【龔成問答信箱】（Q12881-Q12900）
Q12881：
成哥，我係舊生，想麻煩你。關於現金流量表。
你話損益表的盈利，盈利是會計數字，100盈利不是賺100
咁我睇現金流量表啦，我暫時睇左5，6間公司年報，發現有啲問題要你通通（唔該你）
佢地流量表都大致一樣，由經營活動開始每項甘計到投資活動每項甘計到最后到融資活動。年報好，計完最后計出幾多。清晰
問題
1)三項，每項相加，就知今年年度有幾多係流出定流入，甘流出定流入依條數，係唔係可以代表盈利？
2)各項總數來看，經營活動關於賺錢是正數，代表盈利，負數代表蝕。
甘投資活動關於資產其實要正數還是負數好，正數係麻有正錢有盈利比公司，負數代表公司要强大發展，用於投資方面。
甘融資活動總數要正數還是負數好？是否負數好啲？我唔明流出定流入好
各項總數來看是否一致正數會好，，融資是否負數或少最好？
3)我睇左一間公司流量表，好怪，經營是正數10億（假設），投資負數20億（用於投資）。兩者相計，負數10億。再經融資又正數30億。再計20億，最后流入企業20億。。我睇該年報好似好亂，我再諗諗該公司是否發展中，賺錢（經營活動）條數少於果兩項甘多。我開始不明
當中意思。。所以腦煩你成哥
希望成哥解答，謝謝你
龔成老師：
首先，盈利不等同現金流。
另外，今年的現金流量增減，等如「經營」「投資」「融資」，3個數字相加。
1）不是。
其實盈利你可以睇翻現金流量表中的「經營活動」部分，這部分最頂，是以盈利作開始的，然後再就著非現金流的收入，以及非現金流的支出，而作出調整，最後得出最底的經營活動現金流。
2）有盈利不一定經營活動部分是正現金流，相反，虧損不一定負現金流。只是在正常的情況，較多企業，有盈利就會有正現金流，虧損就會有負現金流。
相信你在整個現金流量表的概念，仍有很多未掌握的地方。不過事實上，這報表是較深的。
3）你可以理解為，經營活動現金流，就是今年憑做生意，流入了多少現金，然後企業就會「花去」這些現金，例如用做投資，這就會在投資部分有現金流出（即是負數），同時，企業認為現金不足，就會進行融資，問銀行借錢，這就會令融資部分出現流入（正數）。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q12882：
龔SIR 想請教下點睇788呢隻股?
本人由今年4月一直月供呢隻股每月1萬 應唔應該繼續持有?
龔成老師：
中國鐵塔（0788）有質素的，只是有少少炒概念，所以這刻唔能夠太進取。
這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。
佢現時的收入正不斷增長，盈利都保持向上，但股本回報率不高，是這股較弱的地方。
這股最近是市場焦點，同時近期問答信箱好多人都問，我就知這刻有少少熱炒的情況，若分析佢市盈率，會見到現時仍然處好高水平，反映現時估值略貴。
由於這股有發展力，如你有貨，可長線。
但如這刻買入，就要自己衡量風險，同埋不要大注。小注分注慢慢入，都可以。因此，你可以月供，但唔可以月太多資金供，否則會太過集中風險。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q12883：
老師，我最近將你所講的劣質股，止蝕了，蝕錢真的好心痛！
龔成老師：
每個成功的投資者，都一定會經歷的，但止蝕是重要一步，如果你能夠從中學習，你之後一定可以賺得翻！
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q12884：
龔sir 你好 小弟乃投資股票新手 一直有追開你啲post 見你經常強調分注買入或月供優質股 平均買入價 但股票唔係一買就最少要買一手嗎？
如何再分注買入？以0002中電為例 佢一手500股要$39800 以你意思 當中可以再分拆多次買入呢500股？我有無理解錯？
另外想問除咗比亞迪之外 仲有無其他潛力股倍升推介？小弟今年32歲 除本身每月儲$15000 cash之外 暫買咗1211 285 939各一手
現想每月另外用$10000月供股票 初步心水有 3 66 每隻各$2000 其餘$6000就月供返1211 285 939 想問呢個組合會否太保守？唔該晒！
龔成老師：
我所講的分注，你可以用兩個方法做，第一就是月供股票，這是你同銀行搞的，一般買股票要一手手，月供就可以買入非完整手數的股，例如你每月入$2000，如果這刻股價$30，銀行就會同你入67股。
另外，分注我亦指分開資金去入，例如你有$10萬，比起一次過入，我會建議分3注入，每次約$33000，當然，你正式買入時，都要以一手手的模式去入，但我的意思，就是將一筆錢，分成幾次去入。
現時你持有的，都有質素，可持有，但比亞迪相關股已有兩隻，而我地不能同類太過集中的。要注意。
如果你投資實力不高，首先應該集中在平穩增值類的股票，例如盈富（2800）、恆基（0012）等，比亞迪（1211）這類潛力股，不能太多。
所以，建議你月供盈富$3000，恆基$1500、比亞迪$1500。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q12885：
龔 Sir, 請問384前景如何?
