《蛋黃哥教會我的事 ── 被動地贏，用力就輸》
Christmas 係卡通人物有幾「紅」嘅試煉...
最近見到蛋黃哥真係無處不在，聖誕蛋糕又有佢份，M記開心樂園餐又有佢份，鴻福堂又有佢份，商場燈飾佈置都有佢份，甚至長榮航空都有佢專機。呢幾年蛋黃哥個曝光率真係堪稱卡通人物界嘅神話，蛋黃哥仲係少數男女都愛嘅人物。
蛋黃哥走紅其實係意想不到的...講下蛋黃哥嘅出道經過
蛋黃哥其實係參加咗3年前sanrio 搞嘅「食物角色選拔賽」，呢個比賽係sanrio 想推出新嘅人物。同屆參賽者有香腸天堂，飯糰狗，和菓子狗，熊貓吐司，冷豆腐藝妓同三文魚小姐。
大家對sanrio 有咩印象？我對sanrio 最大嘅印象就係姣婆恩物，無論係hello kitty 定my melody，就算係奸角Kuromi，都有份姣婆感滲出來。
所以當年sell 光滑pat pat，走性感路線嘅蛋黃哥並唔被睇好會勝出，2013年「食物角色選拔賽」冠軍係三文魚小姐奪得嘅，蛋黃哥最後係拎到亞軍。但呢個比賽過後，走紅嘅竟然唔係三文魚小姐，而係樣樣衰衰嘅蛋黃哥。
蛋黃哥贏喺邊？
而家你再次將三文魚小姐同蛋黃哥compare，我都覺得三文魚小姐其實幾可愛架，成條鯇魚咁。但我覺得蛋黃哥係贏在「唔置在」，蛋黃哥係充分表現咩係無欲則剛。蛋黃哥嘅精神，就係無精神，佢完全唔洗用力，被動地贏。
蛋黃哥拎亞軍但最紅，就好似朱千雪紅過張名雅，張曼玉紅過個冠軍(我甚至唔知張曼玉個屆邊個係冠軍)一樣。
個世界好奇怪，你睇港姐都係咁，見到有啲佳麗個樣同對答都係「好想贏」， 通常呢啲佳麗都會落選，愈用力反而會輸，而表現到唔置在，最後總會「被動地贏」。
我覺得，呢幾日，葉劉嘅表現，似乎都似係三文魚小姐架啦！咁我哋都唔好阻住葉太咁努力啦。
PS. 所有嘅un星都係悲劇，對於三文魚小姐贏咗比賽但半紅不黑，我真係好同情佢，希望佢捱下捱下會咸魚翻生啦，不過由魚生捱到變咸魚都應該要一段長時間架啦。
