【芬蘭事件澄清文】
關於芬蘭公寓事件，本來真係真係唔想再講，尤其俾本八婆雜誌亂Q咁作後，更加唔想再回應。但見大家越傳越離譜，越講越過火，仲要攞嚟茶餘飯後講笑，發現有必要釐清整件事嘅始末。
首先，我想講，當晚我喺facebook發嗰個訊息，並唔係因為諗住博見報或者比雜誌有料寫呢啲低能嘢，而係因為，我當時：
真。係。好。驚。
如果你自認為一個人，請你找來足夠嘅同理心去明白，性侵犯／性騷擾事件並不是用來講笑的。有遇上類似事情嘅人就會明白，呢種遭遇係絕對可以為一個人留下很深嘅陰影。當然我最後好彩無事發生，但唔代表大家就可以攞呢種話題嚟消費。
Anyway，事發經過係咁嘅：（很長慎入）
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
話說我喺Airbnb book咗一間一家三口嘅屋企嘅房，個host係個女主人嘅，睇曬reviews，一致好評，咁就book啦（一個人住我都會加倍小心啲，book啲一家人或女性嘅屋企）。
第一日去到嘅時候下午三點，按門鐘幾次都無人理，終於三分鐘後個女人睡眼惺忪咁出現，個狀態超迷，問非所答，行咗一轉間屋，機警嘅我已經發現好多啤酒罐同煙頭。我心諗，哇完全貨不對辦，又話好開朗嘅一家三口？
感覺怪怪，好在出完去一轉，返來發現隔離房原來住咗另一家人，同埋阿老公都返來，感覺都好正常好helpful，係個中年男護士，咁都安心啲。
（一個重點detail：佢地屋企有個傳統柴火sauna響basement，每次用要俾錢，阿老公要去點火，我第一晚有用，但無得鎖門只有一個窗簾，但佢強調係private use。佢中途問我洗唔洗加柴我話唔洗，因為作為燒烤之星我已經自己加咗喇。）
好啦x2，咁第二朝，隔離家人走咗，住客得返我一個。傍晚返來家裡無人，又見檯上幾個啤酒瓶。我煮飯之際兩公婆返來，眼見今日連阿老公都有點醉醺醺咁，比起第一日亦怪怪的，講講吓嘢無啦啦要求hug我😑，但當時無為意，覺得可能「芬蘭人都係咁」。
結果！！！戲肉嚟喇。
是夜，我又book咗sauna，但我落到去時個火已經燒到一半，焗完第一次已經就快熄。為免佢突然冒出來又問我要唔要加柴，我就自己主動叫上去問佢可否幫我加啦；咁我又無理由著返曬衫㗎嘛，加上「芬蘭人都係咁」，係會男男女女披曬毛巾響條街度乘涼，咁我覺得入鄉隨俗應該ok啦。
點知！佢落到嚟時上身無著衫，只著住條legging。我心諗，哇點啊，但又又唯有安慰自己可能「芬蘭人都係咁」（😅）啦⋯⋯殊不知佢加完柴之後，望一望我，又無啦啦埋嚟hug我wor！點啊！！！！赤裸裸hug乜Q啊！
入返sauna，gut feeling已經響起警號，有點不安，但礙於柴剛剛先加，唯有忍到個火燒到咁上下先，跟住快快手沖身諗住著返衫上樓啦。點知！當我關水，佢突然喺廉後出現，問我：「are you inside？」我（即刻披返毛巾）話：「nono！i am outside, don’t come in….」之際，佢已經行咗入嚟，下身披住條毛巾。
重點係，佢個下體係明顯地勃起了！！！
而且好明顯係想俾我見到。
嚇到我，即刻攞嘢話我上返去喇，個變態佬仲要故意跨過我，話佢入去sauna喇，問我要唔要一齊？此刻嘅我，嚇到個心狂跳，深感不妙，即刻耍手擰頭話no no no，拿拿淋衝返上房！！
返到房，十萬個驚，立刻盤算究竟應該繼續留低定走定點，定著曬衫唔好訓？但礙於我住呢個地方既離市中心三十分鐘路程，完全無車可搭，同埋路上係一片冰海，完全無法用跑嘅方法逃走，亦唔知搵唔搵到酒店。我企咗響度五分鐘盤算之際，聽到條變態佬叫咗佢老婆落去，跟住就聽到明顯在XYZ嘅聲。
痴_線㗎！迅速決定逃走，但為免顯得可疑（認真驚佢攞刀出嚟追我），拿拿淋再落返去扮鎮定，搵個藉口話我想出去睇極光，九秒九執曬包袱，撇！！！！勉強在冰上快步離開，一路行就一路回頭望，每次有車經過都驚一驚，半個鐘後，終於走到去市中心臨時入住一間酒店。
嗰三十分鐘冰上逃亡係我人生最可怕嘅三十分鐘！
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
成件事就係咁。
澄清幾點：
1）我無跳窗、逃離嘅時候亦有著衫，零下幾度只著bra，作嗰個有無常識啊？
2）我無被扯衫，亦無被強暴咁誇，正確嚟講係被性騷擾。
3）報導中相中人並唔係男屋主，而係我芬蘭認識嘅一位攝影師，對於此雜誌擅自採用我嘅私人相片，並胡亂堆砌侮辱我朋友，我在此強烈譴責。
值得一讚嘅係，我隔日即刻打去Airbnb嚴正舉報佢地，將事發經過一一告知，Airbnb嘅回應非常迅速及專業，亦好細心咁理解成件事。除咗全數refund曬俾我之外，佢地嘅Trust and safety department 響兩日之內徹查事件，亦將呢家人永久剔除Airbnb。我同佢地講，真係唔係錢嘅問題，而係擔心萬一日後如果有單身女仔入去住，又遇上咁嘅事，後果不堪設想。
而家講返大家可能覺得好好笑，好有趣味性，但作為一個單身旅遊嘅女性，遇到咁嘅情況，其實真係好驚，絕對係no laughing matter，稍為膽小都已經會不知所措，更不幸者，或者已經真係被施暴。我相信亦都真係曾經有無數咁嘅個案，而啲女仔決定唔追究，結果害咗自己之餘更害咗下一個受害人。
公開呢次事發經過，就係想話俾各位女性聽，單獨出門旅遊，一定要小心選擇住宿。遇到呢類性侵犯性騷擾嘅情況，一定不能退縮，不能軟弱，要儘可能立刻離開現場，打電話話俾你信任嘅人知，更嚴重者一定要立刻報警。無論點，一定要為事件討回公道，絕對不能不了了之。
另外，見到有好多人仲要消費呢種事，攞嚟賣紙，寫文章呃like，實在太無水準，水平太低。有啲仲要講啲關於咩女同志之類嘅笑話，都唔知到底咩年代咩地域嘅思維。
其實你地並唔係貶低緊我，亦不足以貶低女性（就憑你？），你地只係貶低緊你地自己嘅人格，如果仍然有剩餘的話。
airbnb住宿 在 Airbnb 超詳細訂房教學｜注意事項- 旅遊板 - Dcard 的八卦
這次會把文章拆成「Airbnb 訂房教學｜注意事項」以及「Airbnb 住宿體驗日記」兩篇，避免文章過長。 文章目錄： 一、【 什麼是AirBnb ？ 】 二、【 網站 ... ... <看更多>