【龔成問答信箱】（Q15601-Q15620）
Q15601：
成sir ，你好。我係一個澳門大學生。仲有一年畢業，想問下你認為依家疫市，買得過2800 盈富基金嗎？因為我係澳門哥邊手續費貴，所以只想集中供一隻。
打算3月開始供，每月$1000，供三年左右。謝謝。你的建議
如果依家夠錢買一手，會唔會比月供更好，因為唔想蝕手續費
龔成老師︰
簡單來說，月供股票就是你每月將現金，買入某一隻或多隻股票，慢慢咁樣儲貨。
月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣，去減低價格波動的風險。
所以，你唔需要大過在意佢而刻架平貴，現在開始供就可以。記住要長線進行，才會達到理想效果。
其實一手手買都可以做到以上效果，你現金只要平均地慢慢投入股市（如保持住每2個月定額買一手）就可以。2個方法都可以，一手手買更節省了銀行月供收費，但你必需確保自已可以有自律性地進行。
------------------------------------------------
Q15602：
老師，之前係FB聽到你分享油價，真係好多謝你。自從上咗你的課堂後，明白油股是屬於商品企業，作為小市民不宜沾手。
以前買股票，只是睇吓電視啲財經分析員推介，就入市，辛辛苦苦儲嘅錢付諸流水，我一直等機會想放咗佢，但當然啲股價都上唔到我買入價（over$10).
但2018年發現老師的教學後，開始只買房托，長建等優質股和少量潛力股，個心定了很多。
昨天我還和我的客戶分享買優質股，因他只懂買匯豐收息，又叫佢睇下老師的網站了解多一點如何為自己的資產增值。
真心感謝老師，叫我哋睇多啲財經書了解何謂資產，不再是無方向亂衝輸錢。
龔成老師：
咁就好了！
我希望教大家正確的投資概念。
買股票不是炒賣，是買入優質股，長線投資，建立一個組合，在可承受風險的狀態下，爭取合理回報。
選股是一個大學問，你仍要保持進步！
------------------------------------------------
Q15603：
龔成老師你好。26歲新手剛讀完老師的財務自由行 想開始月供股票，打算月供兩萬。想問組合
6k 盈富 2800
4k 招商局 144
5k 地鐵66
5k 恒基12
組合選擇/分佈有再改進空間嗎? 謝謝龔sir!
龔成老師︰
我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。
以你年紀計，應以增值為主。而時組合選股和資金分配可以，除了招商局港口（0144）。
招商局有一定的質素，不過，近年有關貿易的行業，賺錢能力低左，同埋風險大左。另外，股本回報率低，加上中國進入經濟增長較一般的年代，都令這企業的賺錢能力較一般，整體質素而言，算是中等。
而且你組合中欠缺了一隻較有潛力的增長股，我建議你用以下其中一隻，用來取締招商局。
潛力股︰比亞迪（1211），中生（1177）、福壽園（1448）。
------------------------------------------------
Q15604：
你好龔成老師，想幫親戚詢問一下收息問題
她今年接近60歲 接近退休 想將大約50萬現金投資落收息股中
佢想有以下要求:
1. 穩定收息, 年息率達5%以上
2. 較不受經濟週期影響
3. 財務狀態良好
4. 市值夠大令人有足夠信心
5. 低可能性賺息蝕價
現在暫時有以下考慮：
- 6823
- 341
- 52
- 1373
請問以上4隻如何，還有有無其他更好推薦?
