一位先生氣都喘埋咁嚟到診所：「姑娘，我要睇醫生呀」
我：「好呀，我同你登記先啊，麻煩你俾身分證我啊～」
佢：「哎，死火，我漏咗喺公司」
我：「如果你要病假紙收據就要身分證明文件啊」
佢：「我唔駛呀唔駛呀，我想醫生幫我打枝止痛針，特效嗰隻，唔駛要假紙收據呀」
我：「咁你喺度填返你啲個人資料先啊」
登記後，佢問：「姑娘？可唔可以快少少呀？我仲要返去開工㗎」
我：「先生，可以入去見醫生啦」
入到醫生房，醫生問：「今日有啲咩唔舒服呀？」
佢：「我想打枝止痛針，特效嘅」
醫生：「你邊度痛呀？」
佢：「我膊頭呢度痛咋嘛，打枝針得唔得呀？」
醫生：「痛咗幾耐呀？」
佢：「唔記得啦，醫生你可唔可以同我打枝針呀？我趕住返去開工㗎」
醫生：「你做咩職業㗎？」
佢：「我喺附近個地盤返工㗎，做做吓嘢頂唔順先走過嚟，我唔可以行開咁耐㗎，你可唔可以即刻同我打枝針呀？」
醫生：「打針止痛係一時嘅，如果你繼續做勞動嘢嘅，冇辦法俾啲肌肉休息，有可能會令佢繼續惡化，不如我寫幾日病假俾你休息下？」
佢：「唔得，我病假冇水補㗎，手停口停呀」
醫生：「寫張輕工紙俾你呢？」
佢：「唔好講笑啦醫生，做得地盤邊有輕工呀，搏炒咩？我冇嘢做好大鑊㗎！你同唔同我打枝止痛針呀？我真係趕住返去呀」
醫生唯有幫佢打枝止痛針減輕佢嘅痛楚。
之後幾乎隔日都會見到佢嚟。
我：「又痛呀？又打針呀？」
佢笑笑：「係呀」
我：「你咁唔掂㗎喎，不如抖吓呀？」
佢：「頂到暑假呀，暑假就抖㗎啦，暑假見我唔到㗎啦」
我：「點解呀？地盤完工啦？」
佢：「暑假個女冇學返，冇人睇住個女我咪冇得返工囉」
我：「咁到時你好好俾自己抖吓啦～可以嘅話，就做個檢查啦～」
佢：「檢咩查呀，男人老狗唔駛啦，睇唔到就冇事㗎啦！我有事就大＿鑊啦！我個女都唔知點算啦！冇咗個老母，仲要冇埋個老豆！」
我：「檢查啫～邊有人話要死...啋過你把口！」
佢：「入得去打針咩，叫醫生拿拿聲呀～」
我：「入面有病人呀～咁你暑假過唔過嚟做個檢查呀？照張Ｘ光都好呀～」
佢：「哎唔好呀唔好呀，唔好煩我搞我啦，有錢都留嚟同個女食多杯雪糕啦！你知唔知做我哋呢啲單親老豆好慘㗎？成世俾個女騎住㗎！佢而家咁大個都話要騎膊馬呢下死呀！」
雖然佢口講『呢下死』，但係佢個樣係喺度甜笑...有女萬事足咁樣～
我：「你個膊頭咁就唔好俾佢騎膊馬啦...」
佢：「為女死為女亡，我呢世咁頻撲為個女㗎咋，我俾唔到個100分嘅阿媽佢，唯有做個200分嘅老豆」
我：「阿200分老豆，可以入去啦」
200分老豆，你今個暑假玩得開心冇？肯檢查未呀？
啋過你 在 【十個港式廣東話俚語+ 英文解釋】坐月、床、床頭打交床尾和 的八卦
【十個港式廣東話俚語+ 英文解釋】坐月、床、床頭打交床尾和、啋、 啋過你 把口、 啋過你 把衰口、睬、睬佢都傻、彩、彩數您又知唔知咩意思呢. 學習廣東話. ... <看更多>