深夜無人睇，靜靜雞講故仔……
《我老婆由細到大都鍾意紙紮公仔》
外父見到我嘅驚訝樣，即時轉身一望，然後一臉不悅講咗句：「嘖，最唔想見到嘅人都嚟埋。」然後輕聲喺我耳邊再同我講句：「唔好比個孫女玩埋啲爛鬼紙紮公仔，又老土又核突。」說罷便離開。
我無言以對，外父嘅一句說話，已經令我打從心底對外母嘅印象一下子出現唔同嘅睇法。
外母緊張地問我：「佢同你講咗啲咩？」
「無嘢……都係叫我睇開啲。」我無將真相講出嚟，免得影響大家關係。
「你要記住呀，佢講咩都係假架！當初離婚都係因為佢返大陸包二奶唔要我地咋！佢今次返嚟一定想搶返我地個孫女呀！」外母嘅反應比我想像中更加激動，本來我想覺得無嘢都變得心多。
但今日係老婆嘅葬禮，實在唔想處理其他事情，於是我拉住靜妍隻手，間接將佢甩開外母，然後帶返入靈堂進行其他儀式，外母無奈地跟隨。
喺靈堂上面，我視線一直望住老婆張相，腦海不斷回憶以前同老婆開心相處時候嘅片段，然後靈堂師傅將唔同嘅紙紮物品通通放入爐到燒，口中唸唸有詞。
之前去靈堂同師傅籌備時侯，佢話燒嘅嘢一定係死者生前最鍾意嘅嘢，所以我揀咗好多老婆鍾意嘅手袋、化妝品同衫……當時我揀嘅時侯，仲覺得點解啲人可以造紙紮造到咁真，難怪老婆會似假亂真咁迷上紙紮。
見到爐入面嘅紙紮一直被燒，唔知點解我有一種莫名嘅興奮。
不過整個葬禮，除咗外父嘅說話之外，最令我感到奇怪嘅係，靜妍竟然無再喊住要媽咪，即使靈堂上面擺住媽咪張相，但佢都無咩反應，究竟佢係已經接受咗媽咪離開定係有其他原因呢？
總之佢嘅反應令我好在意。
雖然唔知外父講嘅嘢係真定係假，但小心駛得萬年船，為咗唔比外母影響個女，所以我決定自己湊返。
我搬咗另一間酒店住，目的都係想收返外母原本張酒店匙卡，以後只有我先開到門。所以外母每次打比我話想幫手湊個孫，我都拒絕，口說理由係唔想佢老人家走嚟走去，既然我請咗假湊女就唔洗佢幫手。
「爸爸，我要玩車車！」靜妍佢又要求玩紙紮。
我一臉嚴肅地拒絕，並再三表示紙紮並唔係玩具，而係燒比死人嘅祭品。
「以前媽咪都會比我玩架！點解你唔比我玩呀？」靜妍情緒開始激動。
「你要玩具我可以買比你，但嗰啲係紙紮！點都唔玩得！你再講我就鎖你入廁所。」
雖然我態度強硬，但個女嘅脾氣更強硬，佢好似吸咗毒咁，腦海只係要想玩紙紮玩具，如果唔比佢玩，就發哂脾氣咁大叫，但為咗個女成長同將來，更加唔想步佢阿媽後塵，我唯有忍痛拒絕，將佢鎖喺廁所入面，無論佢點叫，叫喊都唔會比佢玩。
而每一次佢喺廁所入面喊到累，我就開返門抱起佢上床瞓。但佢一醒，又變返原來咁。
日子一長，我就開始頂唔順呢種日子。
酒店間好細，基本上靜妍喊足一日，我就受足一日罪。
「嗚嗚嗚呀，我要玩車車呀！嗚也呀！」
而工作上面，為咗照顧靜妍，我請得太多假，早早已經無假可以再請，上司不斷打嚟比壓力我，
「大哥，死老婆唔代表唔洗做嘢架，你唔想做就出聲，好多人爭住做架！」
同時間，外母又不斷打嚟話要探個孫，一拒絕又會情緒崩潰比說話我聽。
「我已經無咗個女喇，呢家係咪連見個孫都唔可以呀？係咪要咁樣對我呢個老人家呀？」
而我，身心都累了，成個人都好頹，毫無精神，再咁落去，我一定頂唔順。