萬分感謝
龔成老師︰
其實第5點係唔需要理會，因為你退休係希望用收息股，為你長遠提供穏定現金流。基本上你唔會，更唔應該將佢賣出，除非佢質素突然變得好差，否則唔應該會現賺息蝕價的情況。
你選擇的4隻股票，國際家居零售（1373）和香港電訊（6823）可以。至於大快活（0052）和大家樂（0341），始終餐飲業都會較受經濟周期所影響，你見現時快餐店人流就可以知道。佢地股息金額會因此出現較大波動，所以唔係咁建議用這2隻股票。
你可以考慮以下幾隻，都符合你親戚要求︰
工用事業︰港燈（2638）
銀行股 ︰工行（1398）、匯豐（0005）
房地產 ︰置富（0778）、陽光（0435）
買入時，要留意唔好過份集中單一股票或行業，要平均分布。另外，由於現時大市只在合理區，要買入必需分多注，慢慢入。
------------------------------------------------
Q15605：
老師。我自己都有月供比亞迪，領展同盈富基金（分別為$1500，$2000，$2000）作中長線投資，正在考慮應不應該加大月供金額，每隻多$500-$1000一個月。
同一時間自己現金比例不多，又想儲多一點現金。兩者之間有點矛盾，不知該怎麼做會比較好。
龔成老師︰
其實現金只會不斷貶值，長遠令自已處於不利位置，我地要儲的應該是優質資產。但人總要留一些現金，作日常消費也好，作急事時應急也好，一定數量架現金係必需的。
以你情況，我建議你唔好加大金供金額。先把這個額外資金儲起，由於現時股市只在合理區，你可以等佢大幅回調時，再用這些現金大力去掃平貨。
同時間，你也用這些資金，幫自已儲定一筆應急錢，以備不時之需（如失業、大病等開支）。
------------------------------------------------
Q15606：
老師你好，我想肺炎好返來上堂，另外小弟2年後一家人移居大馬，生話費最少要3.5萬
小弟現金約500萬，樓售出約300萬，2年後可儲100萬，移居後只有被動收入，如900萬買股票收息退休，有那些可選擇？小弟想買以下股票收息
1398/3988/939/405/435/2778/778/3/1928/12/6823，安全嗎？
龔成老師︰
以股息率5%計算，900萬大約可以為你每月創造3.75萬現金流，足以達成你目標。接著就是你投資組合，能否為你造到這效果。
首先，煤氣（0003）、恆基（0012）和金沙（1928）是平穏增值股。煤氣股息唔高，而後2者雖然股息可以，但平穏增長股相對收息股都會有較高波動性，就算你真係想買，我都唔建議太多。
其餘的都是合格的收息股，買入目標價以5%以上為主，但操作你要留意番3點︰
1） 唔好過份集中單一股票或行業，要平均分布。
2） 由於現時大市只在合理區，要買入必需分多注，慢慢入。
3） 港燈（2638）都是十分優質的收息股，你可以加入組合，多一個行業作選擇。
------------------------------------------------
Q15607：
龔sir,想請教下月供270定1928會好d?
我是新手，25歲
龔成老師︰
你還很年輕，財富增值上你應以增長力為主，以上2隻都是平穏增長股，都適合你。
粵海投資（0270）正面的，這企業有多個業務，同時都處於賺錢的狀態，整體不錯。加上最大的水務部分，更是香港東江水，即是不斷賺香港人錢。
由於業務穩定性強，現金流好，因此企業質素理想，同時長遠有投資價值。但這股現時在合理區較上部，投資時要分注。你以月供的模式進行，適合的。
金沙（1928）有質素，博彩業本身是一個高毛利行業。集團多年的博彩業營運經驗，高穩定性，加上領先同業的資產規模及行業領導，都是金沙優勢。
雖然最近有很多不利因素出現，但只要我地細心分析，全球經濟下行、人民幣疲弱、股價下跌全都與企業本質無關。另外，你睇番2015年（澳門賭業面不景氣年份）資料，金沙在大環境欠佳之下，依然保持派每股$1.99的全年股息，可見金沙對自己的財力甚有信心。
整體而言，近期對金沙不利因素較多，但長期投資價值仍在。現時股價在合理區，要買最好分注或月供。
其實2隻都優質，但以優質程度和現時投資價值計，金沙會稍稍佔優。
------------------------------------------------
Q15608：
你好 龔成老師 想請教一下投資策略
本人28歲 手上大概有300k股票分別購入 建行和中電作收息之用
另外亦開始每月進行月供 分別
2800 （2k）
1211 （2k）
0066 （1k）
