［Karma is a bitch（＊）］你估唔到嘅風險，先真係風險嘛。
1. 3715呢單嘢，真係十分多嘢可以講。唔知上文下理嘅，睇返舊文，期油價大跌令到3175狂跌（https://bit.ly/3eEoVVo）。然後前晚（星期三）仲忽然改玩法，唔等到去五月，將六月期油roll去七月，索性而家即時轉去九月（https://bit.ly/3cFwrh4）
2. 用比較接近人話嘅講法：就係幫你平倉，幫你打靶，止咗蝕，但之後冇仇報咁咯。
3. 咁首先，你就見到，昨日（星期四）隻3175當然跌到趴街—但可能冇做嗰個動作跌得仲勁，唔識計，搵高人計下。至少你見到，原油價去到負數，「你隻3175都只係插一半唔夠，要還神」
4. 但正如三叔在個公告講，「缺點是假如 2020 年 6 月合約的市場價格在未來反彈，投資者可能無法享受持有 2020 年 6 月合約的任何好處」
5. 結果，昨晚（星期四）咪即彈咯！即時冇仇報！低位已被人打靶！
6. 但，我最初冇寫，但真係唔意外—其實你見好多時都係咁，啲人人買嘅嘢，災難性低位打靶後，個市就回升的了。市場滿係血，屠殺埋最痴線嘅好友，就係見底之日。
7. 而呢壇嘢，只能講句，不可抗力，甚至好似唔係好應該怪三叔（雖然我好想問：如果我沽空咗隻3715又點計？），佢話「保障你最大利益」嘛。
8. 事實上，我同啲比較信得過嘅朋友傾，普遍都覺得負油價呢樣嘢誇大咗，唔會係新常態，只係咁啱某個時刻，某啲要某度交付嘅期油，係做過下呢種價。唔代表以後要貼錢先有人要。
9. 但，就係呢幾下，已經搞到世界大亂。我懷疑啲行自己都冇諗過有呢啲情況，你問我我都冇諗呢啲情況。真係世界大亂。亦唔止三叔隻ETF係咁。美國嘅原油ETF都有類似嘅東西(https://bit.ly/2wZdWF0)。另一方面，中國銀行嘅咩原油寶 (https://bit.ly/2wYALZp)亦都上頭條。因為佢唔係ETF，ETF頂多total loss—但原來有嘢慘過total loss—就係銀行向你追差價。其實等於孖展炒爆咁啫，只不過買嗰個開頭可能都唔知，以為最多去到零，原來可以要倒嘔。
10. 歸根究底，真係市場耐唔耐有一鑊咁嘅嘢。風平浪靜時有時都有，而家呢啲又波動又經濟大衰退又忽然減息，往往就蝴蝶效應，唔知拍死咗邊個。
11. 唔係完全一樣，但個故事，同2018年2月”Volmageddon＂幾相似，都係一大堆散戶，買ETF，當時就係咁買反向波幅，即係不停咁short VIX （又叫Vol，波幅指數）。但你背後嘅東西唔係股票指數或黃金。結果一逆轉，個Vol一抽上去，瘋狂人踩人。
12. （https://bit.ly/3buCPaP）（https://bit.ly/3byd60U）
13. 而當年成件事最正嘅係：Short 足幾年Vol嘅固然贏成千日，然後一晚輸清晒，但long Vol嘅，一樣係死（主要因為時間值）！即係買邊兩都死（https://econ.st/3eK6RJq）
14. 今次堆期油ETF，你見係好多好多散戶仆入去嘅。唔止香港，美國都係。而我完全唔知點解。兩星期前我未聽過2371，之後可以20億成交一日，差不多等於匯控同建行加埋。咩事？
15. 另外仲想分享嘅係：風險。好似好簡單嘅嘢，但其實好似冇人說得準。學院派CFA咪講vol，sigma，standard deviation，dispersion from expected return，天氣不似預期，log normal distribution（＊＊）乜乜物物。
16. 但明顯係有問題，唔識log normal都好，都聽過下standard deviation。對不？掟粒骰仔，預期值係3.5。1固然係dispersion，但6一樣係！你放落股票度就搞笑啦。輸錢係風險，但贏錢都當風險？於是又有人發明咗只係要下半截嘅風險（當年我地戲稱為「無上裝」），但代入啲式都又係煩過梵高。
17. 講遠咗少少，想講嘅係：真正嘅風險，唔係vol，係在你估唔到嘅地方。唔想講「黑天鵝」（發明嗰個好執著的），但係類似嘅東西。3月呢啲咁嘅肚瀉式股市下跌，誇張，但唔係冇諗過。舊年你同我講3月股市會一兩星期跌三四成，我會唔信，但至少我知你講乜。但你話我知油價係負數，我就唔知你講乜，頂多話你知「只係理論上會發生」
18. 即係，你男朋友係陳冠希，咁佢偷食就唔係真風險！但你男朋友係正氣先生司徒華，佢都去偷食，就黑天鵝啦！
19. 買股票大跌唔係真黑天鵝，你買嗰時都知股票會跌。買債券然後佢清盤，都唔算。但你買咩原油ETF出現呢啲咁嘅嘢，甚至好似原油寶咁要倒嘔，就真係風險啦。
20. 好似唔關事但其實關事嘅故事：《一級雙雄》（Rush），入面Niki Lauda，有日耳曼人式嘅冷靜計算（特登造到同英國人James Hunt狂放做對比）。好似有場係落雨，佢就唔肯落場之類（大意）。聽落好矛盾，喂，賽車手都怕死？要知道，1970年代嘅賽車手，真係好易死。Niki Lauda戲入面有講，拿，我每次開車落場呢，都預咗有20%嘅機會死的（＊＊＊），呢個係我嘅選擇，我由做賽車手第一日已經知 — 但額外嘅風險，我係唔會制嘅。
（＊）真人真事，當年有某女同事問某男同事呢句嘢中文係乜，男同事答曰：羅凱珊正八婆。男同事唔係我啦
（＊＊）呢度仲衍生咗個好大鑊嘅問題：啲公司嘅risk management tool，都係啲數佬整嘅—我有理由懷疑早兩晚係炒晒粉的—因為人地冇預你油價可以負數—因為log normal distribution係不能出負數的。10嘅幾多次方係負30呢？你咪撚話我知你部機計complex number。咁同樣地，你log 負數，有乜後果呢？另文講下。
（＊＊＊）數學膠可以睇文（https://bbc.in/2XWptjv），其實混淆咗個概念。當然係唔會一場有20%機會死，其實係0.35%—但你玩足5季，就真係有兩成機會死的。
——————————————-
版務：收費專欄已推出，支持埃汾高質文章。幾舊水睇三個月，一星期三篇
請去呢度訂：bit.ly/2wVXndj
課程編號填: CC01
科咗水後後有Login及Password畀你
逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。
standard deviation中文 在 標準差Standard Deviation 公式的含義 - YouTube 的八卦
... <看更多>