《介紹咗女友玩Pokémon Go，真係好後悔⋯》
是咁的，終於有得玩《Pokémon Go》，我興奮到即場喺公司大叫「出嚟啦！比卡超！」，老細仲要啱啱行過，好彩佢一副大木博士嘅口吻，叫我捉還捉，但放工先捉好冇？
佢一行開，我彩佢都傻，即刻繼續玩，點知女朋友打嚟。
「喂？」我戰戰兢兢聽佢電話。
佢第一句就好認真咁問：「係咪玩緊？」
咁我以為佢會好惡咁鬧我，唔可以沉迷呢隻Game，或者話，「捉咩小精靈吖！你捉到我一個就夠啦！」
點知佢話：「你記住一開頭唔好理嗰3隻嘢，之後就會有比卡超出現。你依家自己捉住先，今晚再一齊捉，係咁啦！」
Bye Bye都冇講⋯⋯
呢一刻，我分唔到佢係我女朋友，定係小智老母⋯⋯
Anyway，相信唔止我女朋友，甚至成個香港都將會因為隻Game有變化，例如「18區專車捉小精靈服務」。
平時事無大小都WhatsApp我嘅女朋友，今日一個訊息都冇。
我有少少驚，會唔會突然有個小茂出現，捉住佢隻手教佢玩Game？又或者有條友，揸住架寶馬，帶佢周圍去，跟手再車佢返棟私樓度捉大岩蛇？
愈諗愈心寒，即刻打返電話畀佢⋯⋯
「你打嘅電話暫時未能接通⋯⋯」
嗯⋯⋯帽事嘅。
終於捱到放工，一見到女朋友，佢就話：「我頭先玩到部電話冇電呀！」之後喺袋度拎咗兩個尿袋出嚟：「嗱，我哋一人一個，出發喇！」
女朋友就係無論幾時，都仲係咁細心。
突然覺得，搵到個會同自己一齊捉小精靈嘅女朋友真係好幸福，但我Feel到有啲古怪，平日連我打半個鐘PS4都鬧到我飛起嘅女朋友，點會無啦啦咁支持我打機？
「入面好似有小精靈喎！」女朋友拉咗我入一間時裝店，我終於知道咩事。
「妳買衫定係捉小精靈㗎⋯⋯」
「Why not both！？」
陪佢行咗一粒鐘，小精靈就捉唔到，但捉咗成袋衫⋯⋯
食飯期間，平日嚴禁玩手機，但佢今晚全程望住個mon，冇望過我，我專登話：「我有啲唔開心。」
佢冇理我，只係話：「好小事啫，一陣捉返幾隻小精靈就冇事啦！」
角色好似掉轉咗咁。
甜品都唔食，佢就話走，想周圍去兜下，期間都係捉咗啲低級小精靈。
平時明明好快就攰，今日竟然行咗成三粒鐘，我提議夜喇，不如返屋企啦！佢就黑面：「好煩呀，要返自己返啦！」
佢仲話，聽朝一早要入長洲，睇下捉唔捉到啲水系小精靈⋯⋯
我崩潰，突然好掛住以前唔畀我打機嘅女朋友，嗰陣成日幻想如果佢可以一齊打就好喇，但原來佢沉迷起上嚟，係咁得人驚⋯⋯
「如果佢可以變返個唔打機嘅女朋友，我都以後唔打喇⋯⋯」我細細聲講。
「真係？」女朋友聽到我自言自語：「你話㗎！」
佢放低咗部電話：「你依家知道平時我有幾唔開心啦！呢隻Game一出，我就諗住試下同你一齊玩，等我可以同你多啲話題，又可以同你乘機周圍去⋯⋯」
原來佢只係激我。
「所以，妳唔係真係沉迷玩呢隻Game？」
佢好大力咁推開我：「傻啦！原來打機係咁開心！你記得聽朝出發去長洲呀！之後幾日要去埋赤柱、下白泥、南丫島、大澳、梅窩、愉景灣⋯⋯你遲到，或者激嬲我嘅話，就收返你入精靈球呀！」
原來呢隻Game，唔係訓練小精靈，而係訓練男朋友⋯⋯
------------------------
喜歡的話like我的page，會有更多故事及散文
FB: 莎比亞
書展新書：《最後一分鐘－愛情》白卷出版社 1AA02 黑白毛記攤位 8折有售
*** 八卦先好ADD嘅私人FB AC: sapeiar ***
Follow IG睇獨家sweet相: sapeiar
大木博士 在 毀童年新迷因「大木博士與水島太太」引爆論壇，不懂「麵筋梗 ... 的八卦
9 月3 日，PTT 西斯板一則回覆「這種包莖要處理嗎」的文章，原本期待是正常的西斯知識學術交流，卻意外地由鄉民 Slashing 用自繪圖文的方式，以「大木博士 ... ... <看更多>