現在手持現金600k, 想請教龔成老師應點佈置現金？本人希望每年有10-15%增長？
另外，想問一下龔成老師點睇呢兩隻股票1299 0548？
謝謝
龔成老師︰
我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。
以你年紀計，應以增值為主，你月供組合正確。但建行（0939）增長力唔強，只能作收之用，唔係咁適合你，可以轉為其他平穏增值或潛力股。
現有資金可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、長建（1038）、粵海（0270）、領展（0823）、深高速（0548）或潛力股︰比亞迪（1211），中生（1177）或福壽園（1448）。
由於現時大市只在合理區，你現有60萬資金可以先投入一半，用"分注"形式買貨。餘下一半資金，就等大市出現一定程度的下跌，才大力度掃貨。然後長線投資。
友邦保險（1299）不差的，企業有一定的質素，有品牌、有規模，生意雖然做到較大，但仍有增長力，不過就不是高增長，只是平穩增長。
不過盈利就有少少波動，但這都正常，因為保險公司有投資相關收益，所以這亦會令股價略為波動。這股有長線投資價值，但現價就處合理區，分注較好。
深圳高速公路（0548），同樣是不錯的股票，收入主要來自公路路費。現時9成收入依靠路費收入，另外佢都有做環保事業，這部份會有增長潛力，現階段佔比重很低。預期此股長遠會由收息股，慢慢進化成平穏增長股。
現時股息率雖有逾7%，但要留意計算當中包含了上年特別股息，這股息並不一定每年都有。扣除特別息計，只有不足4.3%，未算吸引，但月供的話是可以的。
------------------------------------------------
Q15609：
你好龔成老師，我想幫父母向你請教投資方向：
他們分別是59及62歲，現時兩人每月合共3萬，儲2萬。
現金40萬，約50萬股票：
匯豐（5） 8手@$63.3
中國石油（857） 25手@$3.5
瑞聲科技（2018） 1 手@$50.3
洛陽鉬業（3993） 10手@3.18
他們希望退休前可以投資約400呎的單位，你會建議應該如何投資分配分配去達至這個目標？謝謝。
龔成老師︰
已65歲作為退休年齡計，你父母隔離退休都只餘下3-6年，時間唔算長，所以只能作一些較平穏投資。
現在你每月儲到的$20000，可以用一半去做月供，其餘先儲起，用一邊月供一邊儲蓄的策略。月供方面，我建議你1/3放在平穏增長股，2/3放在收息股。
平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、長建（1038）、粵海（0270）、領展（0823）、深高速（0548）。
收息股︰港燈（2638）、香港電訊（6823）、工行（1398）、匯豐（0005）、置富（0778）、陽光（0435）
由於現時大市只在合理區，你現有40萬資金可以先投入一半，用"分注"形式買貨。餘下一半和每月所儲倒的資金，就等大市出現一定程度的下跌，才大力度掃貨。然後長線投資。
至於你現時持有股票，匯豐（0005）和瑞聲（2018）無問題，但洛陽鉬業（3993）業務波動比較大，業務層面算是不差，都有投資價值，但注碼就不能太大，建議你沽出部份轉至上述優質股中。
而中國石油（0857）由於只是商品類，質素只算一般，建議你慢慢換碼至以上優質股。
------------------------------------------------
Q15610：
老師，我近來有一個想不通的財富問題，應該也是普遍年輕人的問題，想請教龔成老師。
背景：和男友2年後打算結婚
今年25歲。結婚後需要有樓一起住。但我們現在每月只共賺4萬幾，現金不多，有月供股票。
1. 如果要夾硬2年後買樓，家人可以幫助大概40萬（要慢慢攤還），其餘要自付。雖然可以早點擁有自己物業，但因為錢不夠，所以地區和面積就會有所限制。
2. 亦有考慮先租樓自住，再繼續抽居屋（未必抽到），而公務員亦有得排居屋（但起碼十年），草多點錢作投資，先再買樓住。但有人又話租樓即是白白十年幫人供樓，並不明智。擁有自己物業的時間也會推遲了。
我應該怎樣做才是最佳的財富管理方案？謝謝老師。
龔成老師︰
租樓是否一定比買樓差，因為租金一去不復返，買樓供款就會係提升自已資本? 其實你供樓中的利息，同樣會一去不返。
由於每個人都有住屋需要，所以重點係要"供得起"，如果供得起，基本上樓價波動對你係無即是的關係。
你現時要做的︰
一） 抽居屋
二） 多去看樓盤，留意定一些自已可支持範圍內物業，為自已做好準備
