有日一位小姐嚟到診所。
佢行埋嚟好似好熟咁：「喂，HELLO呀，你得唔得閒呀？」
我：「你係咪睇醫生呀？係嘅話我同你登記呀」
佢：「我早兩日先嚟睇完咋嘛，我嗰次立眼望到房入面係咪有部影印機呀？」
我感覺有詐：「我哋唔幫人影印嘅」
佢再懶熟：「我平時都成日幫襯開，醫生OK嘅」
我：「唔好意思，我哋唔方便幫你影印，你去文具舖呀」
佢：「我頭先就係過咗去啦，佢唔肯呀」
係咪因為你唔肯俾錢呀？你又走去懶熟呀？
我：「文具舖都唔幫你嘅話，更加唔到我哋啦～你去第二度問啦」
佢：「我影印兩本書仔咋嘛」
書…好似唔可以咁影印㗎喎，唔係有版權㗎咩？
我：「有版權嘅應該唔可以影印嘅，唔怪得之文具舖唔肯啦」
佢：「咩版權啫，兩本書仔咋咩，都冇人睇㗎啦」
咁你又睇？咁你又影印？你做咩企圖合理化自己行為呢～
我：「你去買好過啦～冇人會幫你咁樣影印㗎啦」
佢：「你信唔信我以後唔過嚟睇醫生呀啦？」
我信呀。
我冇出聲。
佢：「驚呀呢？」佢掟咗兩本『書仔』上登記處枱面…「仲唔拎去影？」
我：「唔好意思呀小姐，我哋係唔會幫你影印㗎」
佢：「我真係會以後唔過嚟㗎！」
我：「咁真係冇辦法啦」
佢：「好，你自己攞嚟，我見行過順便問埋你啫，商場個客戶服務實幫我影㗎啦」
佢拎住兩本書仔離開診所。
佢應該下一句對白就係同商場客戶服務職員講『我以後都唔嚟呢個商場呀！』
好行夾唔送～
ok影印 在 #超商影印 - 3C板 | Dcard 的八卦
請問ok有辦法直接插手機影印嗎. ... <看更多>