《差一點的神作－BEASTARS》
（放心閱讀。觸及地雷線嘅時候，會講聲。）
《BEASTARS》係講咩㗎呢？簡單講就係模擬咗一個「動物共存」嘅文明世界出嚟。
將獅子老虎大象兔仔擬人化，放喺同一個社會上生活。
淨係黑人、白人；男人、女人都已經咁多問題，「動物文明社會」嘅矛盾自然更多。
既然係文明，老虎都著西裝嘅時候，我無理由喺條街度咬死隻山羊㗎,Right?
呢個就是其中主軸矛盾－肉食&草食動物嘅共融問題。
故事以「校園內，一隻羊駝學生被咬殺」，圍繞主角大灰狼雷格西而開始。
＝＝＝（微劇透線）＝＝＝
首先，值唔值得睇？絕對值得。
因為呢套漫畫本身就係 「神作後補」，睇完個開頭，都知無咩意外嘅話，上硬神枱。
主角雷格西身為大灰狼，但偏偏被草食動物吸引，抗拒自己天生嘅肉食衝動；
女主角哈魯係隻兔仔，喺生活嘅任何一個時間點，都係一隻獵物。因為弱小，所以用性愛去換取一份「平等感覺」。
男配角路易，赤鹿，又型又靚仔仲係財團少爺。不過其實身世係孤兒，為咗證明自己唔輸畀肉食動物，一度入魔做埋黑社會大佬。內心曾經怨恨「自己身為獵物，始終有好多事會輸畀捕獵者！」
故事借用肉食、草食，去探討社會上種族嘅矛盾，
再活用每種動物嘅特性去立體角色。（例如兔仔哈魯 就用弱者視角去睇世界，因為佢哋好容易同死亡「擦身而過」，呢種感覺其他人唔能夠理解。）
慢慢，仲有 肉食同草食 跨種族戀愛，生出「混血兒」，
但往往成為「社會」嘅受害者。
＝＝＝（瘋狂劇透線）＝＝＝
內容睇嚟好好，世界觀都好宏大。
但點解會話係「差一點」的神作，
因為當故事鎖喺校園之中，一切都under Contorl。
所以，去到 「雷格西vs利茲」 呢一Part，一切都做到情理之內，但意料之外。
但呢Part完咗，雷格西決定唔讀書，走出社會時，
就開始有點亂套。
首先係主角大灰狼雷格西 嘅成長，
佢明顯唔係嗰啲「我是村民，但我是200LV」嘅 全神型主角。
反而係 超級多缺陷！
超級婆媽嘅男人…同時超溫柔！
OK！睇主角成長，就是享受。
可惜，佢有成長，但唔太多。
到最後…佢認定自己係一隻「對草食動物有特殊喜好嘅變態大灰狼」！
每次關鍵時刻，佢都係衰心軟、衰大愛過頭、溫柔到敵我不分。（到結局都係咁…）
最後「黑市格鬥大會」（我覺得呢個名好適合），對住女性就要著高踭鞋先肯打…大佬呀，我都知打女人係唔啱，但同時你係為咗救自己女人呀嘛…醒少少啦。
而佢嘅Fd子，路易。
問題一樣，做獅子組大佬時，係呢隻赤鹿最輝煌嘅時刻。
之後佢個定位就有啲尷尬，對故事推進有作用，但唔關鍵。
好模糊。即使作者再加入好多矛盾畀佢，感覺上都已經係「老調重彈」，發揮有限。
可能係篇幅問題，個世界觀一擴大，太多角色中期加入。兩邊都要講，變咗個個角色都著墨，但不足，形成少許牽強。
例如 雷格西外公戈查，佢最大作用係帶動「混血」呢個主題。
但佢同妻子間嘅故事（佢妻子為咗錫佢為死）…
嗯，感動唔太有，甚至覺得…佢嘅死完全可以避免。
至於大奸角，亦係「混血（瞪羚羊X豹)」嘅梅洛，
故事其實算完整，但細緻去睇，依然有啲問號。
號稱超級聰明嘅佢，其實短短70話之間，已經畀人捉過好多次…只係雷格西衰心軟。
所以…唔明佢有幾醒…另外成為獅子組大佬，都無咩鋪排，好似趕住推佢成為大魔王一樣。
其中一個超細位，就係佢遇上哈魯一幕。