三） 保持用月供股票方法，為你資金升值。
現時香港樓市比合理價，依然稍為貴少少。樓市再向下調，令樓價下跌10%左右的話，我覺得已經係可以入市的位置。
所以你唔好諗夾唔夾硬黎，而係應該睇住個市況，再見機行事。到"合理位置"，而又"供得起"的話，就可以入市。
------------------------------------------------
Q15611：
龔老師想問一問一隻冷門股票 1278
我4年前0.27買
近兩年他恢復派息，不明白為什麼股價不斷插水
應繼續持有嗎？感謝你
龔成老師︰
中國新城鎮（1278）主要於中國從事土地開發，以及城鎮化投資、物業租賃業務。集團聚焦長三角、京津冀等全國核心經濟區域。
佢2017年開始重新派息，但睇翻佢2017年實際盈利同比無乜增加到，到2018年更出現明顯倒退。
此股賺錢能力好一般，質質只算中等。長遠計，你都係慢慢沽出，再轉至其他優質股會較好。
------------------------------------------------
Q15612：
龔成老師本人今年35，與老公月入8萬，另外每年有二十萬花紅。
現租村屋$9000/月，有兩車已供完。
另外一間新私人樓今年6月收樓，打算放租。
日本有一物業，每月收$2000租金
我們打算十年後退休移居外地，想請教如何理財現有財產。
我地每月供樓$16000，年金$12000，月供股$4000買匯豐同盈富，另儲$4000於聯名戶口。
手持流動資金$1百20萬。
下一步應該點做先可以確保10年後移居唔洗為兩餐擔憂。
謝謝
龔成老師︰
大前提你要了解你將來生活地方的生活指數、你過到去係唔做野/定會找工作、現時物業變賣，是否足夠在新移居地買樓等等。知道你所需洗費，才可以有效在今日進行規劃。
其實你和你先生收入唔算低，現階段我建議你加大月供金額，利用要股票去為你創造一個財富增值平台，選股方面以下都適合你。
平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（0823）、港交所（0388）、深高速（0548）
潛力股︰比亞迪（1211）、中生（1177）或福壽園（1448）
策略上，你每月可動用投資資金一半做月供，另一半就先儲。
由於現時大市只在合理區，你現有120萬資金可以先投入一半，用"分注"形式買貨。餘下一半和每月所儲倒的資金，就等大市出現一定程度的下跌，才大力度掃貨。
假設你們去到新移居地唔會工作，想靠現金流維持生活，而生活費假定為4萬一個月，你就需要有960萬資金（以股息率5%計）。
以恆指過去年平均回報10%計，你每月投資$35000，再加上你現有120萬，10年後大約會增值至約980萬，這樣就可以達至新移居後不用工作的目標。
------------------------------------------------
Q15613：
老師，12恆基現價可小注入嗎？大概幾錢先係跌入便宜區？如果只買2手，到時紅股10送1，會否按比例派發比2手既人？ 謝謝
期待下一次既投資班開課，因為咁岩5月去2星期旅行，黎唔到上堂，好有興趣想報名
龔成老師︰
恆基（0012）是一隻有質素的股票，前景正面，再加上佢是全港持有最多農地的發展商，長遠的價值一定會慢慢釋放。
由於佢有質素，所以價格一直都唔平。現價處合理區，如果要等佢平宜價才入，你預佢股價要回調多最少1成，才初步進入平宜區。如你本身無貨，現價小注可以。
派發紅股會按你持有股數分發，以恆基每1手就有1000股為例，10送1即你每1手會收到紅股100股。而你有2手，則可收到200股。
但你要留意翻，十送一其實只是財技，對本質並無實則影響，當十送一後，持有股數會增加，但股價會自然調整，所以這不是投資一隻股票的重點，重點永遠都係講緊企業本質和長線發展。
如果你5月上唔到堂，你留意我FB，有新時間會馬上在FB通知大家，預祝你旅途愉快。
------------------------------------------------
Q15614：
龔成老師本人月入5萬，年4X歲，樓按仲有290萬要供，現金有250萬，可以做甚麼投資呢？
全部保險在10無內供完，除了一份年金外。
謝謝
每月可投資資金：5000-10000
龔成老師︰
我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。
以你年紀計，依然有富增長需要。現在你每月儲到的錢，可以5成去做月供，其餘先儲起，用一邊月供一邊儲蓄的策略。月供方面，你可以主力投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、長建（1038）、粵海（0270）、領展（0823）、深高速（0548）。