有晚收到朋友電話，佢問我記唔記得中學有個人叫阿傑，話阿傑佢做緊紙紮舖嘅老闆，講起我最近嘅事，話好想見一見我同我傾下。
我對阿傑呢個人無咩太大印象，只係記得中學時期嘅阿傑一副毒男樣，成日都比我地班男仔欺凌，最後佢唔知點解突然間唔返學，就再無見過佢。
本來都唔想見一個曾經比我欺凌過又咁耐未見過嘅人，但當我望一望靜妍喊到雙眼紅腫，我就答應見面，因為好想知佢會唔會解決到靜妍嘅問題。
我按照地址去到一個街市，由於夜已深，所以附近嘅檔口都關哂，只有幾個清潔姐姐喺到洗地。而佢間舖正正就喺街市最角落。
我離遠已經見到唔少紙紮用品擺哂出嚟，我仲見到架單車造得好真，遠睇真係以為一部單車，仲有好多貼緊潮流嘅紙紮，最令我在意嘅係，舖頭入面擺放住幾個紙紮公仔，好似每對眼都望住入嚟嘅客人咁。
但我企喺門口到，見到入面毫無燈光，令到無數嘅紙紮公仔身上粉紅色顯得特別明顯。
「喂！阿明！好耐無見！」阿傑從舖入面出嚟招呼我。
「Hi……嘩，好耐無見，原來做咗老闆。」我有啲唔自然，因為阿傑對我真係太陌生。
「小生意姐，我讀書無你地咁叻，咪跟老豆學整紙紮，一學就十幾年。」
「咁你都勁喇， 見你紮出來嘅嘢好真。」
「唔好講呢啲，我知道你老婆嘅事，呢段時間你……辛苦喇。」阿傑拍拍我真誠地說。
佢一咁講，我眼淚就忍唔住，估唔到自己呢家變得咁軟弱，只要一提到老婆，我就控制唔到自己情緒，我發覺我太掛住老婆，掛到自己情緒都開始出現問題。
我將老婆同靜妍最近迷上紙紮嘅事同阿傑講，睇下佢有冇咩意見比到我。
呢個時候，阿傑就好精神，急急邀請我入舖頭傾下。當我入去時，其實入面真係無咩空間可以坐，因為四周全部都係紙紮用品。
「阿明，你知唔知紙紮用途係咩？」
「當然係燒比死人用喇。」
「呢個只係表面，實際上紙紮可以帶比我地更多樂趣！你睇下呢啲紙紮，幾真幾靚！哈哈！只要我想要，我就可以整出嚟，仲比實物造得更真更靚！我就好似上帝一樣！咩都可以整！」阿傑嘅反應令我有點心寒。
接著，阿傑搬出一個紙紮公仔，然後紙紮公仔個樣竟然唔係傳統畫上去咁，而係一副正常人樣。
「嘻嘻，點呀？靚唔靚呀？佢叫kary，係我表弟老婆嚟架！」
「表弟老婆？」
「係呀！鐘意咗佢好耐，但你知喇，人地老婆點可以攪呀，我咪紮個公仔出嚟，印出佢老婆個樣！咁咪日日可以陪住我囉！」阿傑用一副詭異嘅臉容望住呢個紙紮公仔，呢個臉容正正就係我老婆望住紙紮公仔嘅臉容。
「但紙紮就係紙紮，係假架，點會用到？」我反駁說，其實想令到阿傑清醒返啲。
「真定假有咩所謂，最緊要你欣賞佢，鍾意佢，又唔洗錢又造到比你，你仲想點？」
我唔係好理解佢嘅想法，但我今次嚟唔係要聽佢講呢啲，於是我問佢點解我老婆同個女會咁。
「你老婆點解會咁，我真係唔知。但紙紮呢樣嘢係需要尊重，因為整佢出嚟係空心無靈魂，但長期擺喺到，一副當佢真人或者實物咁睇，佢可能會成精或比鬼附身，因為佢地最鐘意人地當佢地係『人』，會誘惑你鐘意佢。」阿傑認真地說。
「咁我個女點算？佢好似吸咗毒咁，死都要玩啲紙紮車車！」
「無事嘅，咪由佢玩囉，出面賣嘅紙紮都係用普通紙造，無咩害嘅，嘻嘻。」
