//支持本Page請Click入內文比Clap，已為Medium收費會員請直接Click入內文閱讀，謝謝！//
警方毒品調查科財富調查組召開記者會表示經多月查探，將四人以涉嫌洗黑錢罪名拘捕，除響拘捕過程中拾獲大量裝備、十幾萬現金之外，最大鑊都仲係一次過凍結戶口達八千萬現金。
首先警方響好耐以前，經已將毒品調查科同三合會調查科嘅財富調查組合併，成為一個包括針對洗黑錢嘅財富調查部門，同商業罪案調查科嘅分別係，後前係會以詐騙或者實際已發生嘅洗黑錢運作進行調查，而財富調查組則係因為持有戶口者「擁有與身份不相稱財富」作為理由：但又基於佢地並無足份理據指控當事人有犯罪行為，唯有就係以洗黑錢為藉口將財產凍結。
過往財富調查科通常針對嘅都係涉嫌販毒同黑社會呢啲地下經濟經營者，但今次卻係以破天荒以「資助暴徒作不法行為」為理由進行拘捕。其實自從8月開始，經已有消息傳出警方打算調查612基金並可能凍結嘅戶口，但最後件事不了了之，估唔到原來真正嘅打擊對象會係星火同盟。
傻嘅都知，星火同盟一定唔會同洗黑錢有關，甚至掉番轉黎講，就係因為佢地光明正大，拒絕用洗黑錢方式將資金分散轉移開去，先反而被警方以「洗黑錢」為理由一次過充公哂八千幾萬，真係何其諷刺。連登仔話今次星火係港共政權駛橫手充公異見人士資產，應該響國際以「香港國際金融中心地位已死」為題煲大佢並向政府施壓。咁樣行我當然唔會反對，但對佢嘅成效卻唔樂觀，因為：
首先，打擊洗黑錢活動目前係國際共同嘅敏感議題，我可以話比大家聽，今時今日你去銀行要求將你嘅港幣存款兌換成美金，即使只係網上匯兌而唔係撳Cash出黎，超過兩百萬美金銀行已有權拒絕；甚至乎你只係響銀行櫃位撳十萬蚊現金，個職員都會無啦啦問長問短；
所以一觸及洗黑錢呢個範疇，國際間嘅都係會用一個相對「縱容」嘅方式看待執法機構，比較少會因此批判警方濫權問題──我諗香港警方亦都係睇穿咗呢點先會肆無忌憚咁進行拘捕；
其次，講咗好多次，其實而家警方進行各種拘捕行為嘅目的，經已唔係要釘死你令你入罪，而係為咗拘捕過程中各種附加同阻嚇作用：
1. 上網隨意查好多洗黑錢新聞，唔少最終結果都係上訴得直。但問題係打到終審隨時要搞三四年。就算比星火同盟請律師同政府打贏官司，到時就算放番筆錢出黎，都經已達到令前線義士斷水斷糧嘅目標；
2. 更重要當然就係阻嚇效果：唔少黃絲可能仲信心滿滿，覺得612基金循正規途徑申請成為捐款戶口、又有法律界人士組成託管機構一定無事──問題係當而家香港行得正企得正都會比警察又拉又鎖果陣，你真係覺得100%安全？
進一步，當銀行發現原來呢啲大筆存款戶口隨時會被人當成洗黑錢罪行看待之時，就算政府唔郁手，銀行會唔會自己先自我審查，要求「可疑戶口」自行取消服務，甚至拒絕往後同類戶口嘅申請，完全斷絕哂官方捐款來源？
但最絕嘅一樣嘢都仲係，響警方記者會入面經已講到明，只要證實星火被捕人士係犯咗洗黑錢罪、又或者使用捐款作其他不法行為罪，任何捐款人士都有可能被控教唆進行相關犯罪而被檢控。換言之，往後你可能只係捐款、參與眾籌，都經已可能會被拘捕，就係要令一班比較怕死嘅香港人，連借住偷偷捐錢支持抗爭者嘅膽量都無埋。呢個先係今次拘捕嘅長遠真正打擊目標。
我唔係金融財經又或者法律專家，究竟點樣響往後資助抗爭者嘅捐款途徑將會被全面封殺之下，搵出有效突破點，可能要留番其他專家比個確實答案出黎。但我直覺諗倒嘅卻係：
1. 只有全面放棄政府能夠監察、封鎖嘅渠道，另闢體制外資金流通蹊徑；
2. 去中心化、分散捐款管理同分配平台，唔好比機會極權政府一網打盡；
兩樣嘢加埋，都只會令我諗倒，諸如BitCoin嘅加密貨幣，就係唯一出路。只有將捐款途徑變成政府無法阻截嘅加密貨幣平台、以去中心化方式存儲重要資產、避開警方監察資金通動嘅可能性，先有可能繼續同呢個極權政府玩落去。
當然加密貨幣一定涉及好多技術障礙（例如入錢好容易，但出錢果刻都係麻煩）、騙徒乘機混水摸魚嘅機會更大（你睇而家Facebook譚詠麟幾hit，連黃之鋒都變成騙案代言人叫人買Bitcoin），但唔行險路，就直頭得番死路，所以我呼籲全香港支持抗爭者嘅市民，都立刻開始惡補加密貨幣同區塊鏈嘅相關知識──唔係叫你買，但至少要開始接觸呢方面嘅知識，將來總會有用。
洗黑錢新聞 在 洗黑錢 - 香港01 的相關結果
全面"洗黑錢"相關文章及報導，多角度呈現話題，立即進入，了解更多"洗黑錢"的相關 ... 社會新聞. 2021-07-28. 誘外傭開戶口洗黑錢$2,700萬警破非洲裔犯罪集團拘29人 ... ... <看更多>