另外，也可以小部份投放在潛力股︰比亞迪（1211），中生（1177）或福壽園（1448）上。
由於現時大市只在合理區，你現有250萬資金可以先投入一半，用"分注"形式買貨。餘下一半和每月所儲倒的資金，就等大市出現一定程度的下跌，才大力度掃貨。然後長線投資。
------------------------------------------------
Q15615：
龔sir, 823是否已變質同前景不再明朗，股價跌好多，連ceo都減持....係咪佢覺得823好難再做到好業績支持股價？
龔成老師︰
領展（0823）有一定規模，坐擁不少優質商場、寫字樓、停車場等物業。
你睇倒佢由上年中社會運動開始，至現在肺炎出現，股價下跌了近3成。雖然股價跌了不少，但我地要唔要放棄領展，應該睇翻佢長線質素有無變。
集團主要透過提升的商場，去增加物業發展潛力。過往股派息穩定，無論是收息又或是增值方面，領展都擁有條件，長線質素依然存在。
再加上早前斥資36.7億元收購悉尼一幢甲級商廈，集團開始在海外尋找有潛力物業，預期由本地化進一步國際化，這都是潛力所在。
但由於此股優質，市場估值往往不平。但此股最少要求要有4%以上息率，才有投資價值，股息率達5%會更理想。但現時股息率只有逾3%，所以尚未算平宜。
------------------------------------------------
Q15616：
老師，大陸疫情即將受控，暴亂又開始冇咁激烈，相信最壞既情況已經過去，我打算開始分段吸納本地股票。想請教你對本地零售，旅遊，餐飲，酒店股有咩睇法？52，178，1881，709點睇？會推介邊幾隻？
仲想問埋52同341邊隻值得推介？我見341係內地業務發展得好似比52好
龔成老師︰
疫情和社會運動等問題，是否將會結束，還是會再嚴峻D，無人會知。我地投資唔應該用"估走勢"架方法去投資，正確方法應該係去理解企業長線質素和前景，再了解佢處於平定貴，之後去進行資金配置。
大快活（0052）是有質素的，我都很喜歡這股，你以生活模式去選股，是正確的方法。比起一些潮流飲食，我會偏向選大快活。因為香港人變得好快，潮流飲食的不確定性高，業務可以很好，又可以好差。
反而最基本，民生的必需品，例如大快活及大家樂（0341），會有一定投資價值。2者間，我自已覺得大快活較有質素。現時股價處於合理區，有長線投資價值，但中短期依然會波動，最好分注入市。
莎莎（0178）企業長期的本質不差的，本身有優質的，有品牌、有規模，在行業有一定的地位，賺錢能力不差，但就會受經濟及零售市道影響，令股價較為波動。
以上因素相信只會影響佢中短期，唔會長期咁影響佢。現價已有長線投資價值，可以分注入貨，但唔好太大注，同埋你預要有耐心先有收成。
富豪產業（1881）持有的是酒店項目，這類項目的收入，會較受經濟影響，因此不確定性較高。現價已算有長線投資價值，但此股唔好太大注。
佐丹奴國際（0709）集團為國際服裝零售商，擁有眾多品牌，包括Giordano及Giordano Junior、Giordano Ladies、BSX以及其他自有及授權經營之品牌，門市超過2,000間，絕大多數門市位於大中華地區。
其業務不差，生意和盈利穩定，但生意就無增長，而佢派息比率高。這類股適合投資作收息股，但就不要對股價有太大的期望。
但要留意，佢2018年度的股息，比2017年度減左少少。所以，其實佢業務基本穩定，但點都會有上落，這就必然會影響股息。你要明白這點，但基本上，這股有投資收息的價值。
------------------------------------------------
Q15617：
龔成老師，我MPF60%是北美基金，見近日美股大跌，現有金額應否立即轉到比較保守的基金或是見美股反彈先轉？ 另外，未來供額是否不應轉到保守基金？
老師有否建議現在應如何分佈供款佈署？？
謝謝老師。
龔成老師：
唔建議轉來轉去，無人知中短期的升跌所以，你長期持有無問題的。
你要睇翻自己基金，有60%持有這類別，會否過多。我自己對長遠中國及美國都是正面的。
另外，如果你現時年齡未算大，這風險度無問題，但如果開始大，就要慢慢轉到較保守的類別。不過，就唔好因為市況波動而轉來轉去。
------------------------------------------------
Q15618：
Hi, 龔Sir, 我係澳門舊生，呢幾日左入貨，買左14,921,1212.