雖然阿傑咁講，但我仍然忍唔住將外母件事講佢聽，阿傑聽到後一臉沉重，然後話：「咁不如你叫你個女玩我啲紙紮囉，咁你放心唔洗怕外母比唔知咩紙紮佢玩。」
我諗下諗，都不失為一個方法，既然我阻止唔到個女要玩，就起碼佢玩得安全，而阿傑又係呢方面專家，信佢應該好過信外母吧？
閒談完後，我見咁夜都係時候返去睇個女，我仲拎咗幾個紙紮公仔返去哄靜妍開心。
離開時，我問阿傑：「其實……呢啲紙紮，我老婆係咪真係收到？」
「我做呢行梗係答你會喇。」
「咁……我老婆咪好寂寞。」我諗到老婆係死後嘅世界望住堆紙紮，自己一個孤伶伶，一定好慘。
「咁你咪落去陪佢囉。」
「吓？」我想確認我有冇聽錯。
「無呀？做咩呀？」阿傑呆呆望住我。似乎係我聽錯吧？
「無……我好似有啲累，咁我返去先。」
「阿明！有件事我要多謝你！」阿傑笑住說。
「多謝我？咩事？」
「如果當年唔係你日日返學校打我笑我，我都唔會有情緒病而返唔到學，攪到我畢唔到業……但你放心，我無怪你，因為就係我返唔到學，所以先跟老豆學造紙紮，哈哈哈！唔學都唔知自己原來咁鐘意紙紮！多謝你！嘻嘻！」阿傑口說唔怪我，但從佢說話語氣同臉容，令我好唔舒服。
離開街市後，我不時都忍唔住向後望，總覺得有人望住我，但整條街都無任何腳步聲，係我心多吧？
……
沿路返去時，個腦不斷回想起過去嘅壓力，抬頭望天，唔知道老婆呢刻過成點？收唔收到我燒比佢嘅紙紮呢？佢會唔會同我一樣，都係孤獨寂寞呢？
不知不覺間，我竟然返咗去屋企，而唔係酒店。打開門後，缺乏燈光下，整個環境都漆黑一片。
我放低個背包同紙紮公仔，從背包入面拎出一支白電油，然後默默地將佢倒落自己身上。
「老婆，希望你收到。」說罷，我將火機點燃身上嘅白電油。
《待續》
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
估唔到大家真係達成目標，有4000like
我放工後一直打文到呢家，算係回應大家承諾。
既然5000like都破，我都唯有再set高啲，等自己回下氣都好。
如果今集有7000like，我就即打文！如果無嘅，我都會出，不過會慢少少……始終返工好多野做
都係個句，多謝大家支持
記得比like share 同埋最重要！就係留言！我會睇哂每一個留言！
記得follow ig：https://www.instagram.com/homing0624/
另外，我暫時偷偷地放隻限量預售link比大家預訂本書
如果大家鐘意《孔明古怪故事集》，記得支持我，買返本。
記住呀，《紙紮公仔》只係故事集其中一個故事咋～本書入面仲有好多故仔架～計返都係幾蚊雞一個故仔…
希望大家支持，但由於限量預賣，所以數量有限，買完即止，希望趕到復活節印起到比大家。過幾日我再出post 正式向大家預賣～
可以喺到買
購買網店：https://homingming.boutir.com/
紙紮用品 在 紙紮靈屋分類- 天堂房產∣ skea 天堂紙紮 - Pinterest 的八卦
2017-6-30 - 全球第一時尚紙紮用品專門店，天堂紙紮屋與極樂世界第一品牌，令人注目的天堂配件公司，來自台灣的紙紮舖。除設計風格的紙紮祭品與顛覆傳統紙札的紙紮精品 ... ... <看更多>