現價可入?
龔成老師：
中國燃氣（0384）有質素，企業仍然處增長階段，只是股價比較波動，這刻估值合理較上部，如果投資金額不太大，慢分注投資無問題。
中國的大方向，仍是支持行業的發展，這企業仍會長期受惠，前景正面，只是要注意翻，股價較為波動。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q12886：
龔成老師 , 我過往上過你「5堂版的投資倍升股課程」，現時的是8堂版的, 有咩分別？
因我剛剛重看了一次你舊班的Notes, 有了重溫的感覺,發覺有些東西原來之前學了一直沒有運用到, 也有興趣再上新的【投資倍升股課程】
1. 請問你說的” 到時，8堂班在估值、選股、企業評估大大增加了內容，對你投資有好大的幫助。”是否現在8堂的【投資倍升股課程】?還是進階班?
2. 新和舊的分別是否就是在估值、選股、企業評估大大增加了內容?內容有沒有一半以上不同/更新了?
3. 想請問將來進階班的內容大約係教什麼?
4. 舊生減$3000優惠,學費是否$5800?
5. 想請問有無舊生再上過新班?佢地有咩意見?
6. 因工作地方較遠,7點鍾多數趕唔到去尖沙咀,請問來緊仲會唔會考慮係星期六日開班?
謝謝回答
龔成老師
1）我是指8堂版的【投資倍升股課程】，比起5堂版的【投資倍升股課程】，內容已經大大提升。
至於進階班，則是另一些內容，課堂名也會用另一個，不過現時仍整緊。
2）其實，5堂版已是幾年前的課程，現時8堂版，內容已大幅提升，你預新內容，大約有6成，而我最重要在估值、選股、企業評估，這些學生反映當時5堂版不足的內容，大幅提升。
例如估值，8堂版會更具體講述，同時更多應用例子。同時增加了一份好有用的「企業估值表」比學生，這表能令學生，自己好有系統地分析，一間企業的優質度、估值等。
3）更多財務報表的分析，企業賺錢模式與質素的研究，潛力股的發掘方法。
4）如果讀過5堂版的【投資倍升股課程】，現時再報8堂版的【投資倍升股課程】，學費會減$3000，即是$5800。只要你報名時，提供相關的單據等證明就得。
5）有，我地現時每堂100人，每次都有5%-10%的同學是上過5堂版或再上多一次8堂版的同學，佢地的意見都是正面，5堂版學生話應用層面比之前的更好。
6）通堂我每年都會搞1、2次星期六班，但每次都會好快爆，你要留意我的FB宣佈。希望遲D見到你！
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q12887：
你好龔成老師，其實如果每個月只係儲到一兩千蚊，係咪月供股票最好？
因為我見到有人係咁踩月供股票
另外首選係咪應該係公用股呢？
感謝你....期待你解答
龔成老師：
每種策略都有當中的利弊，所以我地要正反都要知，月供的好處，就是將買入價平均，不斷入貨，原理就是儲錢。
月供有一個大前提，就是你所供的，一定要「優質股」，因此，如不懂選股，就供盈富（2800）。
將買入價的風險分散，是月供最大的好處，當然，有人會話每供無法足到股價平與貴的位，這是對的。但就我過往做10年銀行與證券行，見盡散戶投資成績，佢地都想足高低位，可惜唔成功，反而如果佢地簡單月供，會有更好的投資成績。
另外，月供另一缺點是手續費，所以你要先仔細比較各銀行，而我會建議你供盈富，因為你資金不多，你供個股會出現集中風險。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q12888：
龔成老師。本人今年39歲 月入42000
現在月供股票總額每月15000
月供股票組合如下
中電 1500
盈富 2500
中銀香港 2500
領展 1500
港鐵 1500
比亞廸汽車 1500
金沙中國 1500
HSBC 1500
長江基建 1000
想你給點意見分析給上述的投資組合，還有是否需要調整投資組合。
龔成老師：