已經無乜閒錢了，唔想取消定期d錢，驚再買再跌。不過如果去到22000,就唔同講法。有咩建議俾我地，謝謝
14@$28.15
921@$7.79
1212@$7.48
龔成老師：
持股基本上都有質素的，相信中短期會較弱，只要長線持有就無問題。
利福（1212）負債較高，有風險，但這刻有值博率，因此，這股只要金額不過多，就無問題，但就要長線。
幾隻都可持有，不過，你這刻要加大儲蓄，令自己有較多的現金在手，等機會。
------------------------------------------------
Q15619：
老師，我野請教：
1. 想請問可唔可以幫我分析下1997九龍倉置業呀？
2. 之前一直有留意呢隻、現合理價？幾錢先算平？
thanks
龔成老師：
1）仍是正面，不過市道轉弱，加上今次私有會德豐，對佢無特別著數，所以你預中短期股價仍會弱。
佢持有好多好優質的物業，只要以長期的角度分析，佢仍是好有價值的，物業其實是不死的，只要耐心就會見到價值。
2）現時是合理價，有投資價值，不過就要分注，如果跌多15%，就會開始平宜。
------------------------------------------------
Q15620：
老師，買咗幾本你嘅書增值
早前亦都跟你投資方法開始月供股票
希望盡快財務自由
現時二人手持現金140萬
持有一層私樓（單名）但另一伴做擔保
仲有310萬按揭市值440萬
二人月入總共4.2萬（穩定）
樓按月供1萬2
每月減除開支可儲2萬（現時月供1萬4儲6千）
股票大概30萬
941、27、3988、1053、1816
（以上全部蝕咗2-3成）
美金定期1萬5
澳幣定期1萬（蝕咗勁多）
人仔定期5萬
現時月供以下股票各3千
12、66、1038、2638、27月供2千
如果每個月月供名單增加2388及2800各3千會唔會太保守？
請教老師對我以上財政/月供方法有咩意見？
長遠希望甩咗另一半擔保人個名買多一層樓收租
煩請回覆
龔成老師：
先講物業，你長遠當然要甩擔保人，令買樓的彈性增加翻，這點都重要的。這刻，會先建議你集中增加翻股票，唔好太心急增持物業，除非物業市場有明顯的下跌，否則，唔需要急。再買樓是可以是方向，但並不是急做，因為你這刻股票等其他資產類別不多，太急買樓會令你太過集中。
至於定期方面，由於數目不多，就算持有都無所謂。
另外，現時的持股，重慶鋼鐵股份（1053）、
中廣核電力（1816）質素只是中等，增長力不強，因此持有的價值未必算好高，又或不建議持有太多。
至於月供股票，都是優質股，無問題，但港燈（2638）只是收息股，如果你年齡不算好大，這未必是最好的選擇，因為我地進行人生財富累積，應該用「先增值，後現金流」作策略。
因此，其他都可以保持月供，長線無問題。
另外，你現時持有較多現金，你要睇下自己打算幾時有可能買另一層樓，如果在1、2年內，就不要動用現金。如果打算3年之後先買，就可以有效用現金增值。你可以考慮平穩增值股，現價合理，已可分注投資，但一定要同時留有現金。例如：
盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。
----------------------------------------------
若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。
另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
giordano ladies門市 在 giordano ladies 台灣官方網店 的相關結果
giordano ladies 台灣官方網店. ... 週二~ 週五 10:00 ~ 18:00. ( 週六、日及例假日休息). email address：. [email protected]. ... <看更多>