《狂舞派3》影評
「為咗夢想，你可以妥協到幾盡？」
（含劇透，慎讀！）
—
《狂舞派》續集要成功，
其實唔難，
但黃修平導演偏偏就揀咗，
最難行嘅一條言志之路。
—
「為咗夢想，你可以去到幾盡？」
《狂舞派》嘅呢句對白，
至今仍然如雷貫耳，
但由2013年走到2021年，
香港好似已經變成一個，
唔係我哋可以發夢嘅地方。
—
「為咗夢想，你可以妥協到幾盡？」
只要將句對白改一改，
就可以變成電影最核心最重要嘅命題，
—
面對住呢套作品，最多人問嘅一條題目，係《狂舞派2》去咗邊。其實《狂舞派》續集要成功，比起其他比較新晉嘅導演都更為容易，《狂舞派》第一集口碑載道，會有固定客源，電影未上映已經有一定嘅基礎。上集拍「舞林大會」，今集大可以將電影嘅規模玩得更大，玩亞洲賽、國際賽、世界大賽，上集得幾丁友跳舞，今集可以群P，總之跟番實第一集成功嘅方程式，一定無得輸。
—
但《狂舞派3》係一套點樣嘅電影呢？據我嘅睇法，佢甚至連係一套「跳舞電影」都稱唔上，改做《狂RAP派》都絕對無違和感。而就算有跳舞場面，一係斬頭斬尾，一係跳中有戲，令觀眾無乜機會可以真正欣賞演員嘅舞技，而最過癮嘅係，戲入面亦有一場跳舞比賽，喺影完對手跳勁舞之後，主角LOKMAN嘅還擊竟然以極短嘅時間就比導演剪走咗。
—
正正因為咁，《狂舞派3》比某啲觀眾鬧爆，令部份人大失所望，我絕對可以理解，但個問題係，點解一手好牌，明明有機會可以成為大受歡迎嘅電影系列，點解要「自毀長城」，點解要拍成咁？
—
一切一切，從故事嘅中心命題講起。撇除跳舞元素嘅縮減，《狂舞派3》另外一個極端嘅改變，係電影風格由青春熱血嘅，一扭而轉而成為寫實沉鬱嘅調子。戲嘅一開始已經開宗明義，《狂舞派1》只係一套電影，所謂追夢，其實只係一個一戳即爆嘅BUBBLE，現實往往令人抖唔到氣，要交租，會比人由工廈趕走，要比家用，唔比瞓覺，就連要點樣笑，電影入面嘅角色，都無選擇嘅權利。
—
如果話《狂舞派》係青少年嘅童話，其實《狂舞派3》仍然係成年人嘅童話。見到電影入面每個角色對現實嘅妥協，有時會睇到我哋咬牙切齒，點解咁樣都肯制？點解咁仆街都做得出？大家都係人，為咗要追更大嘅夢想，每個人都要作一定程度嘅犧牲，例如要為政府財團塗脂抹粉，要放棄拍拖嘅時間，要笠住個大頭佛幫無良地產商RAP。揞住良心嘅背後，其實電影入面無一個主要角色係壞人，做小惡嘅背後，係為咗大善，為咗兼顧生活同追夢，大家都努力咬緊牙關。
—
為咗達成虛無縹緲嘅好事而做嘅壞事，同純粹地做壞事，到底有咩分別？答案就係我哋無忘記到自己嘅初心，時時刻刻都可以做「選擇」，可以乘時投袂而起，即使偶有歧見，但兄弟爬山，各自修行。喺電影嘅最後，一眾跳舞主角為城市活化計劃起動禮擔任跳舞嘉賓，大家都為最後一場違心嘅表演而鬆一口氣，但HEYO突然出場搗亂，跳舞主角們積極配合，最後成功破壞成個動土典禮。
—
只要人仲有選擇，那怕就剩低一絲嘅空間，就有機會喺妥協嘅狹縫入面種玫瑰，而將電影嘅呢一個MESSAGE放落去分析呢套電影嘅概念，就更有意思。明明電影可以無壓力賣到一定嘅票房，明明電影有潛力可以變成一個長賣長有嘅系列，明明只要符合觀眾期望就可以輕輕鬆鬆，但導演選擇言志，選擇用呢套作品為觀眾去解答咩叫做真正嘅「唔妥協」，咩叫唔走入「建制」，喺創作自由仍存之下拍咗呢套離經叛道，但緊扣香港現況嘅《狂舞派3》。
—
曾經睇過導演嘅一個訪問，問點解續集唔係《狂舞派2》嘅問題，導演戲稱話要突破「續集魔咒」，但睇完電影，與話係擺脫魔咒，不如話係全心顛覆，反其道而行，唔要食全球電影都沉淪緊嘅老本。
—
電影嘅首映擺喺高先電影院舉行，喺香港建立一間以香港電影為本位嘅戲院，喺崇尚大製作嘅彈丸之地搞革命，配合另外一場電影顛覆《狂舞派3》，縱使作品係有沙石，唔係第一下就令人有好感，但我，又點可能唔支持呢？
heyo意思 在 重操嘻哈(Retroll) - «嘻哈重組»feat. Heyo[修正檔大會2019 ... 的八卦
retrollhiphop #重操嘻哈# heyo #修正檔大會Everybody move重操重操重 ... 電視多都知我黎自街頭你難以接受我腳步輕浮唔好撚 意思 我要騎劫主流 HeYo here ... ... <看更多>