上述所月供的，都是有質素的股票，同時，以你的年齡來說，供這些股都是適合的，無問題，你只要不理中短期股價就得，保持長期進行投資就可以。
金額方面，基本上無問題，如果你之後收入增加，可以加大這些股的金額，因為現時部分股票的金額較少，你要供一段較長時期先有一定的貨，你可以加盈富（2800）、長建（1038），然後再加其他，至於增長力較弱的股，例如匯豐（0005），就唔需要加金額住。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q12889：
老師，想請教下你，最近見到股市不停大跌，其實好似持續都會繼續跌咁，其實係咪可以入市呢？我想買幾手長和，你認為好嗎？
係咪應該人恐慌，我就應該瘋狂
定係港交所比較好
龔成老師：
「股市不停大跌」同之後會唔會跌，無關。
「好似持續都會繼續跌咁」其實無得有正推測的。
簡單來說，無人能預測股市走勢，我地只能分析平貴，同時不要被短期大市情況影響。
長和（0001）有質素的，現時已在合理區，可以分注投資，不過又未到恐慌期。這股只是平穩增長，不會高增長。
港交所（0388）質素略好，不過，從平貴度分析，就略貴。
我地當然會「人恐慌，我就應該瘋狂」！
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q12890：
老師，有個問題想請教下
因有些事需要賣出部分股票套現，假若股票質素相當，但買入價不同，應賣出正在賺錢的股票？還是正在虧損的股票？
龔成老師：
都不是。
買入價只是一個心理因素，你絕對唔可以比佢影響。你試想想，你持有A、B、C股，將來財富增長的增長，會視乎這幾隻股之後的企業價值及股價發展，與你過去的買入價無關！
首先，我地會分析企業的質素，然後就會分析當中的平當情況，如果這刻某一股相對較貴，就會先賣出這股。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q12891：
龔成老師,請問你有沒有書介紹係關於講企業嘅估值?因為我現在開始學研究年報,但發現自己還沒有好嘅底
同埋當計每股盈餘.每股帳面淨值時,應該係除法定股本定發行股本?
龔成老師
你可以睇《股票勝經》《年報勝經》，都有講少少估值概念，我的股票班亦則有不少內容是講企業估值的，因為這是一個較大的題目，所以用近2堂去講述。
你應該除已發行股數。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q12892：
龔生，請問：
1.點睇1837五谷磨房？1.51@100000股，百事1.8入股，值得長線持有嗎？健康食品類股份值得長線嗎？
2. 建行7.1 @23000股，但冇咩資金再投入建行溝貨了，是否一直持有？應否用1837換馬939溝貨？
3. 你認為目前仍是牛市嗎？怎樣看待聯儲局減息是否代表全球陷入經濟衰退而代表熊市再臨？
龔成老師：
1）五谷磨房（1837）業務不差的，佢係中國從事加工及銷售天然健康食品，產品組合由約90種由穀物類、豆類、堅果、果乾和其他天然原料。
佢的分銷平台包括在中國460個城市的超市中開設3900個直營專櫃，同時有線上渠道，包括天貓、京東和唯品會等電子商務平台，及社交網絡平台微信會員店。
業務的確不差，同時有增長力，但你的買入價就處略貴水平，就算近期股價回左，仍是有少少貴。
你暫時可長線，但就不能心急加注。
2）這股只是收息股，增長力有限。加注與否要睇你的投資目標，絕對不能因「拉低平均買入價」而加注，你應該分析，假設我再投入另一筆資金買這股純收息，股價不期望增長，是否合你的投資目標。
另外，我地亦會分析同一股佔組合的比例會否過多。
3）未到。
不過，我地唔會太著重分析牛熊，因為現時的經濟週期與過往年代已不同，盲目分析根本無意義。
我地只要分析企業質素、平貴，去衡量投資策略就得。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q12893：
