失望到極點，因為朋友這次請來的 dealer，是個男的。「有冇搞錯呀，」我低聲說，「搵個男人派牌？」
正當主人家要回答之際，門鐘響起。
主人家立刻跑去開門，進來的是一位在攝氏十六度之下也毫不吝惜自己身材的混血兒。
「This is my cousin，Vivian，」主人家介紹，「識講中文。」
Wholly shit，好後悔著咗一件阿伯先會著嘅羽絨背心。
好少同女士玩 poker，Vivian 算玩得有板有眼，但面對著如葉某這樣的高手，輸錢是在所難免的。
「我帶咗支 whisky 嚟，」混血美女問，「you want a glass，Marcus？」
唔太鍾意賭錢嗰陣飲酒，但人家誠意拳拳，「sure why not。」
一看酒瓶，哎唷，頗有誠意的，不是一般的 cheap 嘢。
過了兩小時，不經不覺喝了三四杯，每次都是她問我要不要添的。這下子才發現，原來她只是倒酒給我，自己沒有喝過一滴。
越喝越難集中，最後埋單計數，如果那瓶酒的價錢是 X，那我輸掉的就是 5X。
悲，想不到堂堂葉朗，還會輸給一道美人計。
等𨋢嗰陣，Vivian 問我：「你點走？」
你贏晒我啲錢，冇 cash 搭的士，好彩有 Uber。
「你住邊？不如我車你？」
卻之不恭。
原來 Vivian 開的是藍色寶馬，跟她的型格蠻配的。
「下次同你玩 poker，唔會再飲你啲 whisky，好少畀人清袋。」
「What if I say，請你飲酒，其實係想搵個 excuse 車你返屋企？」
死喇死喇，我真係中年危機呀，我竟然信佢。
就在途經長江中心之際，我喺度諗，佢會唔會係想趁我醉，上嚟我屋企打劫？
Well，能夠被一個混血兒老笠，都總算光宗耀祖吧。
什麼邏輯？沒有什麼邏輯不邏輯的。
凡事想到最壞的時候，也能安慰自己 it can’t be that bad，才能夠摶盡無悔。
Right，係搏。
唔係扑。
晚安。
