言：「F5」
讚好莎比亞 睇故事