老師，我最近閱讀《財務自由行》，除左儲錢及購入優質股外，我都為自己定下一個比較長遠既目標- 置業。
知道尚有一段距離，但閱讀途中有些問題，希望請教文中提及尋找自己較熟識既地方再去睇樓可能超過十至二十次左右，從中去學習同了解市況，但我有問題係，咁我應該幾時進行好呢？
龔成老師：
如果你有興趣睇樓的話，其實任何時候都可以進行，雖然你正式買樓的時期可能是數年後，但不代這刻不能睇樓，因為這可以增加你物業知識。
睇樓是十分簡單的事，你只要入地產舖，大概講你的情況（可以修飾一下），然後就可以睇，整件事比你想像的簡單。
到你正式想買的半年前，就可以不斷睇（這時就算是認真期），買樓一定要多做功課，花多少少時間去準備。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q12894：
老師你好，我去年買左樓花，就收樓，因為用建期付款，出年會比$50萬左右首期。目前家庭有現金12萬及股票約30萬，家庭月儲約3萬左右。
我想問我呢個情況應該點樣運用手上既資金好？
謝謝
龔成老師：
由於你將要支付$50萬首期，因此，你其實應該持有較多現金作準備。
因為中短期投資，都會存有不確定性，無人知你到時的市況是好是壞，而我地投資並不是「博」。你每月儲到$3萬，你先要計算，多少股票數目可以留，合共儲到多少現金。
如果可以的話，當然賣出股票的數目愈少愈好。
因此，每月$3萬其實不建議投資。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q12895：
老師您好～本人是你的長期Fans～因太忙暫未分配到時間去上您堂，但有睇開你既書、短片、專頁、經濟一週等，幾乎係每個星期唔睇下會覺得自己浪費左人生。。
。希望今年年底至明年年頭有較鬆洞時間，有幸親身跟您學野。
本人今年33歲，前年與男友夾首期購入上車樓（由本人單名持有及供款），上月結婚。
幾年前有3年左右投資股票經驗，雖然都算係贏多，但睇6-9個月先夠膽買1隻半隻然後唔夠膽長期持有太耐，然後因為要買樓所以放哂。
最近又開始叫儲到少少錢，想再開始番投資。
個人正職月入30K，兼職約月入16-18K，每月供樓＋保險＋個人開支約18K（其他家庭開支及每年旅遊等主要洗老公的）
現手上個人持有現金25萬，每月預計可儲蓄約3萬
並有以下中長期目標：
1. 5年內與老公各自儲到約150萬，共300萬首期，購入約1000萬左右的600以上尺中型單位，由老公持有並供款。（佢份工5年後可領取住屋津貼補貼到些少）
2. 現有小型單位繼續持有，供到5年後放租比人地幫我供樓。（此部分預計到時可以收支平衡）
3. 7年後想達至個人基本財務自由，甚至唔再做份正職，但會繼續做兼職（因為係興趣），到時收入每月僅約20K。
現計劃每月按您的方向「半投資＋半保留現金，待大跌市入貨」，由下月起進行：
1. 現有現金想拎15萬於合適入市，餘10萬備用，暫時睇緊下列股票：
- 0700 騰訊（Q1. 低見280以下想分注入貨，呢個係咪合理價/便宜價？）
- 1299 友邦（Q2. 低見68以下想分注入貨，呢個係咪合理價/便宜價？）
- 0590 六福（Q3. 現價$19.34, 低過19蚊係咪合理價/便宜價？）
- 0178 莎莎（Q4. 佢而家低到咁，想分注入，但唔知分注點分好，佢又冇得月供搞到我好糾結，老師您點睇？）
- 1448 福壽園（Q5. P/E低過25/低於$6.5時 應該就會忍唔住分注入，係咪都係太高？）
Q6. 以上呢幾隻老師您點睇？以上股票可能只持有5年後就按情況賣出，以換成流動現金作部分首期用。
2. 每月以15K進行月供股票，計劃先供5年，並於5年後繼續持有或視乎情況考慮減持並以有關資金轉買其他：
- 2800 盈富 2000
- 0012 恆基 2000
- 0027 銀娛 2000
- 1177 中生製藥 2000
- 0011 恆生/2388 中銀香港 1500（Q7. 您覺得我既情況適合長期入邊隻多D？）
