【Umbro日系路線：Accerator】
有時買波Boot就好睇緣份，阿靴就好鍾意試新Boot，牌子越小眾就越想試下佢係點樣。
話說上段Vlog「東京裝備多」段片裡面，因為唔夠時間拍，無同大家講到一個令自己非常驚訝嘅一個「尋Boot聖地」，話說個時候阿靴就用超低價約港紙$200，入咗對袋鼠皮Umbro Accerator翻嚟! 而今次，阿靴就同大家認真講下呢對鞋。
Umbro Accerator屬於日本地區自己推出嘅系列，佢哋會根據翻日本當地嘅市場需要設計同研發，而Accerator，就正正係屬於日本Umbro嘅產物。Accerator响日本整整出現超過十年，亦都推出過唔同嘅款式。Accerator呢個名非常有趣，大家都會問，會唔會係阿靴打錯字？有趣個點係，佢真係叫Accerator，亦同Accelerator同解，主要係日文嘅L同R發音係會連結一齊，所以個名就叫Accerator，非常之本土。
Accerator慢慢得到大家嘅注視，某程度係因為遠藤保仁，一位曾代表日本國家隊超過150場嘅國寶級球員，遠藤保仁職業賽事上主要着7號球衣，踢嘅位置係中場中，佢係一個Playmaker，傳球獨到，具入球能力，同時亦有準繩嘅射罰球嘅能力。遠藤保仁同時係大阪飛腳嘅大哥，整整响飛腳至今效力整整18年，向現今「忠誠何價」嘅足球市場裡面真係買少見少。
遠藤保仁嘅能力，加上佢响日本國內嘅影響力，同時令Accerator得到更多人嘅注視。最近遠藤保仁响日職聯正式上陣第600場，Umbro亦响Twitter祝賀佢，可見Umbro對遠藤保仁嘅重視程度。今年38歲嘅遠藤保仁，仍然响大阪飛腳效力，隨著遠藤保仁踏入球壇嘅高齡，Umbro同時需要重新物色新嘅代言人，當中最出名嘅就唔少得日本嘅新七號球員，現效力基達菲嘅柴崎岳！
兩位日本具影響力嘅球員，分別都著上貴版嘅Accerator Pro。而今次呀靴買嚟嘅係舊少少嘅次頂級版本：Accerator KL，用上HG釘。Accerator Pro 同 KL非常接近，佢哋同樣用上袋鼠皮，Pro版嘅後鞋身會用上更輕嘅超纖合成皮，而阿靴手上嘅係用上普通合成皮，Pro版亦有少許細節位嘅強化。
講翻Accerator KL，阿靴就拎咗佢去友賽，袋鼠皮非常之夠做，袋鼠皮唔會太厚又唔會太薄，加上佢較修腳嘅設計，會感受到袋鼠皮係啱啱好包實晒腳掌，感覺到波Boot踢落波到會非常食力，同時袋鼠皮亦會俾到大家一種舒適嘅感覺。Accerator KL帶來嘅球感亦算唔錯，佢係內側會有一個三角形嘅位置，上面亦有一個個窿仔，相信設計係為咗加強腳內檔傳控嘅球感。
前腳掌袋鼠皮，後鞋身合成皮，已經慢慢成為袋鼠皮Boot嘅主流，全對袋鼠皮嘅Boot的確响現時越來越少，阿靴相信係因為現時嘅波Boot講求輕量化，後鞋身合成皮正正可以處理喱個狀況，加上全袋鼠皮波Boot亦會有支撐力不足嘅可能，新設計亦都可以改善問題。Accerator KL同樣地係一對輕巧型嘅袋鼠皮Boot，加上佢係用上較短嘅HG釘（比Mizuno還要短），响香港嘅仿真草上，阿靴都可以感受到Accerator KL帶來嘅盤球快感。
總括黎講，Accerator KL响日本當地正價約1000港元，今次竟然响日本以約200港元入到真係非常之有緣份。Umbro Accerator KL無其他牌子般高科技，但係佢就有日系Boot嘅舒傳統，加上佢輕巧型又貼腳嘅設計，阿靴會認為佢係一個中位價錢類別裡面質素非常高嘅選擇！
講埋最後一點，阿靴上次係向東京上野站嘅London Sports Honten入對Boot嘅，話說London Sports Honten嘅最上層係波Boot Outlet嚟，除咗Umbro，都會有Adidas同埋NB等等嘅牌子以低價發售，如果大家有機會去東京，就真係不妨認真望望～
參考：Enjoyz, Soccercleats101
---------------------------------------
【更多波Boot資訊】Follow: instagram.com/hkfootballreview
【波Boot實測】Joma Super Regate: https://youtu.be/yNkcmE58ENI
【波Boot開箱】Nike Supreme GATO: https://youtu.be/KHj_6ZaV1io
【個人Vlog】東京裝備多: https://youtu.be/fczbd08VWoM
