《衝鋒車》入面嘅「反路西法效應」
—
喺6月9號「反送中」遊行之前，
寫一篇拆解《衝鋒車》嘅文章，
聊以個人對時代之一紀錄。
—
「呢個世界真係怪啊，龜苓膏無龜，奶茶無奶，壞人唔壞，架小巴邊度有落，你哋自己諗。」飾演「真警察」徐安良嘅古巨基中槍受傷，喺暈低之前同演盧西發嘅吳鎮宇等四個「假警察」講咗呢番說話，比佢哋幾個主角自決個人嘅命運。
—
《衝鋒車》究竟好睇喺邊？「表裡不一」，係《衝鋒車》嘅命題，幾乎所有電影嘅細節同設定，都可以同呢個命題拉上關係。
—
「以前左輪改AK，今日小巴改警車」，裡面係紅VAN，外面係警車；「四人幫」裡面係大賊，外面係差人；徐安良裡面係警察，外面係小巴司機；而佢外表只係沙展，但內裡竟然係查案奇才；跨境貨櫃車表面係運送遺體，而入面係洗黑錢嘅工具；外賣表面係炒麵，內裡係炒飯；蝙蝠俠表面係富豪，內裡係英雄；表面係IRONMAN同美國隊長，但入面係慶祝萬聖節嘅小朋友；表面係露營營地，但內裡係走私秘道。例子眾多，不勝枚舉，真亦假時假亦真。
—
盧西發之所以叫做盧西發，唔好同我講同「路西法效應」無關係。所謂「路西法效應」，簡單去講，就係人「惡」嘅思想、行為同性格，會喺特定環境之下被誘發出嚟。有一個好出名嘅實驗叫做「史丹福實驗」，實驗入面搵咗班普通大學生做獄卒同監犯，本身大家都以為只係做場戲，點知最後「獄卒」同「監犯」之間「假戲真做」，情況開始唔受控，實驗被迫提早結束。由此證明，人嘅思想行為會被身份所左右同擺佈，令人做出他人難以理解嘅行為。
—
呢個理論，亦解釋到演盧西發同自己嘅兄弟周大寶（任達華）、杜公子（譚耀文）同林東（鄭浩南）講，「做賊梗係打劫㗎啦！」嘅呢句說話。每個身份背後都有佢「應該」做嘅行為。而當佢哋四兄弟第一次著上有戀舊意味嘅皇家香港警察制服嘅時候，幾兄弟就開始扮警察「搜身」，亂咁摷嘢，大寶仲扮幻想自己拎住警棍打人。權力使人腐化，即使幾條友只係「扮」緊差人，都已經以為自己有至高無尚嘅權力，可以任意妄為，可以隨時充公市民嘅咖哩角。
—
《衝鋒車》，係一套反「路西法效應」嘅電影。著起警察制服，可以唔係差人，而無著警察制服，又可以係滅罪嘅精英，喺徐安良做返軍裝之前，佢係一個臥底，佢唔知自己究竟係差人定係小巴司機，唔知自己係查緊案定係揸緊車。好多時候，人在江湖，心不由己，人往往都會喺靜好之中迷失，唔知自己做緊咩，忘記咗自己塵封已久嘅初心。
—
咁究竟乜嘢係假，乜嘢係真？人喺唔同身份嘅拉扯之下，又應該如何自處？成套《衝鋒車》，都係想去回應呢一個問題。大寶因為英雄主義驅使，見義勇為去救細路女，開始咗同悍匪嘅鬥爭，其實佢可以當視而不見；林東因為要救喺對家手上嘅杜公子而同盧西發反面，其實佢可以苟且偷生；最後盧西發四兄弟決定要衝去露營嘅營地救人，因為佢哋知道悍匪係無性，會濫殺無辜，但其實佢哋可以遠走高飛。
—
「所以謂人皆有不忍人之心者：今人乍見孺子將入於井，皆有怵惕惻隱之心」，惻隱之心人皆有之，乃人性使然。
—
《衝鋒車》最大嘅訊息係，無論你係粗枝大葉嘅盧西發、細心謹慎嘅周大寶、無主見嘅林東，定係做事一絲不苟嘅杜公子，無論你係警察定係賊，大人定細路哥，面對大是大非，除咗件制服，去除一切身份之後，你仍然係一個「人」，就好似嗰架遍體鱗傷嘅「衝鋒車」咁，最後金蟬脫殼，變返原初嘅十六座小巴。
—
無任何嘢可以真正阻止到你想做嘅事，蒙蔽到你嘅思想，摧毀到你嘅個性。可能你覺得自己只係一個淨係識打保齡球，甚至連碌拎都會落坑，比場租都要籌期嘅廢柴，但正正就係因為大寶最後嘅嗰球落坑，引起蝴蝶效應，曱甴無心插柳，擊敗咗象徵極惡勢力嘅悍匪集團。
—
39633，係盧西發嘅囚犯編號，但同時係徐安良嘅警察UI。重點唔係以前嘅你係點，或者你係一個咩人，有咩背景，有乜包袱，有咩性格，而係做好人定做衰人，原來自己都仲有得揀，仲可以做啲唔令自己會後悔嘅事。星星之火，足以燎原。
—
（而家已經好少寫咁長，因為咁長無人睇，又好似文不對戲，但就好似套戲片頭話齋，「本片根據虛構事實改編」，都係唔知講緊咩，都係「表裡不一」，反正醉翁之意不在酒，心領神會足矣。）
—
衝鋒車 Two Thumbs Up
劉浩良