- 0823 領展 1500
- 0003 煤氣/0066 港鐵 2000(Q8. 2隻都好壟斷市場，煤氣增長潛力應冇港鐵咁高，但港鐵近年問題又好多，您覺得我既情況適合長期入邊隻多D？定索性各1000? 但會唔會太少冇乜意思？）
- 1211 比亞迪 1000
- 3888 金軟 1000
Q9. 以上月供股票既安排會唔會太分散唔係幾好？會唔會有邊D潛力/穩定價值冇咁高/風險過大，以致分配落去既必要性冇咁高，應該留番黎分番去另外幾隻月供1000-1500果度，拉高番個比例？
2. 每月現金儲蓄 13-15K，待大跌市入貨，入貨目標將包括以上所提及的股票，以及：
- 0548 深高速
- 0868 信義玻璃
- 3918 金界控股
- 6869 長飛光纖（12蚊以下分注入）
- 0388 港交所（等淡市周期入）
Q10. 並想問問以上所選既呢幾隻 及 各隻月供股票分別的合理價/便宜價大概係幾多？因為每月現金儲蓄都想係待大跌市入到貨。
Q11. 以上揀既各行業或各隻股票有冇問題？
Q12. 最後就係想問，老師您覺得以上既分配有冇問題或需要調整之處？同埋咁安排之後，我既中長期目標是否可以達成？
Q13. 另外我大概計算過，如果想5年後唔放月供股票，但以現有既15萬可動用資金＋每月13-15K現金儲蓄進行投資，以令5年後可有150萬作首期用，即我每年大概要於此部分平均有12%複式增長，咁計係理論上岩唔岩？同埋是否可行？
抱歉問題太多，期待老師的指教！
龔成老師：
基本上，你的目標方向是可以的，你地各自5年儲到$150萬有可能，保持儲蓄、投資就得。
至於7年基本財務自由，相信都可以，但這個要睇投資市場，以及你的投資能力，滾大資金的程度。
1）騰訊（0700）$280以下，只是合理區內，未到平宜區，但你分注都可。
2）友邦（1299）在$68以下，可分注投資，合理區中下部。
3）六福（0590）長遠有投資價值，但中短期會波動，未到平宜區，不過，這段時間有機會有不錯的投資機會，零售股，有危有機。
4）莎莎（0178）中短期仍弱，但長遠計，有投資價值，你最好每2、3個月入一次，合共3、4次。但總資金不能過多。
5）福壽園（1448）經常處略貴水平，$6以下先合理，你$6.5開始第一注可以。
6）上述的股票，都是有質素的，因此，你可以分注投資，5年都算是一個中長期，這段時間都足夠令企業增值，到你買樓前一年，先慢慢將股票賣出套現。
7）盈富（2800）
8）港鐵（0066）可以入多少少。
9）雖然有少少散，但這刻的配置可以，你可以加多少少比亞迪（1211）至$2000。
10）如果你再入這些股，組合會變得好散，建議集中翻你原有的目標股，除非這些股大跌先考慮。
11）無太大問題。
12）你保持這計劃進行就得，一邊入貨，一邊儲現金，如果現金數目開始多，而大市又沒有向下，你都可以將部分現金，分注投資盈富（2800）。
同時，你一定要掌握選股、投歉時機、企業估值的能力，如何運用餘下資金，將會是其中一個完成目標與否的關鍵。
13）一般來說，如果你將「股息再投資」，這股價增值計，預期有合共8%-10%的回報。所以，能否取得12%以上，要視乎你的投資實力，能否把握一些較好的投資位買入，懂得企業估值等概念。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q12896：
老師你好, 我同太太澳門人30歲, 共月入8萬, 月支出3萬其中50%供樓(負債300萬,剩餘供款期24年). 1年前, 因為當時2人月入較低且供2個單位, 所以賣了其中一個唐樓單位, 現手持現金100萬及15萬銀行基金(3.6厘).
最近家人建議利用投資細價新樓(首期100萬月供1萬6, 出租8.5K) 但出租回報率低於2%加上澳門會有新經屋政策, 所以暫時擱置了.
現打算用部分資金建立股票組合 另保留現金作未來投資樓市用途, 請問現在應如何運用手頭上資金和物業, 以及應如何選擇股票組合?