佢話自己係潛為大學做老師（為咩呢？目的好似不明確），
而號稱最聰明嘅佢，竟然眾目睽睽下對哈魯動殺機，搞到自己被免職。
（究竟佢入大學係做咩㗎！！！！！）
再之後，佢同哈魯講：「我想食咗你呀！蝦蝦蝦！」
而哈魯竟然係：「OK！」
天呀！點解會OK㗎！雖然作者有畀到一個原因，但好勉強。
到最後，梅洛帶動到故事，
但偏偏就令讀者覺得：「無錯呀，佢出現就係為咗推動故事囉！」
而唔係，佢嘅故事，本身就融入咗故事。
呢個現象，去到後期出現咗幾次，例如兔子「玖」嘅背叛，再畀獅子組捉住，再無事…
呢三幕短到，其實Skip咗都得。
令到兔子「玖」除咗Show上圍之外，就係無咩嘢做（師傅角色，豪彬做返亦可…）
再講到嘅，
就係我哋嘅「壯獸BEASTAR」－雅夫亞！
對於佢對戈查嘅怨恨；對罪惡嘅執著，我覺得未去到精妙，但至少合理同順暢。
但可惜，都係篇幅問題，表演機會唔多。
同時…佢提醒咗我一樣嘢…就係「BEASTARS」呢個主題。
其實睇晒成套漫畫，隱隱約約都知，個主線應該就係…
戈查同雅夫亞曾經想一齊成為「BEASTARS」，但事與願違。
不過後繼有人，就由雷格西同路易，一肉一草，政治正確地正為新一任「BEASTARS」！
而呢個主題，偏偏蜻蜓點水、若隱若現，有講下，但唔入肉。
同雷格西一樣，不斷成長，但關鍵時間依然有所閃失。
漫畫結局，黑市被破壞，草肉再次共融，雅夫亞拒絕大海嘅「以魚為食」方案。
但大家都知，呢個…只係短暫嘅和平，因為肉食衝動係一份天性。
在社會上抑壓，一時可以；卻沒從根本入手。
如我們的社會一樣，星星之火，必定燎原。
講晒感想，好似都係失望為主，但唔代表作品差。
而係因為佢開頭太好睇。
令我期望值升到同《EVA》一樣，你當一般漫畫而言，其實都上級水平有餘，
於是…佢就成為咗…「差一點的神作」。
同時，佢有個類似外傳故事《BEAST COMPLEX》，短短七話，非常好睇。
鍾意呢套作品嘅一定要睇。
如果未睇過《BEASTARS》（而你竟然睇晒呢篇嘢），當世界觀入門都好啱睇。
最後，帶一個小小彩蛋位。
我自己覺得《BEASTARS》有幾個地方向一套叫《茉莉》嘅漫畫致敬。
－Final Boss梅洛係 瞪羚 mix 豹，《茉莉》嘅主要角色都係瞪羚同豹。
－《茉莉》主角係湯氏瞪羚，而湯氏瞪羚呢個種族有喺《BEASTARS》早期以「被殺害動物」嘅身分於新聞中被報導過（呢個真係唔太記得）
－兩本漫畫帶出嚟嘅理念 「肉食草食」有共鳴地方
《茉莉》唔係咩舊漫畫，早《BEASTARS》少少。
故事都係用動物擬人化，帶住社會上嘅矛盾。
而《茉莉》同《BEASTARS》嘅分別就係…
《茉莉》唔紅，無咩人講，只有短短17話，就腰斬咗。
如果你有時間，都可以睇下《茉莉》，係一套好作品。
P.s. 點解無拿拿寫漫畫？因為發現自己真係睇得超級多。同埋熱門同冷門都會睇，與其收埋心底，不如公諸同好！召集所有鍾意「睇漫畫」嘅臉孔！
P.s.2 始終無重新睇一次，記憶有誤嘅請指正。
#超長希望有人睇
IG: cheungson88
https://www.instagram.com/cheungson88/
你的一下Follow，我的無上成就
beastars結局 在 [討論] 能接受Beastars的結局嗎？ - 看板C_Chat - 批踢踢實業坊 的八卦
相關內容