補充資料: 現住物現估價約800萬元, 長遠目標想有3個物業.謝謝老師
龔成老師：
我並不建議在物業上經常做買賣，因為交易的成本較高，因此，盡量在決定前，都以長期的投資組合作依歸。
同時，我建議用《財務自由行》所講的「888」模式，即是每8年投資一物業，這可以有效減少同一經濟週期買樓的風險。同埋，這是一個「只入不出」，儲物業的模式。
這刻，你先集中股票增值，但就不能太進取，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）。
你這刻可以將$50萬，分注投資。同時，可以進行月供，月供上述股，加少少潛力股可以（只要金額不多無問題），例如比亞迪（1211）、中生製藥（1177）。
另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q12897：
龔成老師你好，我有一點財務問題想請教。
我家下手上有流動cash 35萬，想請教如果想3年後可以增到有100萬，應該點投資最為正確？月供股票會唔會所需時間好耐呢？
龔成老師：
坦白講，$35萬要3年滾存上$100萬，並不容易，要有好高的回報先做到。而月供股票亦較難做到，因為這是較穩健，但增長力平穩的方法。
以下的方法較進取，你自己衡量。
將資金集中投資潛力股，分配到3-5隻，但這一定風險高，你要有選股的能力，要比市場早一步找到潛力股，目標是倍計的回報。同時，不能太心急入貨，你要有企業估值的能力，在較平宜的價位買入。
只有用這個方法，先可以3年內打上$100萬以上。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q12898：
龔成老師你好:想請教一些問題:
本人33歲, 已婚, 有2個小朋友
現時本人每月收入26K左右
家庭開支每月約13K
1) 扣除每月個人消費, 大約每月只有8000可用作儲蓄及投資, 是否每月儲現金3000, 另$5000用作月供股票? 有什麼組合建議?
2) 本人約10年前購入月供形式基金, 現時仍然負值, 應繼續持有還是斬纜轉而投資其他股票?
3) 你認為應該為小朋友購買保險式的儲蓄計劃? 還是為他們購買具濳力的收息股, 待日後升值用作將來升學用途?
4) 市面上有退休年金計劃, 5年間每年投入固定金額, 然後退休年齡可領一筆儲蓄, 這樣的儲蓄計劃又應否進行?
5) 現時持有0005, 02777, 0636, 是否應繼續持有?謝謝!
龔成老師：
1）你可以考慮盈富（2800）$2000。
另外再加1、2隻（每隻$1500）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。
2）你最緊要分析翻該基金的質素、投資策略，前景。但如果佢過往多年的回報表現，都比投資市場為差，建議你賣出較好。
3）小部分可以投資這類保險式的儲蓄計劃，另外有些可以月供盈富（2800），佢地有長時期可以有財富增傳的能力。
4）這類是回報較低的項目，但好處是風險低。因此，在投資組合中，都可以視為其中一部分。但如果你本身懂得投資，這部分佔比可較少。
5）匯豐（0005）可持有，但這只是收息股。富力地產（2777）業務可以，但負債較高，因此不宜持有太大注。嘉里物流（0636）質素中等。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q12899：
龔成老師你好!我現與哥哥一起住在公屋，300呎左右，每月付一千多元的租金。
最近於居屋2019抽中了第1批，以數據分析來看，都只會可以選購1房單位，大概3百多萬。
很多人說有公屋已是人生嬴家，你同意嗎?
我看過你的書，認為供樓才是投資，租屋只是支出，不會有所回報。 但考慮到現時樓價已經很高，何況再轉賣都受到很多限制，不知是否應該把握今次機會買樓，可以給些建議嗎?
我是公司老闆，月入2萬左右, 哥哥打工，月入2萬左右，二人都未婚。
龔成老師：
住公屋可以減少有關現金流的支出，在某些地方可視為較有優勢，不過，這只是支出，而我地最重要的，是要提升自己的賺錢能力，如果有較高的思維，其實這些支出，只是一些小數目。
我會建議你買居屋，在長遠計，擁有自己的物業始終較好，居屋在自住中，比私樓節省了一定的現金流，因此這已經是一個不錯的選擇。
如果長遠你收入、財富不斷上升，終有一天可能無得住公屋，而我希望你不要因公屋限制自己而不去創造更高收入，所以，有自己物業始終較好。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q12900：
你好龔SIR,近期00005同3988都跌左唔小，如果依家大手買入是否合適時候，2選1既話邊個比較好？
龔成老師：
首先，這兩股都是收息股，股息不錯，但不要對股價有太大的期望，因此，你要分析翻，是否合符你的投資目標。
另外，不建議在組合中，太過集中在銀行業，你要自己平衡。
現時股價只是合理區，未到掃貨區，你可以分注投資，但不能用盡資金。如2選1，就匯豐（0005）。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。
另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
hsbc e利是 在 姜濤送上e利是、保險及簽賬獎賞陪你實行各種可能 - YouTube 的八卦
來到虎年，祝大家每個付出都有豐厚收穫！滙豐1.23 Go Goal Day陪你向目標進發，一路送上 e利是 、保險及簽賬獎賞，鼓勵你Go Go Goal！ ... <看更多>